ماڭىزدى قادامدى بىرگە تالقىلادى

قاراعاندى وبلىسىنا پارلامەنت ءماجىلىسىنىڭ دەپۋتاتتارى ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ءتۇسىندىرۋ ماقساتىمەن كەلدى. حالىق قالاۋلىلارى – زاڭ­ناما جانە سوت-قۇقىقتىق رەفورما كوميتەتىنىڭ مۇشەسى نۇرلان ءابدىروۆ پەن «نۇر وتان» پارتيا­سى فراكتسياسىنىڭ مۇشەسى مەي­رام پىشەمباەۆ «Maker» جشس-ءنىڭ فيليالى – «قاراعاندى قۇيۋ-ماشينا جاساۋ» زاۋىتىنىڭ جۇ­مىسكەرلەرىمەن كەزدەستى. اڭگى­مە مەملەكەت باسشىسىنىڭ جول­داۋىندا كورسەتىلگەن دامۋدىڭ جاڭا كەزەڭىنە دايىندىق جاساۋ جۇمىستارى, سونىمەن قاتار, ەلبا­سىنىڭ بيلىك وكىلەتتىكتەرىن قايتا ءبولۋ جونىندەگى ۇندەۋىن تالقىلاۋدان باستاۋ الدى. – ءبىز بۇگىن, ەلباسىمىزدىڭ قازاقستان دامۋىنىڭ جاڭا باعىت­تارىن بەلگىلەپ بەرگەن جولداۋىنا بايلانىستى جانە سونىمەن بىرگە, قاڭتاردىڭ اياعىندا جاريالاعان ۇندەۋىنە قاتىستى قاراعاندى شاھارىنا ات باسىن بۇردىق. وسى ەكى ۇلكەن ماسەلە بويىنشا ءوڭىر تۇرعىندارىمەن كەزدەسىپ, ءتۇسىندىرۋ شارالارىن باستاپ كەتتىك. باستى بايقاعانىم, اتالعان باستامالاردى حالىق قولداپ وتىر. ويتكەنى, قازاقستان قوعامىن دامىتۋ – نەگىزگى ماقسات ەكەنىنە كوز جەتكىزۋدە, – دەدى ن.ءابدىروۆ. دەپۋتاتتار ەندى شەت اۋدانىنا جولعا شىقپاق. ەل­با­سىنىڭ «قازاقستان-2050» سترا­تە­گياسىندا ايقىنداعان ۇلكەن ماقسات – الەمدەگى ەڭ دامىعان مەم­لەكەتتەردىڭ وزىق وتىز­دىعىنا ەنۋ. وسى جولدا اۋىل شارۋا­شى­لىعى سالاسىن العا شىعا­رىپ, ۇساق شارۋالاردى كووپەرا­تيۆكە بىرىك­تىرۋ جوباسى اسا ماڭىزدى ەكەنى بەلگىلى. ەل سەنىمدىلەرى وسى جانە باسقا دا قوردالى ماسەلەلەردى وردالى كەڭەستە ورتاعا سالماق. اتالعان ءىس-شاراعا قاتىسقان جۇمىسكەرلەردىڭ ىشىندە زاۋىت­تاعى ينجەنەر-تەحنولوگ, ماشينا جاساۋ سالاسىنىڭ جاس ماما­نى شەرالى بەكبولاتوۆ كورە­گەن كوشباسشىنىڭ ۇلتتى ءبىر ماق­ساتقا بىرىكتىرۋ كەزەڭىندەگى كەزەكتى جولداۋىن بار ىنتا-ىقى­لاسىمەن وقىپ, تانىسقان ىنتالى مامان ەكەن. ول: «جاقىندا عانا زاۋىتىمىزعا چەحيادان جاڭا قۇرىلعى اكەلىندى. ءبىز بۇل زاۋىتقا تسيفرلىق-باعدارلامالىق زامان­اۋي قۇرىلعىلارعا باعدار­لاما جازۋ ءۇشىن مامان رەتىندە قا­بىل­داندىق. وسى سالا بويىنشا رەسەيدە ءبىلىم الدىم. ءوندىرىستى اۆتوماتتاندىرۋ ءوز كەزەگىندە زاۋىتتىڭ ونىمدىلىگىن ەڭ جوعارى دەڭگەيگە جەتكىزەدى دەپ ەسەپتەيمىن. ەلباسىمىزدىڭ جولداۋى ەلىمىزدىڭ قارىشتاپ دامۋىنا سەپتىگىن تيگىزەدى. جاستار ارتىلعان سەنىمدى تولىق اقتايدى دەپ سەنىم بىلدىرەمىن», – دەدى. حالىق قالاۋلىلارى قارا­عان­دىنىڭ شالعايداعى ەلدى مەكەن­دەرىن ءبىر اپتا كولەمىندە ارالاماق. ميراس اسان, «ەگەمەن قازاقستان» قاراعاندى