اتىراۋ وبلىسىندا اۋىل شارۋاشىلىعى قارقىندى دامىپ كەلەدى. مال سانى, ودان وندىرىلگەن ونىمدەر كولەمى ارتقانىمەن, شەشۋىن كۇتكەن ماسەلەلەر ءالى دە بار. قىزىلقوعا اۋدانىندا وبلىس اكىمى نۇرلان نوعاەۆتىڭ توراعالىعىمەن وتكەن كەڭەستە مال شارۋاشىلىعى توڭىرەگىندەگى تۇيتكىلدى جايتتار ايتىلدى.
شىنى كەرەك, الىستاعى اۋىل حالقى مەملەكەتتىك باعدارلامالاردىڭ يگىلىگى مەن قولجەتىمدىلىگى جايىندا بىلە بەرمەيدى. «سىباعا», «قۇلان», «التىن اسىق» باعدارلامالارى بويىنشا يساتاي, قۇرمانعازى, ماقات اۋداندارى مەن اتىراۋ قالاسى مال ساتىپ الۋ جوسپارىن ورىنداماعان. مۇنى ءوڭىر باسشىسى ناسيحات پەن اقپاراتتىڭ ازدىعىمەن بايلانىستىرادى.
قىزىلقوعا اۋدانى اۋىل شارۋاشىلىعىن ورىستەتۋگە قولايلى مەكەن. الايدا, ءتورت ت ۇلىك مال اراسىندا جۇقپالى دەرتتىڭ ازايماي وتىرعانى الاڭداۋشىلىق تۋعىزادى. ءوتكەن جىلى «جاسقايرات» جاۋاپكەرشىلىگى شەكتەۋلى سەرىكتەستىگىندە 635 باس قوي پاستەرەللەز اۋرۋىنان ءولدى. تايسويعان اۋىلىندا برۋتسەللەزگە شالدىققان 47 باس ءىرى قارا, 507 باس قوي-ەشكى مالى تۇگەلدەي جويىلدى. اۋدان اكىمى ماقسوت مۇقانوۆ مال باسىنىڭ وسۋىنە برۋتسەللەز ىندەتىنىڭ كەرى اسەر ەتىپ وتىرعانىن جاسىرمادى. «جىل سايىن مىڭعا جۋىق مال جۇقپالى دەرتكە شالدىعادى. اۋرۋدىڭ الدىن الۋ جۇمىستارى ءالى ناتيجە بەرمەي كەلەدى», دەدى ول.
مال اۋرۋىنا بايلانىستى تاعى ءبىر دەرەك, وتكەن جىلى مۇنايلى ايماقتا 6 912 باس ءىرى قارا نودۋليارلى دەرماتيت دەرتىنە شالدىققان ەدى. بۇرىن-سوڭدى ەلىمىزدە كەزدەسپەگەن ىندەتتەن 1150 باس مال ءولدى. بۇل دەرتتىڭ سەبەبىن ماماندار اۋا رايىنىڭ ىستىق بولۋىنا وراي قان سورعىش جاندىكتەردىڭ تىم كوبەيۋىمەن ءتۇسىندىردى. ءالى كۇنگە دەيىن اتالعان اۋرۋمەن اۋىرىپ شىققان جانۋارلاردىڭ ۆيرۋس تاسىمالداۋشى رەتىندەگى قاۋپى اشىق ماسەلە بولىپ تۇر.
وبلىستىق ۆەتەريناريا باسقارماسىنىڭ باسشىسى نۇرباي ءابدىراحمانوۆتىڭ ايتۋىنشا, اۋرۋعا شالدىققان جانۋارلاردى ەمدەۋ ءۇشىن 5 ملن تەڭگەگە جۋىق قارجى بولىنگەن. سونداي-اق, 785 ادامعا ولگەن مالدارى ءۇشىن وتەماقى تولەندى. ال ناۋرىز ايىنان باستاپ ءىرى قارا مالعا اۋرۋعا قارسى ەكپە جۇرگىزىلەدى.
باقىتگۇل باباش,
«ەگەمەن قازاقستان»