ول قازاق سىنىپتارىنىڭ قامقورشىسى
پەتروپاۆل كلاسسيكالىق گيمنازياسى – تاۋەلسىزدىگىمىزدىڭ بەسىنشى بەلەسىندە وبلىس ورتالىعىندا بوي كوتەرگەن تۇڭعىش قازاق مەكتەپتەرىنىڭ ءبىرى. 320 ورىنعا لايىقتالعان ءۇش قاباتتى عيمارات كيىز ۇيگە ۇقساتىپ سالىنعان. اسەمدىگىمەن كوز تارتادى. قالانىڭ قاق ورتاسىندا ورنالاسقان ءبىلىم ورداسى ۋاقىت وتە كەلە ۇلكەن سۇرانىسقا يە بولدى. بالالارىن انا تىلىندە وقىتۋعا دەگەن اتا-انالاردىڭ قاتارى ءوسىپ, عيمارات تارلىق ەتە باستادى. وقۋشىلاردى ەكى اۋىسىمعا كوشىرۋگە تۋرا كەلدى. سونىڭ وزىندە شاكىرتتەردىڭ سانى 900-دەن اسىپ, سىنىپتار سانى 40-قا دەيىن جەتتى. ءبىرىنشى سىنىپتارعا قابىلداۋ سانىنىڭ ازايتىلعانىنا قاراماستان سانيتارلىق-گيگيەنالىق جانە ءورت تالاپتارىن ساقتاۋ قيىنعا سوقتى. قوسىمشا بەيىمدەپ جاسالعان كابينەتتەردىڭ دەنى ءۇشبۇرىشتى كەلگەندىكتەن, پارتالار دۇرىس ورنالاستىرىلمادى, تاقتانى كورۋ قيىندادى. ءبارىنەن دە وقۋشىلاردىڭ دەنساۋلىعىنا بايلانىستى الاڭداتارلىق جاعدايلار ورىن الدى. مۇنىڭ سوڭى وبلىستىق توتەنشە جاعدايلار ءجونىندەگى دەپارتامەنتتىڭ مامانداندىرىلعان اۋدانارالىق ەكونوميكالىق سوتقا تالاپ ارىز تۇسىرۋىنە سوقتىردى. سوتتىڭ گيمنازيا قىزمەتىن ەكى ايعا دەيىن توقتاتۋ جونىندەگى شەشىمىن ۇجىم دا, اتا-انالار دا تۇسىنىستىكپەن قابىلداعانىمەن, جاڭا وقۋ جىلى الدىندا كۇردەلى احۋال قالىپتاستىرىپ, ۇلكەن تىعىرىققا تىرەگەندەي بولدى. ەندى نە ىستەۋ كەرەك دەگەن ساتتە الدا ەكى تاڭداۋ تۇردى. ءبىرى – وقۋشىلاردى ونسىز دا ورىن جەتپەي جاتقان باسقا قازاق مەكتەپتەرىنە تاراتۋ ارقىلى سانىن كۇرت قىسقارتۋ. ەكىنشىسى – قوسىمشا عيمارات ىزدەستىرۋ. قالالىق وقۋ ءبولىمى سوڭعى ۇسىنىسقا قولداۋ ءبىلدىردى. ءسوز اراسىندا بوگەسىندەرگە قاراماستان گيمنازيادا ساپالى ءبىلىم بەرۋ ءىسى جاقسى جولعا قويىلعانىن, ەليتالى وقۋ ورىندارىنىڭ بىرىنە اينالعانىن ايتا كەتكەن ءجون. ءسىرا, انا تىلىندە وقۋعا دەگەن قۇشتارلىق, ۇستازداردىڭ جانقيارلىق ەڭبەگى كوپشىلىك ءۇمىتىن اقتاپ, كوپ جىلعى ەڭبەك ەسكەرۋسىز كەتپەگەن ءتارىزدى. بىلتىر 6 وقۋشى «التىن بەلگى» السا, بيىل دا ۇزدىكتەر توبىنان كورىندى.
– تۇيىقتان شىعاتىن وڭتايلى جول تابۋعا كومەك قولىن سوزعان №7 ورىس مەكتەبىنىڭ مۇعالىمدەر ۇجىمىنا, ديرەكتورى تاتيانا ميحايلوۆناعا دەگەن العىسىمىز شەكسىز. «كورشى اقىسى اۋىر» دەپ تەككە ايتىلماسا كەرەك. وسى ارەكەتتىڭ ءوزى-اق وزگە ۇلت وكىلدەرىنىڭ قازاق تىلىنە دەگەن تەرەڭ قۇرمەتىن, جاناشىرلىق سەزىمىن ايعاقتايدى. وندا باستاۋىش سىنىپتار ورنالاستىرىلاتىن بولادى. اۋىستىرىلاتىن سىنىپتار مەن مۇعالىمدەر گيمنازيا قۇرامىندا قالدىرىلادى. بىلايشا ايتقاندا, قۇرىلىمدىق دەربەس بولىمشە رەتىندە ءوز جۇمىسىن اتقارا بەرەدى. وقۋ-تاربيە ساپاسىن تومەندەتپەۋدىڭ مۇمكىندىكتەرىن قاراستىرىپ جاتىرمىز, – دەيدى گيمنازيا ديرەكتورى گۇلداراي قاينەتوۆا.
