بۇگىن قاراعاندى وبلىسى اكىمىنىڭ تاپسىرماسىنا ساي, ءوڭىر باسشىسىنىڭ ورىنباسارى اندرەي لياپۋنوۆ تەمىرتاۋ قالاسىنىڭ جىلۋ ماۋسىمىنا دايىندىق بارىسى كوتەرىلگەن كەڭەس وتكىزدى, دەپ حابارلادى وبلىس اكىمىنىڭ ءباسپاسوز قىزمەتى.
جەس-2 جۇمىسىندا اقاۋلاردىڭ ورىن الۋىنا بايلانىستى مەتاللۋرگتەر قالاسىنىڭ تۇرعىندارىنا جىلۋ دۇرىس بەرىلمەي كەلدى.
«سىزدەر ۇكىمەت توراعاسى تاراپىنان سىن ايتىلعانىن بىلەسىزدەر. وسىدان ەكى كۇن بۇرىن وبلىس اكىمى ستانتسيانى ارالاپ, ناقتى تاپسىرمالار بەرگەن بولاتىن. ولاردىڭ ورىندالۋى مەرزىمى بۇگىن, ياعني 30 جەلتوقسان كۇنى اياقتالدى. ايماق باسشىسىنىڭ تاپسىرماسى ويداعىداي ورىندالعانىنا كۋا بولىپ وتىرمىز. قازىر تەمىرتاۋلىقتاردىڭ ۇيلەرى جىلىنعان, 4 قازاندىق جۇمىس ىستەپ تۇر, رەزەرۆتە تاعى ەكى قازاندىق بار. قازىرگى تاڭدا جىلۋ بەرۋ قالىپقا تۇسكەن», – دەدى ا.لياپۋنوۆ.
وسىدان سوڭ «ارسەلورميتتال تەمىرتاۋ» اق جوندەۋ جۇمىستارى جونىندەگى ديرەكتورىنىڭ, جىلۋمەن قامتۋ ۇيىمى ديرەكتورىنىڭ جانە قالا اكىمدىگىنىڭ تەمىرتاۋ قالاسىنداعى جىلۋ ماۋسىمىن وتكەرۋ جونىندەگى ەسەپتەرى تىڭدالدى.
جەس-2-دە 4 جىلىتۋ قازاندىعى (№3,4,5,6) جۇمىس ىستەۋدە, ال 2 قازاندىق رەزەرۆتە. سىرتتاعى اۋا تەمپەراتۋراسىنا سايكەس ستانتسياداعى تەمپەراتۋرا رەجيمى 80/500 س گرافيگى بويىنشا جۇمىس ىستەيدى. №1 قازاندىق جۇمىس ىستەپ تۇر. رەجيمدىك كارتاعا سايكەس 31 جەلتوقسان كۇنى قوسىمشا جۇمىس ىستەۋگە قاجەتتى جىلۋمەحانيكالىق پارامەترلەردى قالىپتاستىرۋ باستالعان. قازىرگى تاڭدا بۋدىڭ قىسىمى 45 كس*س/سم2 قۇراپ وتىر, تەمپەراتۋرا - 250 0س.
«جىلىتۋ ماۋسىمىن ويداعىنداي وتكەرۋ ءبىزدىڭ باستى مىندەتىمىز. تەمىرتاۋ قالاسىنىڭ 90 % تۇرعىنى جىلۋدى جەس-2-دەن الادى. الدا مەرەكەلىك كۇندەر كەلە جاتىر. سوندىقتان دا قالا تۇرعىندارى كوممۋنالدىق قىزمەتتىڭ بارلىق تۇرىمەن تولىق قامتىلۋى كەرەك. ايماق تۇرعىندارىن ساپالى جىلۋىمەن قامتاماسىز ەتۋ – جىلۋمەن قامتۋ مەكەمەلەرىنىڭ قۇزىرىندا», – دەپ اتاپ ءوتتى وبلىس اكىمىنىڭ ورىنباسارى.
قازىرگى تاڭدا تەمىرتاۋ قالاسىنىڭ تۇرعىندارى تاراپىنان جىلۋدىڭ جوقتىعىنا شاعىمدانۋشىلار جوق. وبلىس اكىمدىگىنىڭ ءباسپاسوز قىزمەتى باق وكىلدەرىمەن بىرگە 80 كوپ پاتەرلى تۇرعىن ۇيلەردى ارالاپ, 50-گە تارتا وتباسىمەن كەزدەزتى, تۇرعىندار اراسىنا ساۋالناما جۇرگىزدى. باستى ساۋال «ۇيلەرىڭىز جىلى ما؟». تۇرعىنداردىڭ ايتۋىنشا پاتەر تەمپەراتۋراسى قالىپقا كەلىپ, 24-29 گرادۋستى كورسەتىپ تۇر.
«بىزدە سوڭعى ءۇش كۇندە جىلۋ قالىپتى بەرىلۋدە. بۇعان دەيىن مۇلدەم جىلۋ بولماعان. باتارەيالار تاستاي سۋىق بولدى, بولمە تەمپەراتۋراسى 13 گرادۋسقا دەيىن تومەندەپ كەتتى. ال قازىر مىنە, وزدەرىڭىز دە كورىپ تۇرعاندارىڭىزداي 22-24 گرادۋس», – دەيدى قالا تۇرعىنى تاتيانا سادۆاكاسوۆا.
قالا تۇرعىندارىن جىلۋمەن قامتاماسىز ەتۋ بەكىتىلگەن پارامەترلەر بويىنشا جۇزەگە اسۋدا. جالپى العاندا قالانى جىلۋمەن قامتاماسىز ەتۋ شتاتتىق رەجيمدە جۇزەگە اسىرىلۋدا.
قايرات ءابىلدينوۆ,
«ەگەمەن قازاقستان»