قازاقستان جاستارى كونگرەسىنىڭ قازاقستان رەسپۋبليكاسى
پرەزيدەنتىنىڭ حالىققا ارناعان جولداۋىن قولداۋ جونىندەگى
ۇندەۋى
بۇگىنگى كۇندە قازاقستان جاستارى ازاماتتىق قوعامنىڭ تولىق قۇقىقتى, تالاپتى جانە جاۋاپتى سۋبەكتىسىنە اينالعان. جاستار ءۇشىن كوپتەگەن باعدارلامالار ىسكە اسىرىلۋدا. جىل سايىن مىڭداعان جاس مامان – جوعارى وقۋ ورىندارى مەن كوللەدج تۇلەكتەرى ەل ەرتەڭىن ەڭسەلەندىرۋگە ۇلەس قوسۋدىڭ جاڭا مۇمكىندىكتەرىنە يە بولۋدا. مۇنىڭ بارلىعى – ەلباسىمىزدىڭ كورەگەن ساياساتىنىڭ جەمىسى. قازاقستان جاستارىنىڭ كونگرەسى ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنداعى باستامالارىن تولىقتاي قولدايتىنى تۋرالى مالىمدەيدى. 25 جىل ىشىندە قارقىندى ءارى ماقساتتى دامىعان قازاقستان الەم ساحناسىندا بەدەلدى ورىنعا يە بولدى. بۇل جەتىستىك – العاشقى ەكى جاڭعىرۋ كەزەڭدەرىنىڭ ناتيجەسى. ول جىلداردا جاستار ەلىمىزدىڭ تابىستارىندا ماڭىزدى ءرول اتقاردى. پرەزيدەنت ءوزىنىڭ جولداۋىندا ەلىمىزدىڭ دامىعان مەملەكەتتەردىڭ قاتارىنا قوسىلۋىنا مۇمكىندىك بەرەتىن مىناداي ماڭىزدى باعىتتارعا ەكپىن ءتۇسىردى. ولار – ەكونوميكانى قارقىندى تۇردە تەحنولوگيالىق جاڭعىرتۋ; ءداستۇرلى نەگىزگى سالالاردى دامىتۋ; ەڭبەك نارىعىن جاڭعىرتۋ; ماكروەكونوميكالىق تۇراقتىلىق; ادامي كاپيتالدىڭ ساپاسىن كوتەرۋ; ينستيتۋتتىق تۇرلەندىرۋ, قاۋىپسىزدىك, سىبايلاس جەمقورلىقپەن كۇرەس. قازاقستان جاستارىن بىرىكتىرۋشى جاستار ۇيىمى رەتىندە ءبىز پرەزيدەنت باستامالارى قازىرگى زامان تالاپتارىنا ساي دەپ سانايمىز. ەلىمىزدىڭ جاس بۋىنى ءۇشىن ءبىلىم, ەڭبەك نارىعى, اقپاراتتىق تەحنولوگيالاردىڭ دامۋى ماسەلەلەرى ەرەكشە ماڭىزدى. 2015 جىلى ەلباسىمىز «تەگىن كاسىبي-تەحنيكالىق ءبىلىم» جوباسىن ۇسىنعان بولاتىن. وسى جىلى اتالعان جوبا ءوزىنىڭ جاپپاي ىسكە اسىرىلۋ ساتىسىنا كوتەرىلەدى جانە كوپتەگەن ستۋدەنتكە ءوز جولىن تابۋىنا كومەكتەسەدى. سونىمەن قاتار, نۇرسۇلتان ءابىش ۇلى ەڭ الدىمەن ءبىلىم بەرۋ جۇيەسىنىڭ ءرولىن وزگەرتۋ قاجەت ەكەنىن بەلگىلەدى. «ءبىزدىڭ مىندەتىمىز – ءبىلىم ارقىلى ەكونوميكالىق ءوسۋ مودەلىنىڭ ورتالىق ءتۇيىنىن قالىپتاستىرۋ. وقۋ باعدارلامالارىن سىندارلى ويلاۋ, وزدىگىنەن اقپارات ىزدەۋ داعدىلارىن دامىتۋعا باعىتتاۋ قاجەت», دەدى ءوزىنىڭ جولداۋىندا ەلباسى. سونداي-اق, پرەزيدەنت ءىت-ءبىلىم, قارجىلىق ساۋاتتىلىقتى قالىپتاستىرۋ مەن پاتريوتتىق تاربيەنىڭ وزەكتىلىگىن اتاپ كورسەتتى. مۇنىڭ بارلىعى جاستاردىڭ بويىندا مەملەكەتىمىزدىڭ جاڭا دامۋ كەزەڭىندە قاجەتتى, ءومىر ءۇشىن ماڭىزدى جاڭا داعدىلار مەن قابىلەتتەردى قالىپتاستىرادى. ءبىلىم بەرۋ جۇيەسىندە ءىت-سالانىڭ قارقىندى دامۋى جانە مۇعالىمدەر بىلىكتىلىگىنىڭ جوعارىلاۋى قالا مەن اۋىل مەكتەپتەرىنىڭ اراسىنداعى ءبىلىم ساپاسىنىڭ ايىرماشىلىعىن ازايتۋعا سەپتىگىن تيگىزەتىنى ايقىن. جاس قازاقستاندىقتار ءۇشىن ەڭ ماڭىزدى ماسەلە – جۇمىسقا ورنالاسۋ ماسەلەسى. ەڭبەك نارىعىن جاڭعىرتۋ ماقساتىندا ەلباسىمىز ءوز جولداۋىندا جۇمىسكەرلەردىڭ جاڭا زامان سالالارىنىڭ ماماندىقتارىنا كوشۋى ءۇشىن قولايلى جاعدايلار جاساۋ مىندەتىن قويدى. وسىعان وراي, پرەزيدەنت ەڭبەكپەن قامتۋدىڭ جاڭا جول كارتاسىن ازىرلەۋ قاجەتتىگىن اتاپ كورسەتتى. مۇنداي جول كارتالارى جۇمىس بەرۋشىلەردىڭ جۇمىسسىزداردى قايتا دايىنداۋعا جانە جاڭادان جۇمىسقا ورنالاستىرۋعا مىندەتتەيدى. قازاقستان جاستارىنىڭ اتىنان ەلباسى جولداۋىنداعى باعىتتاردى تولىقتاي قولدايتىنىمىز تۋرالى مالىمدەيمىز! الەمنىڭ جاھاندانۋى بىزدەن جاڭا كوزقاراستار مەن جاڭا ەڭبەك نارىعىن تالاپ ەتەدى. ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى بىزگە «ماڭگىلىك ەل» ۇلتتىق يدەياسىنا جەتۋدە سەرپىندى قادام جاساۋعا, ەكونوميكالىق ءوسۋدىڭ جاڭا مودەلىن قالىپتاستىرۋعا, باسەكەلەستىك قابىلەتىمىزدى نىعايتۋعا جانە 2030 جىلى 30 دامىعان ەلدەر قاتارىنا قوسىلۋعا زور ىقپالىن تيگىزەتىنىنە سەنىمدىمىز. قازاقستان جاستارىنىڭ كونگرەسى