«ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن» جالپىۇلتتىق كواليتسياسى مۇشەلەرىنىڭ وڭىرلەرگە ساپارلارى جالعاسىپ جاتىر. ەرلان قوشانوۆ باستاعان دەلەگاتسيا شىمكەنت قالاسىنىڭ تۇرعىندارىمەن بىرقاتار كەزدەسۋ وتكىزدى.
عالىمدار, ەڭبەك ۇجىمدارى, مادەنيەت, سپورت جانە كوممۋنالدىق سالا وكىلدەرى اتا زاڭ جوباسىنىڭ نەگىزگى ەرەجەلەرىن جانە ونىڭ ەل بولاشاعى ءۇشىن ماڭىزىن تالقىلادى. باستى نازاردا – ادام, ونىڭ ەڭبەگى, ءبىلىمى جانە قاۋىپسىزدىگى.
م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتى الاڭىندا عىلىمي قاۋىمداستىقتىڭ, وقىتۋشىلار مەن ستۋدەنتتەردىڭ قاتىسۋىمەن كەزدەسۋ ءوتتى. وعان 300-دەن اسا ادام جينالدى. ءىس-شارادا ەرلان قوشانوۆ ۋنيۆەرسيتەت ۇلتتىڭ زياتكەرلىك نەگىزىن قالىپتاستىراتىن ماڭىزدى الاڭ ەكەنىن ەرەكشە اتاپ ءوتتى.
ء«بىز بيىك مۇراتقا, ۇلى ماقساتتارعا بەت العان ۇلتپىز. الدىمىزدا اۋقىمدى, ىرگەلى ىستەر كۇتىپ تۇر. ءبىز ادىلدىك سالتانات قۇرعاندا عانا بيىك بەلەستى باعىندىرامىز. زاڭ مەن ءتارتىپ ۇستەمدىك قۇرعاندا عانا دەگەنىمىزگە جەتەمىز. جاستارىمىز ءبىلىم مەن عىلىمنىڭ, يننوۆاتسيا مەن تەحنولوگيانىڭ ءتىلىن تولىق يگەرسە عانا وزىق ەلگە اينالامىز. وعان مىڭجىلدىق تاريحىمىزبەن, ءتول مادەنيەتىمىزبەن جەتەمىز. وسىنىڭ ءبارى وسى جاڭا كونستيتۋتسيادا تايعا تاڭبا باسقانداي كورىنىس تاۋىپ وتىر», دەدى ە.قوشانوۆ.
تالقىلاۋ بارىسىندا ءماجىلىس دەپۋتاتى ەكاتەرينا سمولياكوۆا ۇلى دالانىڭ مىڭجىلدىق تاريحىنا ءتان مادەني كودتى ساقتاۋدىڭ ماڭىزدىلىعىن اتاپ ءوتتى.
ال عىلىم جانە جوعارى ءبىلىم ءمينيسترى ساياسات نۇربەك ۋنيۆەرسيتەتتەر مەن زەرتتەۋ ورتاسى ءۇشىن دامۋدىڭ ۇزاقمەرزىمدى قاعيداتتارى ايرىقشا ماڭىزدى ەكەنىن ايتتى. ونىڭ ايتۋىنشا, مۇنداي قاعيداتتار مەملەكەتتىك ساياساتتىڭ باسىمدىقتارىن ايقىنداپ, ينستيتۋتسيونالدىق اۆتونوميا دەڭگەيىن انىقتاۋعا جانە ەلدىڭ باسەكەگە قابىلەتتىلىگىنىڭ نەگىزى رەتىندە عىلىمنىڭ ءرولىن كۇشەيتۋگە مۇمكىندىك بەرەدى.
وڭتۇستىك قازاقستان پەداگوگيكالىق ۋنيۆەرسيتەتىنىڭ پرورەكتورى بارشاگۇل يسابەك كەز كەلگەن قۋاتتى مەملەكەتتىڭ تاعدىرى ونىڭ زاڭدارىمەن, تاريحي ساباقتاستىعىمەن جانە حالىق رۋحىمەن ايقىندالاتىنىن اتاپ ءوتتى. ونىڭ ايتۋىنشا, جاڭا كونستيتۋتسيا پرەامبۋلاسىندا ۇلى دالانىڭ مىڭجىلدىق تاريحىن ساقتاۋ تۋرالى ايتىلاتىن ەرەجەلەر اتا-بابالار اماناتىنا ادالدىقتى كورسەتەدى جانە قاسىم حاننىڭ «قاسقا جولى», ەسىم حاننىڭ «ەسكى جولى» جانە تاۋكە حاننىڭ «جەتى جارعىسىنان» باستاۋ الاتىن دالا دەموكراتياسى داستۇرلەرىنىڭ جالعاسى.
