شاحتەر كۇنى شاحتينسك , اباي قالالارىندا دۇركىرەپ ءوتتى.
كومىرلى ولكە ومىرىندەگى ەلەۋلى وقيعالاردىڭ قاتارىندا كەنشىلەر كاسىبي مەرەكەسىنىڭ ورنى بولەك. ايماق ونەركاسىبىنىڭ ەڭ سالماقتى سالاسىنا اينالىپ, ءۇشىنشى وتىن وشاعى سانالعاندا, 100 مىڭنان استام شاحتەر ەڭبەك ەتكەن كەزدەر بولعان. قاراعاندىعا قاناتتاس قالالار تۇرعىندارىنىڭ تىنىس-تىرشىلىگى نەگىزىنەن وسى ءوندىرىس جۇمىسىمەن تامىرلاسقان. وسىنشاما ادامعا ەڭبەك ورتاسى ءارى ولاردىڭ وتباسى كۇنكورىسىنە , بەرەكەسىنە تىكەلەي تىرەك بولعاندىقتان شاحتەر كۇنى بارشاعا ورتاق مەرەكەدەي ۇلكەن كوڭىل قوشىمەن اتالىپ ءوتىلۋى قاشاننان بەرگى ءۇردىس. قازىر شاحتالار سانى سيرەپ, كەنشىلەر قۇرامى دا ازايعانمەن ول سول قالپىنشا سۇيىكتى مەرەكە رەتىندە كوپشىلىك جانىنا جاقىن.
شاحتەرلەردىڭ ءداستۇرلى تويى دۋمانىنىڭ ءدۇبىرى بيىل, اسىرەسە, شاحتينسك پەن اباي قالالارىنا اۋىپ, ايرىقشا شالقىدى. كومىر ءوندىرۋشى كاسىپورىنداردىڭ شوعىرى وسى جاقتا ساقتالىپ قالعاندىقتان , سونىمەن بىرگە اتالعان ەكى شاعىن شاھاردىڭ جاسى 50-گە تولۋىنا بايلانىستى سولايشا ورايلانعان ەدى. ءسان-سالتاناتى سوعان ساي بولدى. تامىلجىعان كۇن نۇرى دا شۋاعىن توگىلتىپ, مەرەكە شاتتىعىن جاراستىرا ءتۇستى.
الدىمەن ەڭبەك ارداگەرلەرىنە قۇرمەت كورسەتىلىپ, وسى داتاعا وراي ارنايى جاسالعان ەسكەرتكىش مەدالدار مەن « بۇل مەنىڭ قالام» اتتى اسەم بەزەندىرىلگەن كىتاپتار تاپسىرىلدى. ساياباقتار مەن كوشەلەردە سەيىل قۇرۋشى كوپشىلىكتى تانىمال ونەرپازدار ءان مەن ساز اۋەنىنە بولەدى. ءبىر تۇستا وسىلاي بولىپ جاتسا, ودان الىس ەمەس جەرلەردە بالۋاندار, بوكسشىلار سايىسى قىزىقتاتتى. سەرىك نۇرقازوۆ پەن سەرىك ساپيەۆتەي سايىپقىراندار قاناتتانعان اقىن اتىنداعى قالا رينگى وبلىس جانە اباي اۋدانى قۇراما كوماندالارى بوكسشىلارىنىڭ تارتىسىنا اينالدى. بىرنەشە جاس تالاپكەر جۇرت كوزىنە ءتۇسىپ, ءۇمىت ارتىلدى. بوسا بولماسىن ات بايگەسى بولەك قىزىققا بولەدى.
قالاداعى اباي ەسكەرتكىشى وسىنىڭ الدىندا جاسىل جەلەككە مالىنعان, سۋبۇرقاقتارى جوعارى شانشىلعان, اسەم وسىمدىكتەر ءيىسى اڭقىعان جاڭا ورىنعا قونىپتى. گۇلگە ورانعان اقىن مۇسىنىنەن ءارى قاراي كيىز ءۇيلى اۋىلعا اتتاعان جۇرت ۇلتتىق ويىن-ساۋىقتاردىڭ سان ءتۇرىن تاماشالاپ, وزدەرى دە سوعان قوسىلدى.
مەرەكە ستاديونداردا جالعاستى. شاحتينسكىلىك , ابايلىق كەنشىلەردى كاسىبي كۇنىمەن قۇتتىقتاۋعا كەلگەن وبلىس اكىمى سەرىك احمەتوۆ ولاردىڭ قۋانىشىنا توي اياعىنا دەيىن بىرگە ورتاقتاستى. ءتۇن كورپەسىن ايقارعان وتشاشۋلار ىرگەلەس قوس قالا اسپانىن جارقىراتتى.
ايقىن نەسىپباي, قاراعاندى وبلىسى.