كەشە كاتار ءامىرى حاماد بەن حاليفا ات-تانيگە قاستاندىق جاسالدى. ەل استاناسى دوحادا بولعان وسى شابۋىلدان ول جاراقات العان. سارايىنا بارار جولدا ءامىر رەسەي ەلشىسىمەن كەزدەسۋى كەرەك ەكەن. سول ساتتە كورتەجگە بەلگىسىز بىرەۋ جاقىنداپ كەلىپ, ونىڭ ماشينەسىنە وق جاۋدىرعان.
شابۋىل سالدارىنان كەم دەگەندە 8 ادام قازا تاۋىپتى. جارالانعاندار سانى ودان دا كوپ بولسا كەرەك. ال ات-ءتانيدىڭ جاراقاتى قانشالىقتى ەكەنى ازىرگە بەلگىسىز. قاستاندىقتىڭ سەبەبى ونىڭ وتباسىنىڭ يەلىگىندەگى اتاقتى «ءال-جازيرا» تەلەارناسىنىڭ قىزمەتىمەن تىكەلەي بايلانىستىرىلىپ وتىر. ويتكەنى, تەلەارنا كورسەتەتىن كەيبىر ەپيزودتار بازبىرەۋلەرگە ۇناي بەرمەيدى.
داماسك تۇبىندەگى قارۋلى قاقتىعىس
سيريا استاناسى داماسك قالاسىنىڭ تۇرعىندارى كەشە ەرتەڭگىسىن اۆيابازا ءتوڭىرەگىندە ورىن العان اتىس پەن قۋاتتى جارىلىستاردى انىق ەستىدى. توبەدە اسكەري تىكۇشاقتار قالىقتاسا, ولار جەرگە زىمىراندار تاستاعان. قارۋ دەمونسترانتتاردى قۋىپ تاراتۋدان باس تارتقان سولداتتار مەن وفيتسەرلەرگە باعىتتالعان سەكىلدى.
سوڭعى مالىمەتتەرگە قاراعاندا, كەيبىر اسكەريلەر ورتالىق كوماندوۆانيەنىڭ باعىنىسىنان شىعىپ, كوتەرىلىسشىلەر جاعىنا ءوتىپ جاتقان كورىنەدى. بىراق سيريا پرەزيدەنتى باشار اساد جاعىنداعى اسكەريلەر دە جەتكىلىكتى ەكەنى بايقالادى. ماسەلەن, حاما جانە حومس قالالارى كوشەلەرىندە بروندى تەحنيكا مەن ۇكىمەت اسكەرلەرى قايتا-قايتا بوي كورسەتىپ كەلەدى.
اسكەري بازا مەرزىمى 49 جىلعا ۇزارتىلادى
رەسەيدىڭ تاجىكستانداعى اسكەري بازاسىن ورنالاستىرۋ مەرزىمى تاعى 49 جىلعا ۇزارتىلاتىن بولدى. بۇل ۋاعدالاستىققا رەسەي پرەزيدەنتى دميتري مەدۆەدەۆ پەن تاجىكستان پرەزيدەنتى ەمومالي راحموننىڭ كەزدەسۋى كەزىندە قول جەتكىزىلگەن.
تاراپتاردىڭ سوزدەرىنە قاراعاندا, بازانى ورنالاستىرۋ مەرزىمىن ۇزارتۋ تۋرالى كەلىسىمگە 2012 جىلدىڭ العاشقى توقسانىندا قول قويىلماق. رەسەيدىڭ تاجىكستانداعى اسكەري بازاسى وسى ەلگە ءوزارا كومەك تۋرالى كەلىسىمگە سايكەس 1993 جىلى جىبەرىلىپ, سودان بەرى قالدىرىلىپ كەلە جاتقان 201-ءشى موتواتقىشتار ديۆيزياسى نەگىزىندە 2005 جىلى قۇرىلعان بولاتىن.
ناتو ۇندىستانمەن ىنتىماقتاسپاقشى
ناتو ۇندىستانعا زىمىرانعا قارسى قورعانىس سالاسىندا ىنتىماقتاسۋدى ۇسىندى. ناتو وكىلىنىڭ ايتۋىنشا, مۇنداي ىنتىماقتاستىق اليانس ەلدەرى مەن ءۇندىستاننىڭ قاۋىپسىزدىگىن قامتاماسىز ەتۋگە كومەكتەسەدى.
تابىستى ىنتىماقتاستىق جاعدايىندا ناتو تارابى ۇندىستانعا قورعانىس تەحنولوگيالارىمەن دە جاردەمدەسۋگە ۋادە بەرىپ وتىر. بۇل جەردە ءۇندىستاننىڭ نەگىزگى ارىپتەسى اقش بولۋى تيىستىگى تۇسىنىكتى. ال قازىرگى كەزدە ءۇندىستاندا ورتا جانە شاعىن قاشىقتىقتاعى زىمىرانداردى جويۋعا قابىلەتتى عانا تەحنولوگيالار بار.
جاقتاسى مەن قارسىلاسى قاقتىعىستى
ەگيپەتتىڭ ەكس-پرەزيدەنتى حوسني مۇباراكتىڭ سوتى قايتا جالعاستى. سوت پروتسەسى جابىق جۇرۋدە. سوت عيماراتىنىڭ الدىندا ەكس-پرەزيدەنتتىڭ جاقتاستارى مەن قارسىلاستارى ءوزارا قاقتىعىسىپ قالدى. جانجالعا ەكى جاقتان ونداعان ادام قاتىسقان.
