«لەستەر سيتي» – اپل چەمپيونى
كلاۋديو رانەري جاتتىقتىراتىن "لەستەر سيتي" ءوز تاريحىندا العاش رەت انگليا پرەمەر-ليگاسىنىڭ چەمپيونى اتاندى. 2015/16 ماۋسىمىندا انگليا پرەمەر-ليگاسىنىڭ اۋىسۋىنا ەكى تۋر قالعاندا «چەلسي» مەن «توتتەنحەم» اراسىندا وتكەن ماتچ 2:2 ەسەبىمەن اياقتالىپ, لەستەرلىكتەردىڭ چەمپيون اتانۋىنا سەپتىگىن تيگىزدى. وتكەن ماۋسىمدا اعىلشىننىڭ دەرجاۆا كوماندالارىندا دا بىرقاتار وزگەرىستەر بولدى. ماۋسىم ايىندا «ليۆەرپۋل» باس باپكەرىن اۋىستىردى. «مانچەستەر يۋنايتەدتىڭ» جاعدايى كوماندا باپكەرى سەر الەكس فەرگيۋسەن كەتكەلى وڭالمادى. «مانچەستەر سيتي» جوعارى دەڭگەيدە ونەر كورسەتە المادى. ال «ارسەنال» ماۋسىم بارىسىندا جىبەرگەن قاتەلىكتەرىنەن سوڭ جەڭىس تۇعىرىنا كوتەرىلە الماي, ەكىنشى ورىندى قاناعات تۇتتى. «لەستەر ءسيتيدىڭ» جالعىز قارسىلاسى «توتتەنحەم» بولاتىن. بىراق لوندوندىقتار, ءتىپتى, ەكىنشى ورىندارىنان دا ايىرىلىپ قالدى. مىنە, وسىلايشا «لەستەر سيتي» قارسىلاستارىنىڭ قاتەلىكتەرىن ءتيىمدى پايدالانا ءبىلىپ, مامىر ايىندا چەمپيوندىق كۋبوكقا قول جەتكىزدى. سونىمەن قاتار, «تۇلكىلەردىڭ» شابۋىلشىسى دجەيمي ۆاردي 11 ماتچ قاتارىنان گول سوعىپ, ايگىلى رۋد ۆان نيستەلرويدىڭ رەكوردىن جاڭارتتى.«رەال» – چەمپيوندار ليگاسىنىڭ جەڭىمپازى
مادريدتىك ۇجىم ءۇشىن ماۋسىم ويداعىداي باستالا قويعان جوق. كارلو انچەلوتتيدىڭ ورنىنا كەلگەن رافاەل بەنيتەس كورولدىك كلۋبتى دۇرىس باسقارا المادى. سوراقاسى سول يسپانيا كۋبوگىنىڭ 1/16 فينالىندا «كاديس» كومانداسىنا قارسى ويىندا ديسكۆاليفيكاتسيا العان دەنيس چەرىشەۆتى الاڭعا شىعارعانى ءۇشىن جارىستان شەتتەتىلدى. بۇعان قوسا, ءوز الاڭدارىندا ەجەلگى قارسىلاسى «بارسەلونادان» 0:4 ەسەبىمەن ويسىراي ۇتىلعانى تاعى بار. جانكۇيەرلەر تاراپىنان ءجيى سىنعا ۇشىراعاندىقتان قاڭتار ايىنىڭ باسىندا «رەال» پرەزيدەنتى فرانتسيالىق زينەدين زيداندى باس باپكەر ەتىپ تاعايىندادى. مىنە, وسىدان كەيىن مادريدتىكتەردىڭ ويىنىنا جان ءبىتىپ, بۇرىنعى قالپىنا قايتا كەلدى. فۋتبولشى رەتىندە جانكۇيەرلەرىنىڭ ىستىق ىقىلاسىنا بولەنگەن زيدان باپكەر رەتىندە دە ۇلكەن جەتىستىكتەرگە جەتتى. يسپانيا چەمپيونى اتاعى مەن ەل كۋبوگىن «بارسەلونادان» الا الماسا دا كىل مىقتىلار ايقاساتىن چەمپيوندار ليگاسىندا جەڭىسكە جەتتى. فينالدا ولار «اتلەتيكونى» 1:1 (پەنالتي 5:3) ەسەبىمەن ۇتىپ, كۋبوكتى تاريحىندا 11-مارتە جەڭىپ الدى. ال ەۋروپا ليگاسىنىڭ يەگەرى اتانعان «سەۆيليامەن» ۋەفا سۋپەركۋبوگىندا كەزدەسىپ, 3:2 ەسەبىمەن باسىم ءتۇستى. سونىمەن قاتار, جاقىندا كلۋبتار اراسىنداعى الەم چەمپيوناتىندا دا شوقتىعى بيىك بولدى. ستاتيستيكالىق مالىمەتتەرگە سۇيەنەر بولساق, زيدان كەلگەلى «رەال» نەبارى ەكى ويىندا عانا جەڭىلىس تاپقان.امەريكا كۋبوگى
