2 قىركۇيەك كۇنى قازاقستان قۇراما كومانداسى تۇركيا كومانداسىنان 2:1 ەسەبىمەن ۇتىلدى. الايدا, قالاي ۇتىلدى دەسەڭشى؟ كەرەمەت ويىن كورسەتىپ, وسى جىلدىڭ ەڭ ادەمى گولىن سوعىپ ۇتىلدى.
سول كەشتە ءبارى بولدى. ۇلان قونىسباەۆتىڭ كەرەمەت گولى دا بولدى, سوعىلماعان پەنالتي, ەسەپتەلمەگەن گول, كەزدەسۋ سوڭىندا جەڭىلىس تە بولدى. ايتسە دە ءبىزدىڭ جىگىتتەر كەرەمەت وينادى!
بۇل ويىننىڭ الدىندا ءبىزدىڭ قۇرامامىز تۇركيامەن 90 ءمينوت تەڭ وينار دەپ ويلاعان ادام از بولار. ولار فيفا رەيتينگىندە 24- ورىندا تۇرسا, ءبىزدىڭ كۇرامامىز – 126- ورىندا. مۇنىڭ وزىنەن فۋتبول الەمىندە ءبىز تۇرىك باۋىرلارىمىزدان قانداي الشاق ەكەندىگىمىزدى تۇسىنۋگە بولدى.
كەزدەسۋ باسىنان باستاپ-اق ءبىزدىڭ كۇرامانىڭ ويىنى وزگەرگەنى كورىندى. ۇلتتىق قۇرامانىڭ تىزگىنىن ميروسلاۆ بەرانەك العالى ويىنىمىز كۇننەن كۇنگە جاقسارىپ كەلە جاتقانىن ايتۋ كەرەك. ءبىرىنشى مينوتتەردەن-اق تۇرىك فۋتبولشىلارى شابۋىلعا شىقتى. بىراق ءبىزدىڭ قاقپانى الەكساندر موكين تاسقامالداي ساقتاپ وتىردى. تۇرىكتەردىڭ شابۋىلىنا ءبىزدىڭ جىگىتتەر گريديننىڭ باسپەن ۇرعان سوققىلارىمەن جاۋاپ بەردى. سوققىلاردىڭ ەكەۋى دە باعانادان جوعارى ءوتتى. دەگەنمەن, تايمنىڭ ورتاسىندا سەلچۋك يناننىڭ اۋادان بەرگەن پاسىنان كەيىن بۋراك يىلماز دوپتى جەرگە تۇسىرمەي تەۋىپ, قاقپاعا كىرگىزدى. بۇل جەردە الەكساندر موكين قاقپادان ەرتە شىعىپ, قاتە جىبەرىپ العانىن ايتۋ كەرەك. سونىمەن 1:0. ءبىرىنشى تايم وسىنداي ەسەپپەن ءبىتتى.
ەكىنشى تايمدا ويىن الدەقايدا قىزىعىراق ءوتتى. چەح مامانى ميروسلاۆ بەرانەك ۇزىلىستە ءبىزدىڭ جىگىتتەرگە نە ايتقانى بەلگىسىز. نە ايتسا دا, ۇزىلىستەن كەيىن قازاقستاندىقتار الاڭدا سايگ ۇلىكتەي جەلە باستادى. بۇل كوپ ۇزاماي ءوز ناتيجەسىن بەردى. تۇركيا قۇراماسىنىڭ ءبىزدىڭ قاقپامىزعا جاسالىپ جاتقان شابۋىلدارىنىڭ بىرەۋىندە يۋري لوگۆينەنكو دوپتى العا شىعارىپ, ونى ۇلان قونىسباەۆ ىلە سالا وڭ قاپتالمەن الا ءجونەلدى. تۇركيانىڭ تاسقامال قورعانىسىنان وتە المايتىنىن ءبىلىپ, ۇلان 20 مەتردەي جەردەن دوپتى اۋەلەتە ۆولكان دەميرەلدەن اسىرىپ جىبەرە سالدى. دوپ توعىزدىقتان تابىلدى. قونىسباەۆتىڭ بۇل گولى ەل ىشىندە تالاي ايتىلاتىنى انىق. ءسويتىپ, ۇلان قۇراما تاريحىنداعى ەڭ ادەمى گولدى سوقتى. تۇرىكتەر قاقپامىزدى ودان ءارى توري باستادى. الايدا موكين ءوز ورنىندا بولدى. 10 ءمينوت وتە كەلە ءبىزدىڭ قاقپامىزعا پەنالتي بەرىلدى. دوپ مۇحتاروۆتىڭ قولىنا ءتيىپ كەتىپتى. سوققىنى جاساۋعا بۋراك يىلماز كەلدى. دوپ باعاناعا ءتيىپ, كەرى سەرپىلدى. ويىن تەلەديداردان كورسەتىلسە, ەكران الدىندا وتىرعان تالاي قازاق “ۋفف!!!” دەپ تىنىس الار ەدى-اۋ.
