ءومىر ونەرمەن ورنەكتەلەدى. قازاق تابيعاتىندا ونى ءومىر جورگەگىنە بالايتىنىمىز بار. بۇل تۇرعىدا ءتول ءمادەنيەتىمىزدىڭ مايەگىنە اينالعان كوكشەتاۋعا قاراتىپ قۇرمەت سەزىمدەرى مەن لەبىزدەرىن اقتاراتىنىمىز ايقىن. وراق ءتىلدى شال اقىننان بەرى قايتارىپ سويلەگەننىڭ وزىندە, ايگىلى اقان سەرى, ءبىرجان سال, ورىنبايدىڭ رۋحاني داڭعىلىمىزداعى دارابوز جولىن ءدۇيىم جۇرت ماقتان ەتەدى. ءداۋىر جولى جالعاسىپ كەلەدى. ءبۇگىنگى كۇنى ونەر كەمەسىن ورگە ءسۇيرەگەندەر قاتارىندا تۇنىق بۇلاقتاي ءبىرجان سال اتىنداعى كوكشەتاۋ مۋزىكالىق كوللەدجى مەملەكەتتىك مەكەمەسىن بولەكتەپ ايتۋعا بولار ەدى.
وسىدان تۋرا 35 جىل بۇرىن قۇرىلعان وقۋ ورنى كوكشەنىڭ مادەني-مۋزىكالىق ومىرىنە ايرىقشا وقيعا رەتىندە قوسىلدى. العاشقى ديرەكتور ەلىمىزدىڭ ايتۋلى ازاماتى ماناربەك بەكسەيىتوۆ جۇمىسقا بىلەك سىبانا كىرىستى. سول كەزدەگى مۋزىكا ۋچيليششەسىنە 26 ادام قابىلدانىپ, پيانينو, دومبىرا, بايان جانە ۇرلەمەلى اسپاپتار كلاسىندا ساباق الدى. ىزدەنىمپاز باسشى كەلەسى جىلى ديريجەرلىك-حور, ىشەكتى اسپاپتار جانە ءان بولىمدەرىن اشۋعا قول جەتكىزدى. جاس ۇجىمنىڭ قالىپتاسۋ كەزەڭىندەگى ۇمىتىلماس اسەر ءالى كۇنگە سۋىماعانى تاڭ قالدىرادى. ەڭ ءبىرىنشى اعىل-تەگىل قۋانىشتى رەسپۋبليكالىق جاس ورىنداۋشىلار كونكۋرسىنىڭ ديپلومانتى بولات ءامينوۆ الىپ كەلدى. بۇل پەداگوگ كادرلاردىڭ كاسىبي بىلىكتىلىگىنىڭ وسكەندىگىن, كوكشەنىڭ ءداستۇرلى جانە اكادەميالىق ونەر ارناسىنىڭ كەڭىگەندىگىن ايقىندايتىن, سونىمەن بىرگە, بولاشاق كۇندەردىڭ جارقىندىعىنا سەنىم ۇيالاتقان جەڭىس ەدى.
كوكشە تۇلەكتەرى ەلىمىزدىڭ جوعارى وقۋ ورىندارى مەن الماتى كونسەرۆاتورياسىندا باق سىناپ جاتتى. بۇل جولدىڭ دا جەمىستى ەكەندىگىن اتاپ ءوتكەن ءلازىم. قازىرگى كوللەدج وقىتۋشىلارىنىڭ ديرەكتور قايىرلى سارسەنباەۆتان باستاپ تۇگەلگە دەرلىگى تۋعان ۇياسىندا ەڭبەكتەنىپ جاتقان ازاماتتار. ولاردىڭ قاتارىندا ب.ءامينوۆتىڭ, ز.سالىقوۆانىڭ, ە.بالاپاەۆانىڭ, ج.جاعىپاروۆانىڭ, ل.سوروكينانىڭ, ا.اۋباكيروۆانىڭ, گ.گورباننىڭ, ا.ەسمۇرزەنوۆانىڭ ەسىمدەرى جۇرتشىلىق اراسىندا زور ىلتيپاتپەن اتالادى. جالپى, مۇندا كوللەدجدىڭ ءۇشىنشى ۇرپاق بۋىنى جۇمىس ىستەپ جاتقانى كەز كەلگەنگە ۇلگى بولارلىق جاعداي. ە.سۋحوۆوي, ر.جۇمانوۆا, س.مۇحامەدياروۆ, ە.ۋستيۋگوۆا, د.ءبىرجانوۆ, ە.مۋسايپوۆا, ە.كۋتسەنكولار جاڭا لەپتىڭ وكىلدەرى دەسەك, ارتىق ايتقاندىق ەمەس.