امەريكا كۋبوگىنىڭ 100 جىلدىق مەرەيتويىنا وراي مەرزىمىنەن بۇرىن ۇيىمداستىرىلعان تۋرنيردە چيلي كومانداسى كەزەكتى رەت جەڭىسكە جەتتى. 2015 جىلى ءدال وسى ءتۋرنيردىڭ فينالىندا چيليدەن, 2014 جىلى الەم چەمپيوناتىنىڭ اقتىق ويىنىندا گەرمانيادان ۇتىلعاننان كەيىن ليونەل مەسسي باستاعان ارگەنتينا ۇلتتىق قۇراماسى و باستان-اق فاۆوريت رەتىندە ەسەپتەلگەن. بىراق فۋتبولدىڭ قىزىعى سول - كىمنىڭ چەمپيون بولاتىنىن الدىن الا بولجاپ ءبىلۋ مۇمكىن ەمەس. فينالدىق ويىن ءدال 2015 جىلعىداي ءوربىدى. كەزدەسۋدىڭ نەگىزگى ۋاقىتى مەن وۆەر-تايمدا ەسەپ اشىلماي, پەنالتي سەرياسىندا ارگەنتينالىقتار تاعى دا ءمۇلت كەتتى. ارگەنتينامەن باعى جانباعان ليونەل مەسسي ۇلتتىق قۇرامادا مانسابىن اياقتاعانى تۋرالى مالىمدەگەن. بىراق تۋعان ەلىنە دەگەن سۇيىسپەنشىلىگىنىڭ ارقاسىندا ارادا بىرەر اي وتپەستەن «البيسەلەستە» ۇجىمىنا قايتا ورالدى.ەۋروپا چەمپيوناتى
ءتورت جىلدا ءبىر رەت ۇيىمداستىرىلاتىن ءدۇبىرلى دودا بيىل فرانتسيادا ءوتتى. پورتۋگاليا قۇراماسى ءوز تاريحىندا العاش رەت چەمپيون اتاندى. 2008 جىلدىڭ قىركۇيەگىندە ۋەفا اتقارۋشى كوميتەتىنىڭ شەشىمىمەن ەۋرو 2016-دان باستاپ قاتىسۋشى كوماندالار سانى 24-كە كوبەيەتىن بولىپ شەشىم قابىلدانعان ەدى. مىنە, ءدال وسى شەشىم پورتۋگالدارعا وراسان زور پايداسىن تيگىزدى. سەبەبى, توپتىق كەزەڭدە 3-ورىن العاندارىمەن, قوسىمشا ستاتيستيكاسىنا بايلانىستى پلەي-وفف كەزەڭىنە جولداما الدى. ەگەر بۇل جايت 2012 جىلى تىركەلگەندە تۋرنيرمەن توپتىق كەزەڭدە-اق قوشتاسار ما ەدى. جالپى العاندا, فەرناندۋ سانتۋش شاكىرتتەرى سىلبىر ويىنىمەن مۇنداي جەتىستىككە جەتەدى دەگەنگە سەنۋ قيىن بولاتىن. سەبەبى, توپتىق كەزەڭنىڭ ءۇش كەزدەسۋىندە دە تەڭ ەسەپ تىركەلدى. ال 1/8 فينالدا حورۆاتتارعا تەك 117-مينۋتتا جەڭىس گولىن سوقسا, شيرەك فينالدا پولياكتاردى پەنالتي سەرياسى ارقىلى ۇتتى. جارتىلاي فينالدا عانا ۋەلس قۇراماسىن نەگىزگى ۋاقىتتا ءارى سەنىمدى تۇردە 2:0 ەسەبىمەن ۇتتى. پاريجدە وتكەن تۋرنير يەلەرىنە قارسى ماتچ پورتۋگالدار ءۇشىن اسا اۋىر بولدى. كوماندانىڭ جۇگىن ارقالاعان كريشتيانۋ رونالدۋ العاشقى تايمنىڭ باسىندا-اق جاراقاتىنا بايلانىستى الاڭنان كەتۋىنە ءماجبۇر بولدى. بۇدان كەيىن قورعانىستا ساق ويناپ, بارىنشا جيناقىلىق تانىتتى. ال الاڭعا تىڭنان قوسىلعان ەدەر ەكسترا-تايمدا جالعىز گولدى سالىپ, ءوز ەلىنىڭ ەۋروپا چەمپيوناتىنداعى العاشقى جەڭىسىنە سەپتىگىن تيگىزدى. ءبىر ايتا كەتەرلىگى, يسلانديا قۇراماسىندا تانىمال ءبىر دە ءبىر ويىنشى بولماعانىنا قاراماستان ەۋروپانى ءدۇر سىلكىندىرىپ, ناعىز سەنساتسيا جاساي ءبىلدى. توپتىق كەزەڭنەن 5 ۇپايمەن پلەي-وفف كەزەڭىنە ءوتىپ, 1/8 فينالدا ازۋلى انگليانى 2:1 ەسەبىمەن ۇتتى. بىراق شيرەك فينالدا فرانتسۋزداردا 2:5 ەسەبىمەن ەسە جىبەردى.برازيليا ۇلتتىق قۇراماسى
