بۇل حاباردى وسىدان ەكى اي بۇرىن ەستىگەن بولاتىنبىز. سول كۇننەن باستاپ ويىن بالاسىنىڭ تاعدىرىنا الاڭداپ جۇرەتىنبىز. ماسەلە بىلاي بولعان. وتكەن جىلدىڭ 30 قاراشاسىندا اتباسار قالاسىنداعى 3 جاسار ءسابي وبلىستىق بالالار اۋرۋحاناسىنا وتە اۋىر حالدە جەتكىزىلگەن ەدى. ۇستىنە قايناپ تۇرعان ءبىر تەگەنە سورپانى توگىپ العان نۇرتاس قوزىبەك ۇلىنىڭ دەنەسى 80 پايىز كۇيىككە شالدىققان ەكەن.
دارىگەرلەر ءولىم اۋزىنداعى بالانى اجالدان اراشالاپ قالۋ ءۇشىن بارىن سالدى. كاسىبي بىلىكتىلىگى مەن تاجىريبەسى مول اق حالاتتى ابزال جاندار قيالعا سىيماس ەرلىك جاسادى. بالانىڭ دەنەسىنە تەرىنى الماستىرىپ سالۋعا بايلانىستى وننان استام پلاستيكالىق وتا جاسالدى. سونىڭ ناتيجەسىندە, كىشكەنتاي بالانىڭ ءومىرىن ساقتاپ قالدى. ەمدەۋشى دارىگەر پەتر رەدكوزۋبوۆتىڭ ايتۋىنشا, قازىر نۇرتاستىڭ جاعدايى بىرقالىپتى, كەشەندى وڭالتۋ شارالارى وڭ ناتيجەسىن بەرۋدە. ول جاقىن كۇندەرى ۇيىنە شىعاتىن بولادى.
ءبىز نۇرتاستىڭ اناسى ىرىسگۇلمەن اۋرۋحانا اۋلاسىندا تىلدەسكەن ەدىك.
– ءبىز ۇلىمىزدىڭ ءومىرىن ساقتاپ قالعان اقمولا وبلىستىق بالالار اۋرۋحاناسىنىڭ بارلىق دارىگەرلەرى مەن مەدبيكەلەرىنە شىن جۇرەكتەن العىسىمىزدى ايتامىز. كوزىمىزدەن بۇل-بۇل ۇشا جازداعان باقىتىمىز قايتا ورالدى. وتباسىمىز قۋانىش قۇشاعىندا. دارىگەرلەردىڭ جانقيارلىق ەرلىك ەڭبەگى, شيپالى قولدارى مەن مەيىرىم-شاپاعاتىنا ءدان ريزامىز. ولار بارشا بالالاردىڭ جارقىن بولاشاعىن قامتاماسىز ەتۋشىلەر رەتىندە قانداي قۇرمەتكە دە لايىقتى, – دەيدى باقىتتى انا.
باقبەرگەن امالبەك,
«ەگەمەن قازاقستان»
اقمولا وبلىسى