الايدا, سىناقتار مۇنىمەن بىتكەن جوق. ويىننىڭ بىتۋىنە 13 ءمينوت قالعاندا سول بۋراك دوپتى ءبىزدىڭ قاقپاعا باسپەن كىرگىزدى. قۋانىشقا وراي, فرانتسۋز تورەشىلەرى بۇل گولدى سانامادى. ولاردىڭ ويىنشا بۇل جەردە قاقپاشىعا شابۋىل جاسالىپتى. بۇل شەشىممەن تۇرىك فۋتبولشىلارى تالاي تالاستى. بىراق گول سانالعان جوق. تورەشى ويىنعا 4 ءمينوت قوستى. قوسىمشا ۋاقىتتىڭ ەكىنشىسىندە تۇركيا قۇراماسىنىڭ ويىنشىسى سەلچۋك ينانعا قىزىل قاعاز كورسەتىلدى. ول الاڭ جيەگىندە گەنريح شميدتگالگە قارسى قاۋىپتى ويناعان ەدى. بۇدان سوڭ سەرگەي گريديننىڭ دوپ سوعاتىن جاقسى ءمۇمكىندىگى بار ەدى. الايدا, ونىڭ دوبى قاقپادان ساناۋلى سانتيمەتر ارى كەتتى. ويىننىڭ سوڭىنا ساناۋلى سەكوندتتەر قالعاندا مۇحتار مۇحتاروۆ بۋراكپەن سوقتىعىسىپ, فرانتسۋز تورەشىسى ءبىزدىڭ قاقپاعا ايىپ سوققىسىن بەردى. سوققىنى ورىنداۋعا اردا تۋران كەلدى. اردانىڭ سوققىسىنان ىرشىعان دوپ يۋري لوگۆينەنكونىن اياعىنا ءتيىپ, ءبىزدىڭ قاقپاعا كىردى. ويىن اياقتالدى, ەسەپ 2:1! سونىمەن “تيۋرك تەلەكوم ارەنادا” بولعان سپەكتاكل, ءبىز ءۇشىن درامامەن ءبىتتى!
بۇل ويىن قازاق فۋتبولىنىڭ ءالى دە بولاشاعى بار ەكەنىن ايقىن كورسەتتى. باستى ءماسەلە دۇرىس باپكەر تابۋدا ەكەن. قازىر وسى ويىننان كەيىن جانكۇيەرلەردىڭ كوبى بەرانەك ۇلتتىق قۇراماعا باپكەر بولىپ كەلگەلى بەرى جىلدار بويى تاستاي قاتقان سەڭنىڭ قوزعالعانىن ايتۋدا. شىنىمەن دە چەح مامانى ءبىزدىڭ قۇراماعا جاڭاشا ويلاۋدى, جاڭاشا كوزقاراستى اكەلگەنى كورىنىپ تۇر. ءايتپەسە, ءبىزدىڭ ءتۇرىكتەردەن ىستامبۇلدا العاش رەت 4:0, ودان كەيىن الماتىدا 6:0, سوسىن استاناداعى سۋ جاڭا «استانا – ارەنا» ستاديونىندا 3:0 ەسەبىمەن جەڭىلگەنىمىزدى ءبارى جاقسى بىلەدى. ەندى مىنە, تاعى دا جەڭىلسەك تە الدىڭعى ويىندارداعىداي ءىرى ەسەپپەن ەمەس, بار-جوعى ءبىر دوپ ايىرماشىلىعىمەن جەڭىلدىك. بۇل كەزدەسۋدە قازاقستان قۇراماسىنىڭ قالاي ويناعانىن فۋتبولدان حابارى بار ادامنىڭ ءبارى كوردى. ونى بىرەۋلەر تەلەديداردان, باسقالارى ينتەرنەت سايتتاردان كورىپ وتىردى. وكىنىشتىسى سول, وسى جولى «قازاقستان» ۇلتتىق تەلەارناسى تاعى دا سىرت الاڭنان ميلليونداعان جانكۇيەرلەرگە ماتچتى ۇسىنا المادى. ءبىز سياقتى قالادا تۇراتىن ازاماتتارعا كەز كەلگەن جەردە ينتەرنەت نە