«پەنتاكامپەوندەر» بيىل وليمپيادا ويىندارىنىڭ التىنىنا باسا ءمان بەردى. امەريكا كۋبوگى دوداسىنا تالانتتى فۋتبولشىسى نەيماردى قوسپاعانىنىڭ باستى سەبەبى دە وسى بولاتىن. ءوز ەلىندە وتكەن جارىستا برازيليالىقتار فينالدا گەرمانيانى 1:1 (پەنالتي 5:4) ەسەبىمەن ۇتىپ, تاريحىندا العاشقى التىن مەدالدارىنا قول جەتكىزدى. 27-مينۋتتا كوماندا كاپيتانى نەيمار ەسەپ اشسا, 59-مينۋتتا ماكسيميليانا مەيەرا تارازى باسىن تەڭەستىردى. ال پەنالتي سەرياسىندا تۋرنير قوجايىندارىنىڭ باعى جاندى.«شاپەكوەنسە»
قاراشا ايىنىڭ سوڭىندا جاھاندى ءدۇر سىلكىندىرگەن قايعىلى جاعداي بولدى. برازيليانىڭ «شاپەكوەنسە» كومانداسى مىنگەن ۇشاعى كولۋمبيا جەرىندە اپاتقا ۇشىرادى. چارتەرلىك رەيسكە مىنگەن 71 جولاۋشىنىڭ تەك التاۋى عانا امان قالدى. ونىڭ ۇشەۋى اتالعان كلۋبتىڭ ويىنشىلارى: الان رۋشەل, دجەكسون فولمان جانە حەليو سامپەر نەتو. حەليو سامپەرو نەتونىڭ جاراقاتى اۋىر ەمەس, جاقىندا الاڭعا قايتا ورالۋى مۇمكىن. اۋىر جاراقات العان الان رۋسشەل العاشىندا ج ۇلىنىنا زاقىم كەلگەندىكتەن العاشىندا سال اۋرۋىنا ۇشىراپ, مۇگەدەك ارباسىنا تاڭىلادى دەگەن اقپارات تاراعان. بىراق بىرەر اپتا بۇرىن قايىرىمدىلىق ماتچىندا الاڭعا شىقتى. ال قاقپاشى جاكسون فولماننىڭ وڭ اياعىنان ايرىلدى.«التىن دوپ»
ەۋروپانىڭ ۇزدىك فۋتبولشىلارىنا بەرىلەتىن ناگرادا 1956 جىلدان بەرى ۇيىمداستىرىلىپ كەلەدى. بيىل ءمادريدتىڭ «رەالىندا» ونەر كورسەتەتىن پورتۋگاليالىق كريشتيانۋ رونالدۋ «التىن دوپ» جۇلدەسىندە 745 ۇپايمەن جەڭىسكە جەتتى. France Football باسىلىمىنىڭ سىيلىعىنا بارلىعى 30 فۋتبولشى ۇمىتكەر اتانعان. جەڭىمپاز سپورت جۋرناليستەرى اراسىندا داۋىس بەرۋ ارقىلى انىقتالدى. وسىلايشا, 31 جاستاعى فۋتبولشى ءوز مانسابىندا ءتورتىنشى «التىن دوبىنا» قول جەتكىزىپ وتىر. ەكىنشى ورىنعا ارگەنتينالىق ليونەل مەسسي (316 ۇپاي) جايعاسسا, ۇشتىكتى «اتلەتيكو» كلۋبىنىڭ فورۆاردى انتۋان گريزمانن (198 ۇپاي) تۇيىندەدى. ايتا كەتەيىك, 2010-2015 جىلدار ارالىعىندا فيفا (حالىقارالىق فۋتبول فەدەراتسياسى) مەن فرانتسۋز باسىلىمى جىلدىڭ ۇزدىك ويىنشىسىن ۇلتتىق قۇرامالار كاپيتاندارىنىڭ, باس جاتتىقتىرۋشىلارىنىڭ, سونداي-اق جۋرناليستەردىڭ داۋىس بەرۋى ارقىلى انىقتاعان. ۇيىمداستىرۋشىلىق جۇمىستارىمەن اتالعان فەدەراتسيا اينالىسسا, ناگرادا «فيفا-نىڭ التىن دوبى» دەپ اتالعان. بيىل كەلىسىم ۋاقىتى اياقتالىپ, ءىس-شارانى France Football تولىعىمەن ءوز موينىنا الدى. دايىنداعان ايان ءابدۋالي