وبلىس ورتالىعىندا جۇمىسپەن قامتۋ ورتالىعى ءوز جۇمىسىن باستادى. بۇل ورتالىقتىڭ باستى مىندەتى «جۇمىسپەن قامتۋ-2020» باعدارلاماسىنا سايكەس تۇرعىنداردى وقىتۋ جانە جۇمىسپەن قامتاماسىز ەتۋ بولىپ تابىلادى.
اتالمىش ورتالىق ءۇش باعىت بويىنشا جۇمىس جاسايدى. ءبىرىنشى باعىتى ەڭبەك نارىعىنداعى جۇمىسسىز, ءوزىن ءوزى جۇمىسپەن قامتاماسىز ەتۋشى, از قامتاماسىز ەتىلگەن ادامداردى وقىتۋدى جانە جۇمىسقا ورنالاستىرۋدى كوزدەيدى. ەكىنشى باعىت اۋىلدىق اۋماقتاردا كاسىپكەرلىكتى دامىتۋدى قولداۋ, جەكە كاسىبىن اشۋ ارقىلى تۇرعىنداردىڭ ەكونوميكالىق بەلسەندىلىگىن ارتتىرۋدى ۇيىمداستىرۋ بولىپ تابىلادى. ءۇشىنشى باعىت ەڭبەك قورلارىنىڭ ۇتقىرلىعىن ارتتىرۋعا, ياعني اتالعان ەكى باعىتتان ءوتكەننەن كەيىن جالداما ەڭبەك ەتۋشى نەمەسە ناقتى جەكە كاسىبى جوق قاتىسۋشىلارعا ارنالعان.
ورتالىق ديرەكتورى قارلىعاش ابدۋللينانىڭ ايتۋىنشا, بيىل كاسىبي دايارلاۋ, قايتا دايارلاۋ كۋرستارىنا, بىلىكتىلىگىن ارتتىرۋعا 1000-نان اسا ادام قابىلداندى. باعدارلامانىڭ ءبىرىنشى باعىتى بويىنشا بيىلعى جىلى بارلىعى 1351 ادام جۇمىسپەن قامتىلادى. قازىردىڭ وزىندە ورتالىققا جاستاردان وتىنىشتەر كوپتەپ تۇسۋدە.
فاريدا بىقاي, پاۆلودار.