«باياعى جارتاس – ءبىر جارتاس» دەمەكشى, قازاقستان ۇلتتىق قۇراماسى تاعى دا ۇتىلدى. ءبىزدىڭ قۇراما ەندى جەڭىلىستەر سەرياسىن سىرت الاڭدا جالعاستىرا باستاعان سياقتى. اۋەلى انادولى ەلىنەن ۇتىلىپ, اپشەرون تۇبەگىنە بارعان بەرانەكتىڭ كومانداسى باكۋدە ازەربايجان قۇراماسىمەن كەزدەسكەن ەدى. بۇل جولى دا 3:2 ەسەبىمەن جەڭىلىپ قالدى.
وسى ويىندى ازەريلەر استانادا ءبىزدىڭ ەلىمىزدەن جەڭىلگەننەن كەيىن ەسە قايتارۋ ءۇشىن ءۇش ايدان بەرى كۇتتى. سول ەسەنى قايتارۋ ءۇشىن كوپ ەڭبەكتەنىپ, كوپ كۇش جۇمسادى. اقىر سوڭىندا ازەربايجاننىڭ نامىسقا تىرىسقان فۋتبولشىلارى موكيننىڭ قاقپاسىنا ءۇش دوپ سوعىپ, ەسەنى قايتارىپ الدى. بۇل كەزدەسۋدە الاڭ يەلەرىنىڭ جەڭىسكە جەتۋ ىقتيمالدىعى مول بولعانىن ايتۋ كەرەك. الايدا, كەشەگى ءتۇركيامەن بولعان ويىننان كەيىن ۇلتتىق قۇرامامىز ازەربايجانمەن كەم دەگەندە تەڭ وينايتىن شىعار دەپ كۇتكەن ەدىك. ودان اسىرىپ ايتساق, كەيبىرەۋلەرىمىزدىڭ ىشىمىزدە ويىندا ءبىر دوپ ايىرماشىلىعىمەن جەڭىسكە جەتەمىز بە دەگەن دامە بولعانى دا جاسىرىن ەمەس. دەگەنمەن, ويلاۋ ءبىر باسقا دا, ويىن ءبىر باسقا ەكەنىن كەشەگى كەزدەسۋ كورسەتىپ بەردى.
بۇل ماتچتا الدىمەن الاڭ يەلەرى بەلسەندىلىك تانىتىپ, شابۋىلعا شىقتى. ازەربايجاننىڭ جارتىلاي قورعاۋشىسى ۆاگيف دجافادوۆ پەن باسقا دا ويىنشىلارى سول قاپتالدان ءبىزدىڭ ايىپ الاڭىمىزعا كەلىپ, كۇتپەگەن جەردەن سوققى جاساپ, قاۋىپتى جاعدايلار تۋعىزىپ وتىردى. ودان كەيىن ءبىزدىڭ جىگىتتەر دە قارسى شابۋىلعا شىعىپ, الىستان اگاەۆ قورعاعان قاقپانى نىساناعا الىپ تۇردى. مۇندا سەرگەي گريدين مەن سەرگەي وستاپەنكو بىرىنەن سوڭ ءبىرى قاقپانى ءدالدەگەنىن ايتۋ كەرەك. الايدا, كامران اگاەۆ بىرنەشە مارتە دوپتى قايتارىپ, قاقپاسىن قورعاپ قالدى.
ويىننىڭ ءبىرىنشى جارتىسى وسىلاي الما-كەزەك شابۋىلدارمەن جالعاسىپ جاتقان كەزدە ورتالىق الاڭدا جامبىل كوكەەۆ وڭ قاپتالدان اشىلعان الەكساندر كيروۆقا ادەمى پاس بەردى. سول كەزدە ول قاقپانىڭ الدىندا اشىلعان سەرگەي وستاپەنكوعا اۋەلەتىپ دوپ بەرگەندە, سوڭعىسى ونى نىساناعا ءدال كوزدەدى. ەسەپ – 1:0. وسى گولدان كەيىن ءبىز مانادان بەرى شابۋىل جاساپ, موكيننىڭ قاقپاسىنا مازا بەرمەگەن الاڭ يەلەرىنىڭ نە ىستەرلەرىن بىلمەي ساسقالاقتاپ قالعانىن كوردىك. بىراق ولار تەز ەستەرىن جيىپ, قايتادان ءبىزدىڭ قاقپاعا ءبىرشاما قاۋىپتى سوققىلار جاساپ ۇلگەردى. ماتچتىڭ ءبىرىنشى جارتىسى وسىلاي اياقتالدى.
