ءبيدى بيلەسە ءۇندى ەلىنىڭ ۇل-قىزدارى بيلەسىن... كەز كەلگەن كينوسىندا ك ۇلىپ تۇرسا دا, جىلاپ تۇرسا دا مىڭ بۇرالىپ جۇرتتى ءۇيىرىپ الا جونەلەدى. ايتەۋىر, وسىناۋ ىستىق ەلدىڭ بيگە دەگەن ىقىلاسى, قۇرمەتى تىم ەرەكشە. كەزىندە «بيلە, بيلە» دەگەن كينو شىعارىپ, جاستاردى جاپپاي بيلەتىپ جىبەرگەن دە وسى ەل عوي.
ەندەشە, بيدەن بايگە بەرمەيتىن ۇندىستانعا بارىپ ءبىزدىڭ ۇل-قىزدار ونەرىمەن تاڭعالدىرا الۋى مۇمكىن بە؟ مۇمكىن ەكەن. ناعىز تالانتتار قايدا جۇرسە دە توپ جارادى عوي. جامبىل وبلىسىنداعى «اق كەربەز» ءانسامبلىنىڭ 8 ءبيشىسى جاقىندا ءۇندىستاننىڭ نيۋ-دەلي, چەنناي, كالكۋتتا, گۋۆاحاتي, شيللونگ جانە پورت-بلەر قالالارىندا ونەر كورسەتىپ قايتتى.
– ول جاقتاعى جۇرت بي ونەرىنە شىنىندا وتە قاتتى ءمان بەرەدى ەكەن, – دەيدى ءانسامبلدىڭ حورەوگرافى ايجان قونارباەۆا. – ايتەۋىر, قايدا بارساڭ دا زال, الاڭ تولى كورەرمەن. التى بي بيلەدىك. ءار ءبيدىڭ اراسىندا قازاقستان تۋرالى, قازاقتاردىڭ سالت-ءداستۇرى تۋرالى روليكتەر كورسەتىلىپ تۇردى. پورت-بلەر قالاسىنا بارعانىمىزدا ۇيىمداستىرۋشىلار لەد-ەكران تاپپاي, كونتسەرت ەكى ساعاتقا كەشىگىپ باستالدى. بىراق بىردە-ءبىر كورەرمەن قولىن سىلتەپ كەتىپ قالعان جوق. قورىتىندى كونتسەرتىمىز نيۋ-دەلي قالاسىندا ءوتتى. بىزبەن بىرگە باسقا دا شەت مەملەكەتتەردەن جانە ءۇندىستاننىڭ وزىنەن كەلگەن بىرقاتار بي ۇجىمدارى ونەرلەرىن كورسەتتى. قازاقتىڭ بي ونەرىن مويىنداعانى بولار قورىتىندى كونتسەرتتى قازاق بيشىلەرى اشتى. ولارعا, اسىرەسە, «قاراجورعا» ءبيى مەن ۇلتتىق كيىمدەرىمىز قاتتى ۇنادى.
ارينە, «اق كەربەز» شاعىن عانا ونەر ۇجىمى عوي. بىراق جات جەردە قازاقتىڭ جاقسى اتىن ايگىلەپ, ونەرىن مويىنداتىپ, العىسىن العان وسىناۋ ۇل-قىزداردان اينالىپ كەتپەيسىڭ بە!
ورالحان ءداۋىت,
«ەگەمەن قازاقستان»