ال مۇحتار اۋەزوۆ اتىنداعى ۋنيۆەرسيتەتتىڭ ساياساتتانۋ كافەدراسىنىڭ مەڭگەرۋشىسى ارداق مونتاەۆ حالىقارالىق تاجىريبەگە نازار اۋدارىپ, الەمدەگى 190 ەلدىڭ شامامەن 110-ىندا ءبىر پالاتالى پارلامەنت بار ەكەنىن اتاپ ءوتتى.
ودان كەيىن كواليتسيا مۇشەلەرى «ەڭبەكشى» كوممۋنالدىق كاسىپورنىنىڭ قىزمەتكەرلەرىمەن كەزدەستى. سانيتارلىق تازالىق قىزمەتكەرلەرى, جۇرگىزۋشىلەر مەن كوممۋنالدىق شارۋاشىلىق ماماندارى تۇراقتى جۇمىسپەن قامتۋدىڭ, ەڭبەك قاۋىپسىزدىگىنىڭ جانە الەۋمەتتىك قورعالۋدىڭ ماڭىزى تۋرالى ايتتى.
«پەتروقازاقستان ويل پروداكتس» جشس مۇناي وڭدەۋ زاۋىتىندا زاڭ مەن ءتارتىپ, ادىلدىك پەن جاۋاپكەرشىلىك قۇندىلىقتارى تۋرالى ايتىلدى. كاسىپورىن قىزمەتكەرلەرى ەڭبەك ەتۋ قۇقىعىن قورعاۋعا, ءادىل ەڭبەكاقى مەن قاۋىپسىز ەڭبەك جاعدايلارىن قامتاماسىز ەتۋگە باعىتتالعان زاڭنامالىق نورمالاردىڭ ماڭىزىنا توقتالدى. سونداي-اق ەكولوگيالىق مادەنيەت پەن قورشاعان ورتاعا ۇقىپتى قاراۋ ماسەلەلەرىنە ەرەكشە نازار اۋدارىلدى. بۇل باعىتتار مەملەكەتتىك ساياساتتىڭ ۇزاقمەرزىمدى باسىمدىقتارى بولۋعا ءتيىس ەكەنى ايتىلدى.
كەزدەسۋلەر ودان ءارى جالعاسىن تاۋىپ, شىمكەنت جاستار تەاترى الاڭىندا مادەنيەت سالاسىنىڭ وكىلدەرىمەن جۇزدەستى. ارتىستەر مەن شىعارماشىلىق ماماندىق يەلەرى مادەنيەت, ءبىلىم مەن رۋحاني قۇندىلىقتار ۇلتتىق بىرەگەيلىكتى ساقتاۋدىڭ جانە وتانسۇيگىشتىكتى تاربيەلەۋدىڭ بەرىك نەگىزىن قالىپتاستىراتىنىن اتاپ ءوتتى.
وسى كۇنى كواليتسيا مۇشەلەرى سپورتشىلارمەن, جاتتىقتىرۋشىلارمەن دە كەزدەستى. سپورت قاۋىمداستىعىنىڭ وكىلدەرى ادىلدىك, ادال باسەكە, ءتارتىپ پەن جاۋاپكەرشىلىك قۇندىلىقتارى سپورتتىڭ دا, قۋاتتى مەملەكەتتىڭ دە نەگىزىندە جاتقانىنا توقتالدى. جاتتىقتىرۋشىلار ءتۇسىندىرۋ جۇمىسىنا بەلسەندى قاتىسۋعا جانە جاستاردىڭ زاڭعا, ەڭبەككە ءارى ازاماتتىق جاۋاپكەرشىلىككە دەگەن قۇرمەتىن قالىپتاستىرۋعا دايىن ەكەنىن جەتكىزدى.
كەزدەسۋلەرگە قاتىسقان شىمكەنت تۇرعىندارى 15 ناۋرىز كۇنى جاڭا كونستيتۋتسيا جوباسى بويىنشا وتەتىن رەفەرەندۋمعا قاتىسۋعا دايىن ەكەندەرىن ءبىلدىردى.