كابەلدى تەلەارنا ارقىلى فۋتبولدى ىزدەپ ءجۇرىپ كورە الاتىنىمىز جاسىرىن ەمەس. ال كەشكە ورىستەن كەلگەن مالىن قوراعا قاماپ, كۇنى بويى فۋتبولدى كۇتىپ جۇرگەن اۋىل اعايىنىنىڭ ماتچتى تاماشالاي الماعاندا قانداي كۇيگە تۇسەتىنىن تۇسىنگەن ادام جاقسى بىلەدى. ابىروي بولعاندا وسى ماتچتى سپۋتنيكتىك «KZ SPORT 1» تەلەارناسى كورسەتتى. ال ءبىز ۇلتتىق ارنا كورسەتپەگەن سوڭ, www.vmire.tv سايتىنا كىرىپ ماتچتى تاماشالاي الدىق. باسقا ينتەرنەت سايتتار دا ويىندى كورسەتىپ جاتتى. ەندى كەلەسى, 6 قىركۇيەك كۇنى ازەربايجانمەن بولاتىن باكۋدەگى ويىندى, ودان كەيىن بەلگيامەن وتەتىن كەزدەسۋدى «قازاقستان» تەلەارناسى تىكەلەي ەفيردەن ەشقانداي كەدەرگىسىز كورسەتسە, وسى ايدان باستاپ تولىق مەملەكەتتىك تىلگە كوشكەن اتالعان ارنانى ميلليونداعان جانكۇيەر ودان سايىن قىزىعا تاماشالايتىنى ءسوزسىز. ءبىز وسىنداي ويىنداردى تازا قازاق تىلىندە رەپورتاج بەرىپ, كورسەتۋ ارقىلى فۋتبول دەسە ىشكەن اسىن جەرگە قوياتىن وزگە ۇلت وكىلدەرىنە مەملەكەتتىك تىلگە قۇرمەتپەن قاراۋدى ۇيرەتىپ, ءتىل ۇيرەنەمىن دەگەن تالپىنىسىنا جاعداي تۋعىزاتىن ەدىك قوي. ال تۇركيادا وسى ويىندى 12 تەلەارنا كورسەتتى دەپ ەستىپ جاتىرمىز. جالپى, انادولى ەلىندە 22 سپورت تەلەارناسى جۇمىس ىستەيدى ەكەن. الدىڭعى كۇنى سونىڭ 12 تەلەارناسى ءبىر دەمدە ماتچتى كورسەتىپ شىقتى. ونىڭ ۇستىنە ويىن بىتكەن سوڭ كۇنى بويى بارلىق ارنالاردان ساراپتامالىق ماتەريالدار, قىزىقتى كورىنىستەردى قايتالاۋ, فۋتبولشىلارمەن سۇحباتتاردىڭ ءبارى-ءبارى كورسەتىلىپتى. مىنە, يسلام دىنىنەن كەيىن ەكىنشى ورىندا تۇراتىن فۋتبولعا دەگەن ءتۇركيانىڭ قۇرمەتى وسىنداي. كەشەگى ويىندا فۋتبولعا دەگەن قۇرمەتتى مەملەكەت باسشىسى ابدوللا گۇل دە كورسەتتى. ول كەزىندە ءوزى دە «بەشيكتاش» كلۋبىندا ويناعان بولاتىن. سول كەزدە ونىڭ نەگىزگى قۇرامدا 6 ويىن ويناپ, ديپلوماتيالىق جۇمىسقا اۋىسقانىن بىلەمىز. وسى ماتچتى ول باستان-اياق تاماشالاپ, دەمىن ىشىنە تارتىپ وتىردى. كەزدەسۋدە ءبىزدىڭ ۇلان قونىسباەۆتىڭ 55 مينوتتە ەسەپتى تەڭەستىرگەندە, ەل پرەزيدەنتى عانا ەمەس, مانادان بەرى ايعاي-شۋعا باسىپ, جىگىتتەرىن جىگەرلەندىرىپ وتىرعان 40 مىڭنان استام تۇرىك جانكۇيەرلەرىنىڭ ءبىر ساتتە ساپ تيىلعانىن دا كوردىك. وسى گولدان كەيىن