كەشە استانا قالاسىنىڭ اكىمى يمانعالي تاسماعامبەتوۆ پەن بىشكەك مەرى يسا ومۋركۋلوۆتىڭ رەسمي كەزدەسۋى ءوتتى.
كەزدەسۋ بارىسىندا استانا اكىمى قازاقستان مەن قىرعىزستاندى تەك تىعىز دوستىق قارىم-قاتىناستار عانا ەمەس, تاريحي تۋىسقاندىق تامىرلار بىرىكتىرەتىندىگىن اتاپ ءوتتى. قالا باسشىسى ودان ءارى مەيماندى قازاقستان ەلورداسىنىڭ جوعارى الەۋمەتتىك-ەكونوميكالىق كورسەتكىشتەرىنەن حاباردار ەتتى. ماسەلەن, ەلوردادا قۇرىلىس سالاسىنداعى جانە جاھاندىق قارجى داعدارىسىنا قاراماستان, جىل سايىن 1 ملن. 400 مىڭ شارشى مەتر تۇرعىن ءۇي پايدالانۋعا بەرىلەتىنىن, 50 مىڭنان استام ادام كوشىپ كەلىپ, تاعدىرىن جاڭا استانامەن بايلانىستىرعانىن ايتتى. قالانىڭ حالقى مەن اۋماعىنىڭ قارقىندى وسۋىنە بايلانىستى 3-ءشى جاڭا جىلۋ-ەلەكتر ورتالىعى سالىنۋدا.
ەلباسىنىڭ باستاماسىمەن ەلوردانىڭ اينالاسىنا 55 مىڭ گەكتار جەرگە جاسىل جەلەك وتىرعىزىلعان.
سونىمەن بىرگە, ي.تاسماعامبەتوۆ: «استانا مەن قىرعىزستاندى جاقسى الەۋمەتتىك-ەكونوميكالىق بايلانىستار بىرىكتىرىپ وتىر. تەك 2011 جىلدىڭ 1-ءشى جارتىجىلدىعىندا سىرتقى ساۋدا اينالىمى 26,5 ملن. اقش دوللارىن قۇراسا, ونىڭ 25,5 ميلليونى – ەسكپورت. ەكى ەلدىڭ ەكسپورتتىق-يمپورتتىق ساۋدا بايلانىستارىن ودان سايىن كەڭەيتۋدىڭ جاقسى مۇمكىندىكتەرىن ىزدەستىرىپ, تابۋىمىز كەرەك», دەدى. بۇگىنگى كۇنى استانا قالاسىنىڭ اۋماعىندا ەكسپورتتىق-يمپورتتىق وپەراتسيالارمەن اينالىساتىن 54 قىرعىزستاندىق جانە 17 بىرلەسكەن كاسىپورىن جۇمىس ىستەيدى.
ءوز كەزەگىندە ي.ومۋركۋلوۆ ورتالىق ازياداعى ساۋلەتى مەن داۋلەتى جاراسىپ وتىرعان بىرەگەي قالا – استانا تۋرالى جىلى پىكىر ءبىلدىردى. ول مەملەكەتتىك دەڭگەيدەگى ءوزارا قارىم-قاتىناستاردى تىلگە تيەك ەتە وتىرىپ, پرەزيدەنت ن.نازارباەۆتىڭ قىرعىز رەسپۋبليكاسىنا دەگەن ىقىلاسى ءاردايىم جىلى جانە ەلدەگى جاعدايدى تۇراقتاندىرۋعا قوسقان ۇلەسى ءسۇبەلى ەكەندىگىن اتاپ ءوتتى. بۇل رەتتە, ي.ومۋركۋلوۆ: «استاناعا سوڭعى رەت 7 جىل بۇرىن كەلگەن بولاتىنمىن. شىنى كەرەك, مەن تەك «بايتەرەك» مونۋمەنتىن عانا تانىدىم. ءبۇگىندە قالا تانىماستاي وزگەرگەن. ەكونوميكالىق دامۋى, جاڭا عيماراتتاردىڭ سالىنۋى عالامات. ءبىزدىڭ ساپارىمىز وسى قارىم-قاتىناستاردى قالالار دەڭگەيىندە, مادەنيەتىمىز, حالقىمىز, گۋمانيتارلىق, عىلىم جانە ەكونوميكا دەڭگەيىندە ودان ءارى نىعايتۋعا سەپتىگىن تيگىزەدى دەگەن سەنىمدەمىن», دەدى.
كەزدەسۋ سوڭىندا بىشكەك پەن استانا باسشىلارى قالالار اراسىندا باۋىرلاستىق بايلانىستار ورناتۋ جونىندەگى كەلىسىمگە قول قويدى. بىشكەك مەرى ي.ومۋركۋلوۆ باستاعان دەلەگاتسيا 8-9 قىركۇيەك كۇندەرى استانانىڭ كورنەكتى جەرلەرىن, مادەني نىساندارى مەن كوممۋنالدىق كاسىپورىندارىن ارالايدى دەپ جوسپارلانۋدا. ال 9 قىركۇيەكتە اتىراۋ, شىعىس قازاقستان جانە جامبىل وبلىستارىنىڭ استانا قالاسىنداعى كۇندەرى اياسىندا وتەتىن گالا-كونتسەرتتى تاماشالاماق.
جۇلدىز ءبايدىلدا.