كوللەدجدىڭ اينالاسىنان بالعىندار شاتتىعى, اۋەلەگەن ءان, كلاسسيكالىق مۋزىكا اۋەنى, دومبىرا مەن قوبىز ءۇنى تىنىمسىز قالىقتاپ, تولقىندانىپ جاتادى. قوس قاباتتى عيماراتتان ءومىر ءنارى شالقىپ جاتقانداي اسەرگە بولەنەتىنىڭىز انىق. بۇل ۇجىمداعى 47 وقىتۋشىنىڭ تىنىمسىز دا قاجىرلى ەڭبەگىنىڭ بايراعى بيىكتەگەنىنەن دەرەك بەرەدى. ولاردىڭ قىزمەتى پاندىك-تسيكلدىك باعىتتا بىرىكتىرىلگەن. ساباقتار فورتەپيانو جانە ۇرلەمەلى اسپاپتار, ءان, حور ديريجەرلىگى, مۋزىكا تەورياسى, جالپى ءبىلىم ءپاندەرىنەن ءتالىم تاراتادى. كوپ جىلداردان بەرى ز.سالىقوۆا جەتەكشىلىك ەتەتىن پەداگوگيكالىق تاجىريبە سەكتورىنىڭ جۇمىسى دا جەمىستى. ونىڭ شاكىرتى داريعا تاڭاتاروۆا رەسپۋبليكالىق جاس مۋزىكانتتار بايقاۋىنىڭ لاۋرەاتى اتاندى.
كوللەدج ديرەكتورى قايىرلى ءسارسەنباەۆ پەداگوگتار تاراپىنان وقۋ ورنى مەن ودان تىسقارى جەرلەردە ۇلكەن كولەمدەگى ادىستەمەلىك جۇمىستار اتقارىلىپ جاتقانىن ايتادى. اتالعان ۇجىم كۇشىمەن قازاقستاندا تۇڭعىش رەت «نەمىس مادەنيەتى جانە يوگان باحتىڭ شىعارماشىلىعى» اتتى حالىقارالىق ادىستەمەلىك كونفەرەنتسيا ءوتكىزىلگەن. سوڭعى جىلدارى وقۋ ورنىنىڭ كونتسەرتتىك قىزمەتى بەلسەندى ەكپىن الۋدا. كوللەدج ونەرپازدارى وبلىستاعى مادەني شارالاردىڭ ۇيىتقىسىنا اينالىپ, مەكتەپتەر مەن بالالار باقشاسىنىڭ شاتتىق شىرايىن اشا ءتۇستى. بۇگىنگى تاڭدا كوللەدج جانىندا مۋزىكا مەكتەبى, بالالاردىڭ ەسترادا ستۋدياسى, بالالار-ءجاسوسپىرىمدەر حورى جۇمىس ىستەيدى. اقمولا وبلىسىنىڭ بارلىق ونەر ۇجىمدارىن جوعارى بىلىكتى كادرلارمەن قامتاماسىز ەتىپ وتىرعان كوللەدج جەر-جەرلەردە بالالار مۋزىكا مەكتەبى تۇرىندەگى فيليالدارىن ۇيىمداستىرا باستاعانى دا قۇپتارلىق جاعداي.
كوللەدجدەگى ونەر ۇيالارى جونىندە كەڭىنەن اڭگىمەلەۋگە بولادى. ونەر جاناشىرى بوريس لاگودا ۇيىمداستىرعان سيمفونيالىق وركەستردىڭ داڭقى وبلىس اۋماعىنان تىسقارى جەرلەرگە دە ءمالىم. ءبىز ونىڭ تابىستارى مەن جەتىستىكتەرىن تىزبەلەمەي-اق, وسى ونەر ۇجىمىنىڭ نەگىزىندە كوكشەتاۋدىڭ ۇلكەن سيمفونيالىق وركەسترى قالىپتاسقانىن قۋانا حابارلاعىمىز كەلەدى. رەپەرتۋارلىق تۇتقاسى مەن جانرلىق ەرەكشەلىگى كۇردەلى وركەستر بيىل ءوزىنىڭ وتىز جىلدىعىن اتاپ وتپەك.
