بۇگىن ۇكىمەتتىڭ كەڭەيتىلگەن وتىرىسىندا نۇرسۇلتان نازارباەۆ وبلىس ورتالىقتارىندا ازىق-ت ۇلىكتىڭ قورىن ساقتاۋ ءۇشىن ۇلكەن قويمالاردى سالماعان اكىمدەردى سىنعا الدى.
«اكىمدەرگە ايتايىن دەگەنىم, وبلىستاردىڭ ورتالىقتارىندا ءونىم ساقتايتىن قويمالار جوق. كووپەراتيۆتەر الىپ كەلگەن ونىمدەرىن قايدا جەتكىزەدى. باياعىدا ازىق-ت ۇلىكتىڭ قورىن ساقتاۋ ءۇشىن وبلىستاردا ۇلكەن قويمالاردىڭ قۇرىلۋى تۋرالى تاپسىرىلدى. كەيبىرىندە وسىنداي قويمالار بار, ال قالعاندارىندا جاساقتالماعان. كووپەراتيۆتەر جۇمىس ىستەۋى ءۇشىن ۇلكەن قوردى جينايتىن قويمالار بولۋى كەرەك. ال قازىر قالاي جۇمىس ىستەيدى؟ ولاردىڭ دۇكەندەرى جوق», - دەپ اتاپ ءوتتى پرەزيدەنت.
وسى ورايدا ەلباسى كووپەراتيۆتەر ءتيىستى دەڭگەيدە جۇمىسقا كىرىسسە, قازىرگى كەزدە تولىق قۋاتىندا جۇمىس ىستەمەي تۇرعان ءسۇت جانە ەت زاۋىتتارى جەتكىلىكتى كولەمدە قامتاماسىز ەتىلەتىنىن اتاپ ءوتتى.
ۇكىمەتتىڭ كەڭەيتىلگەن وتىرىسى بارىسىندا قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ 2016 جىلى ءسۇت ونىمدەرى جانە ءىرى قارا مال ەتىن ازىرلەۋ باعىتتارى بويىنشا 157 كووپەراتيۆ قۇرىلعانىن جەتكىزدى. ۇستىمىزدەگى جىلى قۇرىلاتىن كووپەراتيۆتەر سانى ەكى ەسەگە ارتادى دەپ كۇتىلۋدە.
«كووپەراتيۆتەر ءونىمدى دايارلاۋ, ساقتاۋ, تاسىلماۋمەن, سونداي-اق ۆەتەريناريا, جەم-ءشوپ دايارلاۋ, اگرارلىق حيميا قىزمەتتەرىن جۇزەگە اسىرادى. جالپى, كووپەراتيۆتەر اۋىلدى ارى قاراي دامىتۋدىڭ نەگىزى بولۋى ءتيىس», - دەدى مىرزاحمەتوۆ.