ەكونوميكانىڭ وسۋىنە اسەر ەتكەن باستى فاكتورلاردىڭ ءبىرى ينۆەستيتسيالىق بەلسەندىلىكتىڭ ارتۋى بولدى. نەگىزگى كاپيتالعا قۇيىلعان ينۆەستيتسيالار كولەمى 5,1 پايىزعا ءوسىپ, 7,7 تريلليون تەڭگەنى قۇرادى. بۇل تۋرالى بۇل تۋرالى بۇگىن قر پرەزيدەنتى نۇرسۇلتان نازارباەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى. ونىڭ ايتۋىنشا, 2016 جىلى قازاقستاننىڭ جالپى ىشكى ءونىمىنىڭ ءوسىمى 1 پايىزدى قۇرادى.
"2016 جىل جاڭا سىرتقى جانە ىشكى جاعدايلارعا بەيىمدەلۋ تۇرعىسىنان ەكونوميكا ءۇشىن كۇردەلى بولدى. ەنەرگيا رەسۋرستارىنا باعانىڭ قۇبىلۋى جوعارى بولعاندىقتان جانە تۇتىنۋشىلىق بەلسەندىلىك تومەندەگەندىكتەن ەكونوميكالىق بەلسەندىلىك باياۋلادى. ەگەر وتكەن جىلدىڭ العاشقى بەس ايى ىشىندە جالپى ىشكى ءونىمنىڭ تومەندەۋى بايقالسا, ءسىزدىڭ باستاماڭىزبەن قابىلدانعان «نۇرلى جول» مەملەكەتتىك باعدارلاماسى مەن داعدارىسقا قارسى جوسپار شەڭبەرىندەگى شارالاردىڭ ارقاسىندا ەكىنشى جارتىجىلدىقتان باستاپ ءوسۋ قايتا جانداندى. 2016 جىلدىڭ قورىتىندىسى بويىنشا جالپى ىشكى ءونىمنىڭ ءوسۋى ءبىر پايىزدى قۇرادى", - دەدى مينيستر.
ونىڭ ايتۋىنشا, وزىق ءوسىم ديناميكاسىن مىنا سالالار كورسەتتى: قۇرىلىس سەكتورى 7,9, اۋىل شارۋاشىلىعى سەكتورى 5,5, كولىك سالاسى 3,8 پايىز. ەكونوميكاداعى تاۋار ءوندىرىسىنىڭ ۇلەسى 36,6 پايىزدى, قىزمەت كورسەتۋ ۇلەسى 57,8ز پايىزدى قۇرادى.
«تاۋ-كەن ءوندىرۋ ونەركاسىبى ءۇشىن كۇردەلى جىل بولعانىنا قاراماستان, وندەۋ ونەركاسىبىنىڭ ءابسوليۋتتى ءوسۋى, سول سياقتى جالپى ىشكى ءونىم قۇرىلىمىنداعى ۇلەسىنىڭ ءوسۋى دە وڭ فاكتور بولىپ تابىلادى. اتالعان ۇلەس 2015 جىلعى 10,3 پايىزدان جىل قورىتىندىسى بويىنشا 10,7 پايىزعا دەيىن ۇلعايدى. اۋىل شارۋاشىلىعىنىڭ ۇلەسى 4,9 پايىزعا دەيىن (2015 جىلى 4,7%) , قۇرىلىستىڭ ۇلەسى 6,4 پايىزعا دەيىن(2015 جىلى 6,0%) ءوستى», - دەدى ول.
سونىمەن قاتار شەت ەلدىك تىكەلەي تارتىلعان ينۆەستيتسيا 9 ايدا 12,3 ملرد دوللاردان اسىپ, 2015 جىلدىڭ سول ۋاقىتىمەن سالىستىرعاندا 4,5 ەسە كوبەيگەن.
«سونىڭ ىشىندە ەاەو ەلدەرىنەن كەلەتىن ينۆەستيتسيا كولەمى 47% (579,3 ملن دوللار) كوبەيدى. بۇل ەلگە تارتىلعان جالپى قاراجاتتىڭ 4 پاىزىن قۇرايدى», دەدى مينيستر.