قىرعىزستان پرەزيدەنتتىگىنەن ۇمىتكەرلەردىڭ بۇگىنگى كۇنگە دەيىن تىركەلگەنى 67 ادام بولىپ وتىر. كەشە ەلدىڭ ورتالىق سايلاۋ كوميسسياسى مەملەكەتتىك تىلدەن ەمتيحان بەرۋ سىزباسىن جاسادى.
ازىرگە ونىڭ تىزىمىنە 12 ادام عانا ەنگىزىلدى. بۇلار كانديداتتىققا ءوتۋ ءۇشىن زاڭ تالابىنا سايكەس 100 مىڭ سوم كەپىلدىك جارنا مەن وزدەرىن كەمىندە 30 مىڭ ادامنىڭ قولدايتىندىعى جونىندە قاعاز تاپسىرعاندار. قالعاندارىنىڭ قاي كۇنى ەمتيحان تاپسىراتىندىعى وسى ەكى تالاپتى ورىنداپ, تىزىمگە ەنگىزىلگەن سوڭ عانا بەلگىلى بولادى.
تاعى دا اۋىر لاڭكەستىك جاسالدى
كەشە ءۇندىستان استاناسىندا 2008 جىلى مۋمبايدا بولعان تەراكتىدەن كەيىنگى ۇلكەن لاڭكەستىك جاسالدى. جوعارعى سوتتىڭ الدىنا قاستاندىقپەن «ۇمىتىلىپ» قالدىرىلعان پورتفەلدەگى جارىلعىش زاتتار 10 ادامنىڭ ءومىرىن قيىپ, 47 جانعا جاراقات سالدى.
تەراكتىنىڭ جاۋاپكەرشىلىگىن ءۇندىستان, پاكستان مەن بانگلادەشتە ارەكەت ەتەتىن «حاركات-ۋل جيحاد ءال-يسلاميا» ۇيىمى موينىنا الىپ وتىر. ونىڭ وكىلى ەلەكتروندى پوشتا ارقىلى وسىنداي حابار تۇسىرگەن. ول بۇۇ-نىڭ 2010 جىلعى شەشىمى بويىنشا تىيىم سالىنعان ۇيىمعا جاتادى.
قايدا ەكەنى ءالى ناقتى بەلگىسىز
ليۆيا كوتەرىلىسشىلەرى كەشە مۋاممار كاددافيدىڭ قاي جەردە جاسىرىنىپ جاتقانىن تاۋىپ, سول ايماقتى قورشاۋعا الدىق دەپ جاريالادى. حاباردى تاراتقان وتپەلى ۇلتتىق كەڭەس اسكەري كوماندوۆانيەسىنىڭ وكىلى انيس شاريفت ءبىز ەندى كاددافيدى نە ءتىرى, نە ءولى كۇيىندە ءبارىبىر قولعا تۇسىرەمىز دەپ ماساتتاندى. بىراق پولكوۆنيكتىڭ ناقتى قاي جەردە جاسىرىنعانىن ايتپادى.
بۇدان بۇرىن م.كاددافيگە سەنىمدى اسكەرلەردىڭ قورشاۋىنداعى برونەماشينالار نيگەريانىڭ شەكاراسىنان وتكەن. كاددافي سولاردىڭ بىرىندە بولۋى كەرەك, وسى ەل ارقىلى ول وزىنە ساياسي باسپانا بەرەتىن بۋركينا فاسوعا وتەدى دەپ جاريالانعان. بىراق بۋركينا فاسو وكىلى بۇل مالىمەتتىڭ جالعان ەكەنىن جاريالادى. كىم ءبىلسىن؟
كىمدىكى دۇرىس, كىمدىكى بۇرىس
وزبەكستاننىڭ ەكولوگيالىق قوزعالىستارى بۇۇ باس اسسامبلەياسىنا ءتاجىكتىڭ اليۋميني كومپانياسى – گۋپ TALKO-نىڭ ۇستىنەن شاعىم ءتۇسىردى. وندا ەكولوگتار اتالمىش كومپانيانىڭ ارەكەتىنەن قورشاعان ورتاعا وراسان زيان كەلىپ وتىرعانىن ايتىپ, ونى انىقتاۋ ءۇشىن حالىقارالىق ساراپشىلار كوميسسياسىن ۇيىمداستىرۋدى وتىنەدى.
ال تاجىكستان جاعى مۇنى كۇلكىگە اينالدىرىپ, باسى اۋىتقىپ كەتكەن ادامداردىڭ ساندىراعى دەپ مالىمدەدى. سەبەبى, دەيدى ولار, اليۋميني زاۋىتىنان شىعاتىن قوقىستىڭ زياندىلىعى رۇحسات ەتىلگەن نورمادان الدەنەشە ەسە از. سايىپ كەلگەندە, بۇل ساياسي ويىن ەكەنىن ءبارىمىز ءبىلىپ تۇرمىز, دەلىنگەن ولاردىڭ مالىمدەمەسىندە.