ءبىرجان سال اتىنداعى كوللەدجدى جيىرما جىل باسقارعان, قازاقستاننىڭ ەڭبەك سىڭىرگەن قايراتكەرى ماناربەك بەكسەيىتوۆ قازاق حالىق اسپاپتارى وركەسترىن قۇرعان بولاتىن. ول ۇجىمنىڭ وزىندىك ورىنداۋشىلىق ءداستۇرىن قالىپتاستىرۋدا كوپ ەڭبەك ءسىڭىردى. مارقۇم وركەسترگە ارنالعان شىعارمالاردى دا ءوزى جازىپ وتىرعانىن جاقسى بىلەمىز. سونداي-اق, ماناربەك قاسىم ۇلىنىڭ «كوكشەتاۋ مارشى» ونەر ورداسىنىڭ مۋزىكالىق ءانۇرانى رەتىندە اسقاقتاتىپ شىرقاۋدا. رەسپۋبليكالىق بايقاۋلاردىڭ بىرنەشە دۇركىن جەڭىمپازى اتانعان وركەستر ۆەنگريا, پولشا كورەرمەندەرىنىڭ دە ريزاشىلىعىنا ءبولەندى. ايتۋلى ازاماتتار ا.قۇلاحمەتوۆتىڭ, بۇگىنگى جەتەكشى تۇرلىقوجا بازاروۆتىڭ باسشىلىعىنداعى ۇلت اسپاپتارى وركەسترى ماسكەۋدەگى «دوستىق شۇعىلاسى» فەستيۆالىنىڭ ديپلومىمەن ماراپاتتالىپ, «وترادنوە» مادەني كەشەنى مەن «روسسيا» كونتسەرت زالىندا ونەر كورسەتكەنى ۇلكەن مەرەي سانالادى.
تۇنىق بۇلاق ونەر كەمەسى ۇنەمى ورگە جۇزۋدە. قازىرگى تاڭدا كوللەدج تۇلەكتەرىن وبلىستاعى بارلىق ونەر ۇجىمدارى مەن مادەني-اعارتۋ مەكەمەلەرىنەن كوپتەپ كەزدەستىرەسىز. ءتىپتى, ماسكەۋ, ۋفا, ماري, استانا, الماتى ساحنالارىنىڭ شەبەرلەرى اتانعاندار دا بار. ال دينا قابىكەەۆا ك.بايسەيىتوۆا اتىنداعى وپەرا جانە بالەت تەاترىنىڭ ءانشىسى, دارەن عىلىموۆ استاناداعى ۇلت اسپاپتار وركەسترىنىڭ ديريجەرى, گۇلنارا باشاەۆا قازاق ۇلتتىق مۋزىكا اكادەمياسى بالالار حورىنىڭ ديريجەرى, گالينا پوتانينا سۆەشنيكوۆ اتىنداعى اكادەميالىق حوردىڭ ءسوليسى بولىپ جەمىستى قىزمەت اتقارۋدا. تالانتتى جاستار ر.حۋسيتدينوۆا ۇرلەمەلى اسپاپتار حالىقارالىق بايقاۋىنىڭ, اعايىندا ساكەن جانە داۋرەن ءبىرجانوۆتار, ناتاليا ميزيۋك «شابىت» بايقاۋىنىڭ لاۋرەاتتارى, ەدۋارد سوروكين پاريجدە وتكەن حالىقارالىق كونكۋرستىڭ, ۆلاديمير كامەرلوحەر «تروفەي يۋگوسلاۆي» كونكۋرسىنىڭ ديپلومانتتارى اتاندى. كوللەدجدە قازاقتىڭ ۇلتتىق حالىق اسپاپتارى شەبەرحاناسى جۇمىس ىستەيتىنى دە جاقسى ۇمىتتەردى جەتەكتەيدى.
بيىلعى وقۋ جىلىندا كوللەدجدى 32 تۇلەك بىتىرسە, سونىڭ وتىزى ەلورداداعى ۇلتتىق مۋزىكا اكادەمياسىنا, قۇرمانعازى اتىنداعى مەملەكەتتىك كونسەرۆاتورياعا گرانتپەن ءتۇسىپ وتىر.
باقبەرگەن امالبەك, كوكشەتاۋ.
سۋرەتتەردە: كوللەدج ديرەكتورى ق.سارسەنباەۆ وقۋ-تاربيە ءىسىن جوسپارلاۋدا; كوللەدج ومىرىنەن كورىنىستەر.