بىرەۋلەرى «ءبىز سەنى جالعىز قالدىرمايمىز!» دەپ ايقايلاسا, ەكىنشىلەرى «ولار ءبىزدىڭ بالالارىمىزعا وق جۇمسادى, سوندىقتان تەك قانا جازا!» دەپ داۋىس كوتەرگەن. قازىر ح.مۇباراكتىڭ دەنساۋلىعى اۋىر كۇيىندە قالىپ وتىر. سوندىقتان ونى سوت عيماراتىنا تاقتاي توسەككە جاتقىزىپ اكەلگەن. سوتقا قاتىستى ايتاتىن بولساق, كەشە اۋەلى كۋالاردان جاۋاپ الىندى.
«رۋحناما» مەرەيتويى كەڭىنەن اتالادى
تۇركىمەنستان پرەزيدەنتى گۋربانگۋلى بەردىمۇحامەدوۆ بۇرىنعى ەل باسشىسى ساپارمۇرات نيازوۆ جازعان «رۋحناما» كىتابىنىڭ ونجىلدىعىن كەڭ جانە سالتاناتتى تۇردە اتاپ ءوتۋ جونىندە تاپسىرما بەردى. ونىڭ ايتۋىنشا, «رۋحناما» تۇركىمەن حالقىنىڭ رۋحاني كودەكسىنە اينالعان.
س.نيازوۆتىڭ كىتابىندا تۇركىمەن حالقىنىڭ تاريحى مەن ماڭىزى جانە ادامگەرشىلىك ەرەجەلەرىنىڭ جيىنتىعى كورىنىس تاپقان. ول بيلىك قۇرعان كەزدە ەڭبەكتى وقۋ ءار ازامات ءۇشىن مىندەتتى بولاتىن. بۇرىنعى پرەزيدەنت كىتابىن جازىپ بىتكەن كۇن – 12 قىركۇيەك مەملەكەتتىك مەرەكە دەپ جاريالانعان ەدى. سونداي-اق قىركۇيەك ايى مەن اپتانىڭ ءبىر كۇنى اتالعان كىتاپتىڭ اتىمەن اتالسا, اشعابادتا ەسكەرتكىشى ورناتىلعان ەدى.
قىسقا قايىرىپ ايتقاندا:
*يوردان وزەنىنىڭ باتىس جاعالاۋىنداعى ەۆرەي قونىستانۋشىلارى ارابتىڭ كۋسرا ەلدى مەكەنىندەگى مەشىتتى ورتەپ جىبەرگەن. يزرايل پوليتسياسى وقيعانى تەكسەرۋگە كىرىسسە, مەشىتكە يزرايل قورعانىس ارمياسىنىڭ كۇشتەرى تارتىلا باستاعان.
*ينگۋشەتيا جوعارعى سوتىنىڭ سۋدياسى تاگير وزدوەۆتىڭ اۋلاسىنا بەلگىسىز بىرەۋ اسكەري گراناتا لاقتىرعان. وقيعا 5 قىركۇيەككە قاراعان ءتۇنى ورىن العان. جارىلىستان زارداپ شەككەن ەشكىم جوق. تەك اۋلاداعى قوسىمشا قۇرىلىستار از-ماز قيراعان.
ەۋروپانىڭ ۋكرايناداعى پارلامەنتتىك سايلاۋدىڭ قورىتىندىلارىن مويىنداۋى جەرگىلىكتى بيلىكتىڭ ەكس-پرەمەر, وپپوزيتسيالىق قوزعالىستىڭ كوشباسشىسى يۋليا تيموشەنكوعا قاتىستى ۇستانىمىنا تىكەلەي تاۋەلدى بولادى. بۇل جونىندە ەو-نىڭ ۋكرايناداعى وكىلدىگىنىڭ باسشىسى مالىمدەدى.
*قىرعىزستاننىڭ قازاقستانمەن شەكاراسىندا قىرعىزستاننىڭ ەكس-پرەزيدەنتى قۇرمانبەك باكيەۆتىڭ نەمەرە ىنىلەرى ۇستالعان. باكيەۆتىڭ تۋىسقاندارىنىڭ ءبىرى 23 جاستاعى اسىلبەك, ەكىنشىسى 11 جاسار نۇرسۇلتان ساليەۆتەر ەكەن. قىرعىزستاننىڭ ۇلتتىق قاۋىپسىزدىك كوميتەتىندەگىلەر اسىلبەكتىڭ شەكارادا جالعان قۇجاتتار كورسەتكەنىن كولدەنەڭ تارتىپ وتىر.
*اۋعانستاندا جوعالىپ كەتكەن گفر-ءدىڭ ەكى ازاماتى ءولى كۇيىندە تابىلدى. ولاردىڭ مۇردەلەرىن تاۋ شاتقالدارىنىڭ بىرىندە سول ماڭنىڭ تۇرعىنى كورىپتى. ءولىمنىڭ نەدەن كەلگەنى ازىرشە بەلگىسىز.
ينتەرنەت ماتەريالدارى نەگىزىندە ازىرلەندى.