گاز ماسەلەسى شەشىمىن تابار ەمەس
ۋكراينا مەن رەسەيدىڭ گاز پروبلەمالارى توڭىرەگىندەگى كيكىلجىڭدەرى جالعاسىپ كەلەدى. ۋكراينا جاعى رەسەيمەن كەلىسىمگە قول قويعان «نافتەگاز» حولدينگىن تاراتۋ ارقىلى مىندەتتەمەدەن قۇتىلۋدى كوزدەپ وتىر.
كەشە ۋكراينانىڭ وتىن جانە ەنەرگەتيكا ءمينيسترى يۋري بويكو حولدينگتىڭ قۇرامىنداعى كومپانيالاردىڭ اكتسيالارىن ساتۋ ارقىلى مەملەكەتتىك بيۋدجەتكە 10-12 ملرد. دوللار ءتۇسىم كىرەتىنىن مالىمدەدى. ازىرگە كومپانيالاردىڭ اكتسيالارىن باعالاۋ جۇمىستارى جۇرگىزىلۋدە, ال اۋكتسيون 2012 جىلدىڭ باسىنان باستاپ وتكىزىلمەكشى. بىراق رەسەي جاعى وزدەرىن الدارقاتقىسى كەلەتىن مۇنداي ارەكەتتەرگە جول بەرگىسى جوق. ولار قول قويىلعان مىندەتتەمەلەردىڭ ورىندالۋىن ءۇزىلدى-كەسىلدى تالاپ ەتۋدە.
تابيعات قاھارى تولاستاماي تۇر
جاپونيادا بولعان «تالاس» تايفۋنىنىڭ زاردابى ءالى تولىق ەڭسەرىلگەن جوق. سەكۋندىنا 30 مەتر جىلدامدىقپەن سوققان داۋىل مەن قالىڭ نوسەردىڭ كەسىرىنەن جولدار بۇزىلىپ, سەل جۇرگەن ەدى. كەيبىر وزەندەر ارنالارىنان اسىپ كەتكەن.
قازىر تايفۋننىڭ لاڭىنان 50-دەن استام ادامنىڭ قازا بولىپ, 55 ادامنىڭ ءىز-ءتۇزسىز جوعالىپ كەتكەنى بەلگىلى بولىپ وتىر. ونداعان ەلدى مەكەندەر ءالى كۇنگە سۋ ءجۇرىپ كەتكەن جولداردىڭ ورتاسىندا قالىپ, ولارمەن بايلانىسقا شىعۋ قيىنداعان. قايىرىمدىلىق كومەكتەرى اۋە جولدارى ارقىلى جەتكىزىلىپ, قورشاۋداعى جانداردى اجالدان قۇتقارۋدا. جاپون حالقى وزدەرىنە بيىل قانداي قارعىستىڭ تيگەنىن بىلە الماي دال.
قىسقا قايىرىپ ايتقاندا:
*ماسكەۋدىڭ مانەج الاڭىندا بىلتىر 5 مىڭداي ادام قاتىسقان توبەلەس اشىپ, بۇزاقىلىق جاساعان توبىردىڭ باسشىلارىنا سوت پروتسەسى باستالدى. بەس ادامنان تۇراتىن ولار «درۋگايا روسسيا» وپپوزيتسيالىق بىرلەستىگىنىڭ مۇشەلەرى ەكەن.
*گااگا حالىقارالىق تريبۋنالى يۋگوسلاۆيانىڭ باس شتابىنىڭ بۇرىنعى باستىعى م.پەرشيچتى 27 جىلعا باس بوستاندىعىنان ايىرۋ تۋرالى ۇكىم شىعاردى. ول س.ميلوشەۆيچتىڭ وڭ قولى بولىپ جۇرگەندە 13 رەت قاساپتى قىلمىستاردى ۇيىمداستىرۋعا قاتىسىپتى.
*جاپونيانىڭ جاڭادان تاعايىندالعان پرەمەر-ءمينيسترى يوسيحيتو نودا رەسەي فەدەراتسياسىنىڭ پرەزيدەنتى د.مەدۆەدەۆپەن تەلەفون ارقىلى سويلەسكەن. وندا «سولتۇستىك اۋماقتاردىڭ» پروبلەماسىن تەزىرەك شەشۋ ەكى جاققا دا ءتيىمدى ەكەندىگى ايتىلسا كەرەك.
*فرانتسيا پرەزيدەنتى ن.ساركوزيدىڭ رەيتينگى سوڭعى كەزدە ءوسىپ, ونى قولداۋشىلار ۇلەسى 37 پايىزعا دەيىن ارتقان. ونىڭ سەبەبىن ماماندار فرانتسۋزداردىڭ كوبى پرەزيدەنتتىڭ م.كاددافيگە قارسى جاساعان ارەكەتتەرىن قولداۋىنان, ەل بيۋدجەتى تاپشىلىعىنىڭ تومەندەۋىنەن جانە ايەلى ك.برۋنونىڭ ەكىقابات بولعاندىعىنان دەپ وتىر.
ينتەرنەت ماتەريالدارى نەگىزىندە ازىرلەندى.