ۇكىمەتتىڭ كەڭەيتىلگەن وتىرىسىندا نۇرسۇلتان نازارباەۆ باس پروكۋراتۋرا مەن “اتامەكەن” ۇلتتىق كاسىپكەرلەر پالاتاسىنا تەكسەرۋ-باقىلاۋ قىزمەتتەرىنە رەۆيزيا جۇرگىزۋدى تاپسىردى. پرەزيدەنت مەملەكەتتىك قىزمەتكەرلەردىڭ قىسقارتىلۋىنان كەيىن دە ولاردىڭ سول قىزمەتتە وتىرا بەرەتىنىن سىنادى.
«تيمۇر مۇرات ۇلى (ۇلتتىق ەكونوميكا ءمينيسترى – رەد), مۇمكىن بۇل ماسەلەمەن سەن اينالىسارسىڭ. ۇكىمەت تەكسەرىستىڭ ازايعانىن, تاۋەكەلدى باسقارۋدىڭ جاڭا جۇيەسىنىڭ ەنگىزىلگەنىن, مەملەكەتتىك قىزمەتتىڭ ەلەكتروندى فورماتقا كوشكەنىن ايتىپ ەسەپ بەرەدى. الايدا, تەكسەرۋشى ورگاندارداعى قىزمەتكەرلەردىڭ سانى ءالى ازايماي تۇر. ءبىز ولاردىڭ سانىن قىسقارتتىق قوي, نەگە ولار سول ورىندا ءالى وتىر. تەكسەرۋشىلەردى ازايتامىز, بىراق شەنەۋنىكتەردىڭ سانى سول قالىپتى. مەن ۇكىمەتكە باس پروكۋراتۋرامەن جانە “اتامەكەنمەن” بىرلەسىپ تەكسەرۋشى ورگاندارعا رەۆيزيا جاساپ, ناتيجەسىن تۋرا ءبىر ايدان كەيىن ماعان بايانداۋدى تاپسىرامىن. كىمنىڭ نەمەن اينالىسىپ وتىرعانىن انىقتاڭدار», — دەدى مەملەكەت باسشىسى.
2016 جىلدىڭ 9 ايى قورىتىندىسى بويىنشا, شاعىن جانە ورتا بيزنەس شىعاراتىن تاۋار مەن قىزمەت كولەمى 7 پايىزعا ازايىپ كەتكەن. جۇمىس ىستەپ تۇرعان شوب سۋبەكتىلەرى 7 پايىز ازايىپ, ونداعى قىزمەتكەرلەر سانى 3 پايىز كەمىگەن.
«تەكسەرۋشى كوپ بولسا, بيزنەس قالاي داميدى؟ سوڭعى 10 جىلدا جىل سايىن ءنورماتيۆتى-قۇقىقتىق اكتىلەر قابىلدايمىز. ولاردىڭ سانى قازىر 4 ەسەگە كوبەيدى. 2016 جىلدىڭ وزىندە بيزنەستى رەتتەيتىن ءتۇرلى 6 مىڭ اكت قابىلداندى. رەسپۋبليكا بويىنشا قازىر بيزنەستى تەكسەرەتىن 61 ۆەدومستۆا بار. ونىڭ 45-ءى ورتالىق بولسا, 16-سى جەرگىلىكتى ورگاندار. تاياۋدا باقىتجان ابدىر ۇلىمەن اڭگىمەلەستىك, قاراپ وتىرساق, ءتىس اۋرۋىن ەمدەيتىن جەكە مەنشىك ستوماتولوگيالار بار, ال باسقا اۋرۋلاردى ەمدەيتىن كلينيكالار نەگە اشپاسقا؟» — دەدى نازارباەۆ.