قازاقستان وپەك+ ەلدەرىنىڭ بيىلعى جىلدىڭ 1 قاڭتارىنان باستاپ مۇناي ءوندىرىسىن ازايتۋ تۋرالى مىندەتتەمەسىن جوسپارداعى كەستەدەن ارتىق ورىنداپ جاتىر, دەپ حابارلايدى ەنەرگەتيكا مينيسترلىگىنىڭ ءباسپاسوز قىزمەتى.
«الدىن الا مالىمەتتەر بويىنشا, قاڭتار ايىنداعى ءوندىرىس كولەمى 1,67 ملن باررەلدى قۇرادى. بۇل دەگەنىڭىز, قازاقستاننىڭ وپەك+ كەلىسىمى اياسىنداعى مىندەتتەمەنى جوسپارداعى كەستەدەن ارتىعىمەن ورىنداپ جاتقانىن كورسەتەدى. قازىرگى تاڭدا ءبىز بىلتىرعىمەن سالىستىرعاندا تاۋلىگىنە 30 مىڭ باررەل كەم ءوندىرىپ جاتىرمىز. قازاقستان جوسپاردى ارتىعىمەن ورىندادى جانە ءبىزدىڭ جيناعان قورىمىز بار», — دەپ حابارلايدى مينيسترلىكتىڭ ءباسپاسوز قىزمەتى.
ەستەرىڭىزگە سالا كەتەيىك, بىلتىر وپەك ەلدەرى مەن ۇيىمعا كىرمەيتىن مۇناي ەكسپورتتاۋشى مەملەكەتتەر جىل باسىنان باستاپ مۇناي ءوندىرىسىن تاۋلىگىنە 1,8 ملن باررەلگە ازايتۋعا كەلىسكەن. وسى ورايدا, قازاقستاننىڭ تاۋلىگىنە 20 مىڭ باررەل از ءوندىرۋى ءتيىس بولعان.
ۆەدومستۆونىڭ حابارلاۋىنشا, قازاقستان ءوزىنىڭ مىندەتتەمەسىن تولىعىمەن ورىندايدى.
ءوندىرىستى ازايتۋعا ماڭعىستاۋ, اقتوبە مەن قىزىلوردا وبلىستارىنداعى ءوندىرىستىڭ ازايۋى سەبەپ بولعان.
ال ءار وڭىردەگى ءوندىرىستىڭ ازايۋ كورسەتكىشى تۋرالى مينيسترلىك ناقتى اقپاراتپەن بولىسپەگەن.
«الداعى بەس ايدا ءبىز العاشقى جارتىجىلدىقتىڭ مىندەتتەمەسىن ورىندايمىز. مىندەتتەمەگە ساي, تاۋلىگىنە 20 مىڭ باررەل ازايتامىز», — دەپ جازادى مينيسترلىكتىڭ رەسمي سايتى.