سۋردواۋدارما – سۇراۋى بار قىزمەت ءتۇرى

ماجىلىستە پالاتا توراعاسى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتات باقىتبەك سماعۇل پرەمەر-مينيستر باقىتجان ساعىنتاەۆقا دەپۋتاتتىق ساۋال جولداعان ەدى. وندا تومەندەگى ماسەلە كوتەرىلىپ, بىلاي دەلىنەدى: «مەنىڭ اتىما «اۋعان سوعىسى مۇگەدەكتەرىنىڭ قازاقستان رەسپۋبليكاسىنداعى قوعامىنىڭ» وكىلدەرى جۇگىندى. ولار ازىرلەگەن «ونلاين سۋردواۋدارما قىزمەتى» اعىمداعى جىلى «قازاقستاندا جۇزەگە اسىرىلىپ جاتقان ۇزدىك الەۋمەتتىك جوبالار» رەسپۋبليكالىق كورمە-كونكۋرسىندا ەڭ ۇزدىك الەۋمەتتىك جوبا بولىپ تانىلدى. بۇل جوبا مۇمكىندىگى شەكتەۋلى جاندار ءۇشىن مەملەكەتتىك ورگاندار قىزمەتتەرىنىڭ قولجەتىمدىلىگىن قام­تاماسىز ەتەدى. مەملەكەتتىك مەكەمەلەرگە سۋردواۋدارماشىلاردى ۇستاپ تۇرۋ قىمباتقا تۇسەدى. ونىڭ ۇستىنە, رەسپۋبليكادا ىمداۋ ءتىلى ماماندارىنا دەگەن تاپشىلىق بايقالۋدا. وسىنىڭ سالدارىنان زاڭناما تالاپتارىنىڭ بارلىعىنا قاراماستان, بارلىق مەنشىك نىساندارىنداعى ۇيىمدارعا ەستۋ بويىنشا مۇگەدەكتەردىڭ اقپاراتقا قولجەتىمدىلىگىن قامتاماسىز ەتۋ كوپ جاعدايدا مۇمكىن بولا بەرمەيدى. ال وتاندىق «ونلاين سۋردواۋدارما قىز­مەتى» ء(ارى قاراي «SURDO-ONLINE») يننو­ۆاتسيالىق ءونىمى بۇل پروبلەمانىڭ شەشى­مىنە اينالا الادى. ول ەستۋ قابىلەتىنەن ايى­رىلعان ازاماتتارعا كەز كەلگەن جەردە جانە ءدال كەرەك ۋاقىتتا كومپيۋتەر نەمەسە سمارتفون ارقىلى قاشىقتىقتان ساپالى سۋردواۋدار­ما ۇسىنادى. سۋردواۋدارمانى ديپلومى بار, بىلىكتى, اتتەستاتتاۋدان وتكەن ماماندار تاۋلىك بويى جۇزەگە اسىرادى. بۇل جوبانىڭ جۇمىسى قاراپايىم: ەستۋ بويىنشا مۇمكىندىگى شەكتەۋلى جان قىزمەت نەمەسە كومەك الۋ ءۇشىن كەلگەندە, مەملەكەتتىك مەكەمە پەرسونالى تەك ينتەرنەت ارقىلى «SURDO-ONLINE»-دى ىسكە قوسسا, جەتكىلىكتى. وپەراتورمەن بايلانىس ورناتىلعاننان كەيىن سمارتفوننىڭ نە كومپيۋتەردىڭ ەكرانىندا سۋردواۋدارماشى پايدا بولادى جانە ول مۇمكىندىگى شەكتەۋلى ادام مەن مەملەكەتتىك قۇرىلىم قىزمەتكەرى اراسىندا اۋدارما جاسايدى. بۇل الەۋمەتتىك جوبا, بىرىنشىدەن, بيۋدجەت قارجىسىن ۇنەمدەۋگە مۇمكىندىك بەرەدى. ەكىنشىدەن, «SURDO-ONLINE» باسشىلىعى ءوز قىزمەتىن كەڭەيتۋ ءۇشىن جۇمىسپەن قامتۋ ورتالىقتارى ارقىلى جولداناتىن ىمداۋ ءتىلى ماماندارىنا جاڭا جۇمىس ورىندارىن اشۋعا دايىندىعىن ءبىلدىرىپ وتىر. مەملەكەت باسشىسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىندا ۇكىمەت­تەن باستاپ, جەرگىلىكتى اكىمدەرگە دەيىنگى بار­لىق مەملەكەتتىك ورگاندارعا مۇگەدەكتەر بىر­لەس­تىكتەرىمەن جۇمىستى كۇشەيتۋدى جۇكتەگەن بولاتىن. بۇل رەتتە ەستۋ قابىلەتىنەن ايىرىلعان ازا­مات­تاردىڭ قوعامدىق بىرلەستىكتەرىن جانە ولار­دىڭ جوبالارىن قولداۋ باعىتىندا, ەلىمىزدە ەستۋ قابىلەتى شەكتەۋلى ادامداردى قوعامعا كىرىكتىرۋ ماسەلەسىن جۇزەگە اسىرۋعا ىقپال ەتسەڭىز. سەبەبى, بىرقاتار ەلدەردە, سونىڭ ىشىندە كورشى رەسەيدە ىمداۋ ءتىلىن وقىتۋشىلاردى جانە ىمداۋ ءتىلى اۋدارماشىلارىن دايارلاۋدى جانە قايتا دايارلاۋدى مەملەكەت قامتاماسىز ەتەدى. وسى ايتىلعانداردى ەسكەرە وتىرىپ, «SURDO-ONLINE» قىزمەتىن مەملەكەتتىك ورگانداردا ەندىرۋ مۇمكىندىگىن قاراستىرۋىڭىزدى سۇرايمىن».