گيمنازياعا جاقىن جەردەگى مەكتەپتەن قوسىمشا عيماراتتىڭ ءبولىنۋى ۇتىمدىلىقپەن ۇيىمداستىرىلعانىنا ءبىز دە كوز جەتكىزدىك. بىرىنشىدەن, بۇل مەكتەپ كەڭ دە جارىق عيماراتتا ورنالاسقان. ەكىنشىدەن, ماتەريالدىق-تەحنيكالىق بازا جاقسى. كابينەتتەر قازىرگى تالاپقا ساي جابدىقتالعان. العاشقىلاردىڭ قاتارىندا ءۇن قوسىپ, قازاق سىنىپتارىن اشۋدا دا ۇلكەن بەلسەندىلىك كورسەتىپ كەلە جاتقان ۇجىمداردىڭ ءبىرى سانالادى. ءبىر سوزبەن ايتقاندا, قازاق ءتىلىنىڭ مەملەكەتتىك مارتەبە الۋىنا ايتارلىقتاي ۇلەس قوسىپ كەلە جاتقان ءتاجىريبەسى دە از ەمەس. قازىر مۇندا 6 قازاق سىنىبى جۇمىس ىستەسە, جاڭا وقۋ جىلىندا تاعى 2 ءبىرىنشى سىنىپ اشىلدى. ەندى, مىنە, گيمنازيانىڭ 12 سىنىبىمەن تولىعىپ, مەملەكەتتىك ءتىلدى مەڭگەرۋشىلەر قاتارى ايتارلىقتاي مولىقتى. نەسى بار, تۇبىندە ارالاس مەكتەپكە اينالىپ, ودان ءارى ۇلتتىق مارتەبە الىپ جاتسا, جاقسى جاڭالىقتىڭ جان جادىراتار باستاماسى قايىرلى بولعاي دەگىمىز كەلەدى.
– جاڭا وقۋ جىلىنا تىڭعىلىقتى ازىرلىكتەرمەن كەلدىك, – دەگەن تاتيانا پوليكوۆا, قازاق سىنىپتارىن اشۋ كەزىندە ەشقانداي پروبلەما تۋدىرماعانىن, عيماراتتىڭ جەكە ءبولىگى بەرىلگەنىن, ۇسىنىس ۇجىم تاراپىنان جان-جاقتى قولداۋ تاپقانىن جەتكىزدى.
– ەلباسىمىز نۇرسۇلتان نازارباەۆتىڭ قازاق ءتىلىن پاتريوتيزممەن تىعىز بايلانىستى مەملەكەتتىك ماڭىزدى ماسەلە رەتىندە قاراستىرىپ, وتان باستاۋ الاتىن تۋ, ەلتاڭبا, ءانۇران سەكىلدى نىشاندارمەن قاتار قويۋى ءار قازاقستاندىققا وي سالۋى ءتيىس. قوعامدا مەملەكەتتىك ءتىلدى ءبىلۋدىڭ ماڭىزدىلىعى مەن قاجەتتىلىگىن ءتۇسىنگەننەن كەيىن وسىنداي سىندارلى شەشىمگە باردىق, – دەيدى ول.
ءيا, قىزىلجار وڭىرىندە دە قازاق ءتىلىنىڭ بارىنشا جاقتاۋشىلارىنىڭ كوبەيىپ كەلە جاتقانى قۋانتادى. №7 ورىس مەكتەبىنىڭ بۇل قادامى قازاقستاندىقتاردى بىرىكتىرۋدىڭ اسا ماڭىزدى فاكتورى رەتىندە مەملەكەتتىك ءتىلدى ودان ءارى دامىتۋعا دەگەن ايشىقتى كوزقاراسىن تانىتسا كەرەك. سوڭعى كەزدەرى ورىس مەكتەپتەرىندە وقۋشىلار سانىنىڭ ازايۋ ۇدەرىسى بايقالىپ كەلەدى. بىزدىڭشە, جاڭا مەكتەپ عيماراتتارىنىڭ سالىنۋىن كۇتپەي-اق تاتيانا ميحايلوۆا سەكىلدى جانى ىزگى جانداردىڭ باستامالارى قازاقتار ءجيى تۇراتىن شاعىن اۋدانداردا دا جالعاسىن تاۋىپ جاتسا, نۇر ۇستىنە نۇر بولار ەدى.
ءومىر ەسقالي, سولتۇستىك قازاقستان وبلىسى.
سۋرەتتە: №7 مەكتەپتىڭ ديرەكتورى تاتيانا پوليكوۆا.