قر پرەزيدەنتى نۇرسۇلتان نازارباەۆ بالاباقشالاردى اشۋ ىسىنە بيزنەسمەندەردى بەلسەندى تارتۋ جونىندە تاپسىرما بەردى.
«سوڭعى ءۇش جىلدا ەلىمىزدە 100 مىڭ ورىنعا 1,3 مىڭ جەكە بالاباقشالار اشىلدى. ولاردىڭ كوبى وڭتۇستىك قازاقستان وبلىسىندا, ياعني 400-ءى ىسكە قوسىلدى. الماتى وبلىسىندا -220, قىزىلوردا وبلىسىندا -180, الماتى قالاسىندا -180 بالاباقشا پايدالانۋعا بەرىلدى. بۇلار وسى باعىتتا الدا كەلە جاتقان وڭىرلەر. ال كەيبىر وبلىستاردا بۇل جۇمىس جۇزەگە اسىرىلىپ جاتقان جوق. مەملەكەتتىك جەكەمەنشىك- سەرىكتەستىكتى دامىتۋ بويىنشا پاۆلودار وبلىسى قالىپ كەلە جاتىر. ءۇش جىلدا 160 ورىنعا تەك 2 شاعىن ورتالىق اشىلدى», – دەپ توقتالدى مەملەكەت باسشىسى.
وسى ورايدا ەلباسى پاۆلودار وبلىسىنىڭ اكىمى بولات باقاۋوۆقا مەملەكەتتىك-جەكەمەنشىك سەرىكتەستىكتىك اياسىندا بالاباقشالاردى اشۋ ىسىندە بەلسەندىلىك تانىتۋدى تاپسىردى.
«وبلىستاعى بيزنەسمەندەردى تارتۋ كەرەك. بۇل باعىتتا ولاردى ىنتالاندىرۋ قاجەت, ياعني جەر تەلىمدەرىن ءبولۋ نەمەسە سالىنىپ جاتقان ۇيلەردىڭ ءبىرىنشى قاباتىنان ورىن بەرۋ كەرەك. وسىنىڭ بارلىعى پايدالى بيزنەس. ءاربىر بالانىڭ سوڭىنان مەملەكەتتىڭ جانە اتا-انانىڭ اقشاسى ىلەسىپ جۇرەدى», – دەدى نۇرسۇلتان نازارباەۆ.
ءوز كەزەگىندە قر ءبىلىم جانە عىلىم ءمينيسترى ەرلان ساعاديەۆ 2017 جىلدان باستاپ رب جانە ۇلتتىق قور ەسەبىنەن بالاباقشالار سالماۋ تۋرالى شەشىم قابىلدانعانىن جەتكىزدى.
«عيماراتتاردىڭ ءبىرىنشى قاباتتارىندا بالاباقشالاردى قۇرۋدى ايتارلىقتاي جەڭىلدەتەتىندەي جاڭا سانيتارلىق نورمالار مەن ەرەجەلەردى قابىلدادىق. الداعى ۋاقىتتا بالاباقشالاردى نەگىزىنەن تەك جەكە سەكتوردىڭ ەسەبىنەن قامتاماسىز ەتۋدى ويلاستىرىپ وتىرمىز», – دەدى مينيستر.