بيىل قار قالىڭ تۇسەدى دەپ كىم ويلاعان؟ وتكەن جىلدارى جاۋعان قاردىڭ مولشەرىنە ەسەپتەلگەن تەحنيكانىڭ دايىندىعى كوڭىلدەن شىقپادى. قاڭتار ايىنان سوڭ اقپان دا اشۋلى مىنەز تانىتىپ تۇر. شىعىستىڭ بەت قاراتپاس ۇسكىرىك ايازى مەن قالىڭ قارى قالانى دا, دالانى دا اۋرە-سارساڭعا سالدى. ماماندار بيىلعى قار بۇعان دەيىنگى جىلدارمەن سالىستىرعاندا الدەنەشە ەسە ارتىق تۇسكەن دەيدى. قازىر قالىڭ قاردىڭ كەسىرىنەن كولىك كەپتەلىستەرىنىڭ الدىن الۋ شارالارى ءبىرىنشى كەزەككە قويىلدى. دەسەك تە, قالالىق اۆتوموبيل جولدارى جانە كولىك قاتىناسى ءبولىمىنىڭ باستىعى يۋري پازىنا ومبى قاردىڭ الەگى وڭاي ەمەستىگىن جەتكىزدى. بۇگىنگە دەيىن ءۇش مەردىگەر مەكەمەنىڭ كۇشىمەن قالا اۋماعىنان 70 مىڭ تەكشە مەتر قار شىعارىلعان. قالا ىشىندەگى جولداردى تازالاۋعا كەتكەن قارجى ايىنا 60 ملن تەڭگەنى قۇرايدى. الايدا, جولدا كىسى بويىنداي قار ءالى ءۇيىلىپ جاتىر. جەكە تۇرعىن ءۇي سەكتورى دا ءبىرشاما پروبلەما تۋعىزىپ وتىر. ولار اۋلاداعى قاردى كوشەگە ءۇيىپ قويعانعا ۇيرەنىپ العان. بۇل ءوز كەزەگىندە جول بويىنداعى كولىك قاتىناسىنا كەدەرگى كەلتىرۋدە. وسىنىڭ ءبارى كوكتەمدە ەرىسە نە بولماق؟..
– جەكە سەكتوردا ءۇيى بار تۇرعىندارعا ەسكەرتكىمىز كەلەدى, – دەيدى يۋري پازىنا, – ءوزارا بىرلەسىپ, قاردى قالانىڭ سىرتىنا شىعارۋعا تىرىسىڭىزدار. كوشەگە ءۇيىپ تاستاماڭىزدار. «سەمەيدى كوگالداندىرۋ جانە اباتتاندىرۋ» كاسىپورنى 1 تەكشە مەترىنە 2,5 مىڭ تەڭگەدەن سىزدەرگە قاجەتتى تەحنيكا قىزمەتىن ۇسىنا الادى. ال مۇگەدەكتەر مەن جاعدايى تومەن وتباسىلارعا, زەينەتكەرلەرگە تەگىن كومەكتەسەمىز.
قار تازالاۋ جۇمىستارى دۇرىس جولعا قويىلماسا, اقپان ايىنىڭ سوڭىندا جەرگىلىكتى پوليتسيا ايىپپۇل سالۋدى باستاماق. بۇل – كاسىپكەرلىك نىساندارعا يەلىك ەتەتىن شاعىن جانە ورتا بيزنەس وكىلدەرىنە دە قاتىستى شەشىم. دەگەنمەن, قالا تۇرعىندارىنىڭ قار تازالاۋ جۇمىستارىنا كوڭىلدەرى تولماي وتىر. قالىڭ تۇسكەن قار, مۇزتايعاق... ءار ءتۇن سايىن جول تازالاۋعا 30 تەحنيكا, 100-گە جۋىق جۇمىس كۇشى جۇمىلدىرىلسا دا, جاعداي ءماز ەمەس.
– ءبىزدىڭ قالا ءۇشىن 30 تەحنيكا وتە از, – دەدى يۋري پازىنا, – سوڭعى بەس جىل ىشىندە قالاعا قار تازالايتىن تەحنيكا مۇلدە الىنباعان. قولدانىستاعى تەحنيكالاردىڭ توزىعى جەتتى. ءبىز قالا اكىمىنە جاڭا تەحنيكا ساتىپ الۋ ءۇشىن قىزمەتتىك حات جازدىق. قاردى تولىق تازالاۋعا قاجەتتى تەحنيكانى ساتىپ الۋعا 500 ملن تەڭگە كولەمىندە قارجى ءبولۋدى سۇراپ وتىرمىز.
ال ءاۋ باستا دۇرىس تازارتىلماعان قار قاتىپ, ەندى كوكتايعاق مۇزعا اينالدى. جاياۋ جۇرگىنشى دە, اۆتوكولىك يەلەرى دە مەزى بولىپ وتىر.
راۋشان نۇعمانبەكوۆا,
جۋرناليست