«امانات» قوعامدىق سىيلىعى ەلىمىزدىڭ الەۋمەتتىك-ەكونوميكالىق ءارى قوعامدىق ومىرىنە ەلەۋلى ۇلەس قوسقان جانە قىزمەتى جاسامپاز ەڭبەككە, يگىلىك پەن اقىل-پاراساتقا نەگىزدەلگەن جالپى ادامزات قۇندىلىقتارىن نىعايتۋعا كومەكتەسەتىن ادامداردى كوتەرمەلەۋگە ارنالعان. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا «ادامداردىڭ ەلەۋلى جەتىستىكتەرى» قوعامدىق قورىنىڭ پرەزيدەنتى زاۋرە بەيسوۆا ءمالىم ەتتى.
ونىڭ ايتۋىنشا, قور ءوز جۇمىسىن جۇيەلەندىرۋ ءۇشىن تۇراقتى دامۋ قاعيدالارىن ىلگەرىلەتۋ بويىنشا «امانات» باعدارلاماسىن ازىرلەۋ تۋرالى باستاما كوتەرىپ, «امانات» قوعامدىق سىيلىعىن ۇيىمداستىردى.
«سىيلىقتى الۋعا ۇمىتكەرلەردى ۇكىمەتتىك ەمەس ۇيىمدار ۇسىنادى. سىيلىق «بابالار اماناتى», «شىنار», «بەكزات», «ارىس», «قاينار», «دەگدار», «جىگەر» نوميناتسيالارى بويىنشا بەرىلەدى», – دەپ اتاپ ءوتتى ز.بەيسوۆا.
سونداي-اق ول قوعامدىق سىيلىقتى تاعايىنداۋ بويىنشا بايقاۋ بۇگىننەن باستالعانىن جاريا ەتتى.
«بايقاۋ باستالدى. ال اقپان-ماۋسىم ارالىعىندا بايقاۋدىڭ وڭىرلىك كەزەڭدەرىن الەۋمەتتىك مارافون تۇرىندە وتكىزۋدى ۇسىنامىز. بيىلعى جىلدىڭ 1 مامىرىنا دەيىن وتىنىمدەر قابىلدانادى. وتىنىمدەر وبلىستار, رەسپۋبليكالىق ماڭىزى بار استانا جانە الماتى قالالارىنداعى قوعامدىق كەڭەستەر نەگىزىندە قۇرىلعان ۇيىمداستىرۋشى كوميتەتىنە بەرىلەدى», – دەدى قوعامدىق قور پرەزيدەنتى.
ايدار ورىسباەۆ, "ەگەمەن قازاقستان".