كەڭ دالىزگە قويىلعان كورمەنىڭ كەرمەسىنەن جىلقى كوردىم. «ات جاقسىسى – كەرمەدە, سۋرەت جاقسىسى – كورمەدە». «سايگ ۇلىك سەمانتيكاسى» سەرياسى توپتاماسىنداعى سۋرەتتەر سويلەپ قويا بەردى. مايلى بوياۋمەن سالىنعان سۋرەتتەردە ءتۇرلى وبرازعا تولى تۇلپارلاردى كورۋگە بولادى. «قوندىگەر» كارتيناسىندا جىلقى مەن بالا باستارىن ءتۇيىستىرىپ, ءۇنسىز ۇعىنىسقان. «بۇلا مەن بۇلدىرىق», «قىركۇيەك», «كۇدەر», «جاسىرىنباق», «قاراجال تولقىنى», «قىز الىپ قاشۋ» كارتينالارى سىر ساندىق سياقتى.
ساز ونەرىنە ارنالعان «اۋەن» توپتاماسىندا سۋرەتشى جەڭىس كاكەن ۇلى سىبىزعى مەن قوبىز تارتىپ وتىرعان قازاق قىزىنىڭ جان دۇنيەسىن اشىپ كورسەتكەن. ۇلتتىق كيىمدە, توقپاقتاي بۇرىمدى قازاق قىزى ارقىلى سالت-ءداستۇرىمىزدى, ونەرىمىزدى ناسيحاتتاعان. «ماحاببات ءمۇيىسى» – ايلى تۇندە سىرلاسقان قىز بەن جىگىتتىڭ سۇلباسىن بەينەلەۋ ارقىلى رومانتيكاعا تولى جاستىق شاقتىڭ جاراسىمدى شاقتارىن اسەم بەينەلەيدى.
بەلگىلى سۋرەتشى جەڭىس كاكەن ۇلىنىڭ شىعارماشىلىق كەشىن ۇيىمداستىرعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «كاۋسار» مادەني-تانىمدىق بىرلەستىگىنىڭ جەتەكشىسى كەنجەعالي مىرجىقباەۆ كورمە ۇيىمداستىرىپ قانا قويماي كەشتى سۇحبات-ديالوگ رەتىندە جالعاستىردى.
اباي اتىنداعى قازپي-ءدىڭ كوركەمسۋرەت, گرافيكا فاكۋلتەتىن ءبىتىرىپ, اۋىلىنا ات باسىن بۇرعالى تۇرعان جەڭىستى پوەزيا پاديشاسى فاريزا وڭعارسىنوۆا دارىنىن باعالاپ, ءوزى رەداكتورلىق ەتكەن «پيونەر» (اقجەلكەن) جۋرنالىنا جۇمىسقا شاقىرادى. جەڭىس كاكەن ۇلىنىڭ العاشقى ەڭبەك جولى, جەمىستى جىلدارى ايگىلى اقىن اپاسىنىڭ شاپاعاتىنان باستاۋ الىپتى. 1988 جىلدان بەرى ەلىمىزدەگى كورمەلەرگە, تۇركيا, اقش, گەرمانيا كورمەلەرىنە قاتىسقان. امەريكا ەلىنەن «قالا كورىنىستەرى» اتالىمى بويىنشا «التىن قىران» مەدالىنە يە بولدى. جەڭىس كاكەن ۇلى سۋرەتشىلەر تۋرالى جازىلعان «اق زەر» كىتابىنىڭ اۆتورى.
كەش يەسىنىڭ «ونەر مەن ءۇشىن تۇتاس. سۋرەت سالعاندا ءان مەن كۇيدى جانىما سەرىك ەتەمىن. كۇن سايىن تەرىڭدى توكپەسەڭ, قولىڭ كەتە باستايدى» دەپ ايتقان سوزدەرى كەزدەسۋگە كەلگەن جاستارعا ۇلكەن وي سالدى.
قىلقالامىنا قامبار اتا ءتولىن ارقاۋ ەتكەن جەڭىس جىلقىنىڭ قادىر قاسيەتىنە تەرەڭ توقتالىپ, «قازاق جىلقىعا قارىزدار» دەيدى.
جۇلدىز تويبەك