ۇكىمەتتىڭ كەڭەيتىلگەن وتىرىسىندا پرەزيدەنت نۇرسۇلتان نازارباەۆ ۇلتتىق بانكتىڭ توراعاسى دانيار اقىشەۆتى تولىقتاي قولدايتىنىن ءبىلدىردى.
«وتكەن جىل وتە اۋىر بولعانىنا قاراماستان, ۇلتتىق بانك جاقسى جۇمىس ىستەدى. ەندى بانكتىڭ مۇمكىندىكتەرىن زاڭ ارقىلى كۇشەيتۋدى تاپسىرىپ وتىرمىن. وسىنداي قۇقىق بەرۋ كەرەك. ۇلتتىق بانكتىڭ جۇمىسىنا كيلىگۋدى ەلدىڭ قارجى سالاسىنا كيلىگۋ دەپ ساناپ جازالاۋ كەرەك. كورىپ وتىرمىن, ۇلتتىق بانك تارتىپكە كەلتىرگەن سايىن ۇلتتىق بانكتىڭ توراعاسىنا شابۋىل كۇشەيىپ جاتىر. مۇنى وسى زالدا وتىرعان اكتسيونەرلەر مەن دەمەۋشىلەر جاساۋدا» دەدى نۇرسۇلتان نازارباەۆ. ول رەتكە كەلتىرۋگە كەدەرگى جاساۋشىلارعا شارا قولدانىلاتىنىن ايتتى.
ال اقىشەۆقا «ەشكىمنەن قورىقپا. ەشكىمنەن. كىم دە كىم كەدەرگى جاسايتىن بولسا, ماعان فاميلياسىن ايت» دەدى.
بۇدان بۇرىنىراقتا ۇلتتىق بانك دانيار اقىشەۆتىڭ ۇستالعانى تۋرالى سىبىس تاراتۋعا بايلانىستى قۇقىق قورعاۋ ورگاندارىنا ارىزداناتىنىن حابارلاعان بولاتىن.