اقتوبەدە زاماناۋي جابدىقپەن جاراقتاندىرىلعان ەكستروكورپارالدى ۇرىقتاندىرۋ ورتالىعى اشىلدى, دەپ حابارلادى وبلىس اكىمدىگى.
اقتوبەدە ايماقتاعى ءبىرىنشى ەكۇ ورتالىعى اشىلدى. وبلىستىق كونسۋلتاتسيالىق-دياگنوستيكالىق پەريناتالدىق ورتالىق بولىمشەسىنىڭ ىسكە قوسىلۋىنا اقتوبە وبلىسىنىڭ اكىمى بەردىبەك ساپارباەۆ قاتىستى.
ماڭىزدى نىسان قر تاۋەلسىزدىگىنىڭ 25 جىلدىعىنا وراي پايدالانۋعا بەرىلىپ وتىر. بۇل ماقساتتا وبلىستىق بيۋدجەتتەن 420 ملن. تەڭگە ءبولىندى. بىرەگەي ورتالىق ەڭ وزىق قۇرالدارمەن جابدىقتالعان بارلىق حالىقارالىق تالاپتار مەن ستاندارتتارعا ساي كەلەدى. رەپرودۋكتولوگ, ەمبريولوگ, ۋرولوگ-اندرولوگ سەكىلدى ماماندار رەپرودۋكتيۆتىك مەديتسينا ينستيتۋتىندا جانە الىس جانە جاقىن شەتەلدەردەگى مامانداندىرىلعان كلينيكالاردا وقىتىلعان.
"بۇگىندە قازاقستاندا بالا كوتەرە المايتىن ايەلدەرگە انا باقىتىن سەزىنۋگە كومەكتەسۋ ءۇشىن ەڭ وزىق تەحنولوگيالار مەن يننوۆاتسيالاردى قولدانۋ ارقىلى كومەك كورسەتىلىپ جاتىر. بۇل قولداۋ مەملەكەت باسشىسىنىڭ تاپسىرماسى بويىنشا جاسالۋدا. ءبىزدىڭ وبلىسىمىزدا 2000-نان استام جۇپ بەدەۋلىك ەسەبىندە تۇر. ولاردىڭ 600-گە جۋىعى ەكستروكورپورالدى ۇرىقتاندىرۋعا ءزارۋ. ورتالىقتا وسى يگىلىكتى ىسكە قىزمەت ەتەتىن ەڭ ۇزدىك ماماندار جۇمىس جاسايتىن بولادى. الداعى بىرنەشە جىلدا اقتوبە مەديتسينالىق قىزمەت كورسەتۋدە باتىس قازاقستانداعى ورتالىققا اينالۋى ءتيىس", - دەگەن وبلىس اكىمى ورتالىقتىڭ الدىنا بىرنەشە مىندەتتەر قويدى.
بەردىبەك ساپارباەۆ جاڭا نىساندى ارالاپ, ونىڭ بىرەگەي مۇمكىندىكتەرىمەن تانىستى.
"بۇل جەردە نارەستەنى مۇگەدەكتىككە اكەلۋى مۇمكىن تۋا بىتكەن اقاۋلاردى الدىن-الۋ ءۇشىن قاجەتتى قۇرال-جابدىقتار بار. پەريناتالدىق ورتالىعىنىڭ قۇرىلىسى اياقتالعاننان كەيىن, ەلەكتروندى دەرەكتەر بازاسىن ىسكە قوسىلاتىن بولادى جانە ءاربىر ايەل ەسەپكە الىنادى" - دەدى ايماق باسشىسى.
ماماندار ءوز كەزەگىندە وبلىس اكىمىنە وسىنداي ماڭىزدى جوبانى جۇزەگە اسىرۋدا قولداۋ كورسەتكەنى ءۇشىن العىستارىن ءبىلدىردى.
2017 جىلى جەرگىلىكتى بيۋدجەت ەسەبىنەن 50 وتباسىلىق جۇپقا ەكۇ پروتسەدۋراسىن جۇرگىزۋ جوسپارلانىپ وتىر.