ەكىنشى تايمعا ازەربايجان كومانداسى ويىنعا تىڭ ويلارمەن, جاڭاشا كوزقاراسپەن شىعىپ, 10 ءمينوتتىڭ ىشىندە ەسەپتى تەڭەستىرىپ كەتتى. گولدىڭ اۆتورى راۋف اليەۆ نىسانانى باسپەن ءدال كوزدەدى. وسىدان كەيىن ويىنداعى جىلدامدىقتارىن ارتتىرعان الاڭ يەلەرى كۇتپەگەن جەردە ءبىزدىڭ قاقپاعا 11 مەترلىك ايىپ دوبىن سوعۋ ءمۇمكىندىگىنە يە بولدى. ونى ماحير شۋكيۋروۆ ادەمى ورىنداپ, كومانداسىن العا شىعاردى. ال ءبىزدىڭ موكين بولسا, تاعى دا ءتۇركيامەن ويىنداعىداي قاقپانىڭ وڭ بۇرىشىنا سەكىرىپ, سول بۇرىشقا تەپكەن دوپتى ۇستاي المادى. ازەربايجان قۇراماسىندا ءۇشىنشى گولدىڭ اۆتورى مانادان بەرى موكينگە مازا بەرمەگەن ۆاگيف دجاۆادوۆ اتاندى.
ماتچتىڭ بىتۋىنە 13 ءمينوت قالعاندا ميحايل روجكوۆتىڭ ورنىنا الاڭعا ۆيتالي ەۆستيگنەەۆ شىعىپ, دوپقا اياق تيگىزگەنى سول ەكەن, الىستان ەشكىم كۇتپەگەن گول سوقتى. بۇل ءبىزدىڭ كوماندانىڭ سوڭعى ەكى ويىندا سوعىلعان ەكىنشى ادەمى گولى بولدى. وسىدان كەيىن ۇلتتىق قۇراما قالعان ۋاقىتتا ەسەپتى تەڭەستىرۋگە ءبىرشاما ارەكەتتەنىپ كوردى. بىراق ازەربايجاندىقتار ەسەپتى تەڭەستىرۋگە ەش مۇمكىندىك بەرمەدى.
جاڭا باپكەردىڭ كەلۋىمەن ۇلتتىق قۇرامانىڭ ويىنى ءبىرشاما جاقسارعانىن دا ايتۋ كەرەك. چەح مامانى ءبىزدىڭ قۇراماعا جاڭاشا ءتارتىپ, جاڭاشا ويلاۋ, ءوزىنىڭ تاكتيكالىق ادىستەرىن اكەلدى. سونىمەن بىرگە, ول رەسەي جانە باسقا ەلدەردە وينايتىن فۋتبولشىلار قۇراما ءۇشىن جان الىسىپ, جان بەرىسىپ ويناماسا, ولاردىڭ ويىندارىنان باس تارتاتىنىن اشىق ايتتى. جاقىندا بەرانەك رەسەيدىڭ «امكار» كلۋبىنىڭ جارتىلاي قورعاۋشىسى الەكسەي پوپوۆتى ەندىگارى ۇلتتىق قۇراماعا شاقىرمايتىنىن كەسىپ ايتقان كورىنەدى. بۇل – وتە دۇرىس شەشىم. ەلى ءۇشىن نامىسقا تىرىسپايتىن ويىنشى ابىروي اكەلمەيتىنى باسى اشىق ءجايت.
قازاقستان قۇراماسىنىڭ ەندى ەكى ويىنى قالدى. اۋەلى سىرت الاڭدا بەلگيامەن كەزدەسىپ, سوڭىنان ءوز الاڭىمىزدا اۆستريامەن وينايمىز.
ەندى 6 قىركۇيەك كۇنى بولعان باسقا ويىندارعا كەلسەك, ۆ توبىندا رەسەي مەن يرلانديا اراسىنداعى ويىن – 0:0, ماكەدونيا – اندوررا – 1:0, سلوۆاكيا – ارمەنيا – 0:4 بولىپ اياقتالدى. باسقا ماتچتار مىناداي ەسەپپەن ءتامامدالدى. س توبىندا يتاليا – سلوۆەنيا – 1:0, سەربيا – فارەر ارالدارى – 3:1, ەستونيا – سولتۇستىك يرلانديا – 4:1, D توبىندا رۋمىنيا – فرانتسيا – 0:0, ە توبىندا سان-مارينو – شۆەتسيا – 0:5, G توبىندا انگليا – ۋەلس – 1:0, ن توبىندا يسلانديا – كيپر – 1:0, ءى توبىندا يسپانيا – ليحتەنشتەين – 6:0, شوتلانديا – ليتۆا – 1:0.
داستان كەنجالين.