تۇرىكتەر قازاقتاردى ءبىر قالپاقپەن ۇرىپ الاتىن قۇراما ەمەس ەكەندىگىن مويىندادى دەۋگە بولادى. تاعى ايتاتىن نارسە, اتالعان ويىندى «تيۋرك تەلەكوم ارەنا» ستاديونىندا 2,5 مىڭنان استام قازاقستاندىق جانكۇيەر تاماشالادى دەگەن دەرەك بار. كەشە وسى دەرەكتى ناقتىلاۋ ءۇشىن ەلدەن ماتچتى تاماشالاۋعا بارعان ازاماتتاردىڭ ءبىرى استاناداعى ل.ن.گۋميلەۆ اتىنداعى ەۇۋ ستۋدەنتى جاندوس مەديمانوۆتان سۇراستىرعانىمىزدا, ول ءوزىنىڭ ونشاقتى تۋىسقانىمەن ويىندى كورگەنىن, استانادان تۇركيانىڭ قازاقستانداعى ەلشىلىگى جاساعان جەڭىلدىكپەن بارىپ قايتۋعا 68 مىڭ تەڭگە جۇمساعانىن, وسىنداي بيلەتتەردى 70-تەن استام وتانداستارىمىزعا تاراتقانىن ايتتى.
قورىتا ايتقاندا تۇركيامەن ويىن بىزگە ازەربايجانمەن ويىننىڭ الدىندا سىناق الاڭى بولعانى ءسوزسىز. ءبىزدىڭ كەلەسى قارسىلاسىمىز دا وڭاي شاعىلاتىن جاڭعاق ەمەس. دەگەنمەن, نامىسقا تىرىسساق باكۋدە ولاردىڭ الدىن وراۋعا بولادى. تەك قۇرامادا سامات سماقوۆ, نۇربول جۇماسقاليەۆ, داۆيد لوريا سياقتى ويىنشىلاردىڭ بولماي جاتقانى وكىنىشتى. سماقوۆ قۇرامادان كەتەتىنىن ونشاقتى كۇن بۇرىن ايتقان. جاستارعا ورنىمدى بەرەمىن دەپ ءوزى قۇرامادان كەتىپتى. ازەربايجانمەن ويىنعا مۇحتار مۇحتاروۆ تا قاتىسپايتىن بولدى. ونىڭ ورنىنا ميحايل روجكوۆ نەمەسە قايرات ءنۇرداۋلەتوۆ شىعادى دەگەن دەرەك بار. كوبىنە نۇرداۋلەتوۆتىڭ ەسىمى ءجيى اتالادى. ايتقانداي, وسى ويىندا تۇركيا ويىنشىلارىنا قايرات پەن ۇلاننىڭ جانە شميدگالدىڭ ويىن ورنەگى كوبىرەك ۇناعان كورىنەدى. ال مۇحتاروۆ جاراقات العان سوڭ قۇرامادا ءبىرشاما ۋاقىت وينامايتىن بولادى. ول تۇركيامەن ويىندا اردا تۋرانمەن سوقتىعىسىپ, مۇرنىن قاتتى زاقىمداپ الىپتى. سول كەزدە اردا ءوزىنىڭ كىناسىن ءتۇسىنىپ, ويىن اياقتالعان سوڭ Fair play ەرەجەسى بويىنشا مۇحتاردان كەشىرىم سۇراۋعا بارعاندا شىمكەنتتىڭ «ورداباسى» كومانداسىنىڭ ويىنشىسى ءوزىنىڭ شەشەسى مەن كەلىنشەگى تۇرىك بولسا, ەكى جاسار بالاسىنىڭ اتى اردا ەكەنىن ايتقاندا اردا تۋران ۇستىندەگى مايكاسىن شەشىپ, مۇحتارعا باۋىرلاستىق سەزىمىن ءبىلدىرىپتى.
ءسوز سوڭىندا ايتاتىن تاعى ءبىر نارسە, ماتچتان كەيىن فيفا جانە ۋەفا وكىلدەرى ءتۇركيانىڭ قازاقستان قاقپاسىنا ويىن كەزىندە سوققان دوبى ەسەپتەلۋى كەرەكتىگىن ايتىپ, بىراق ول سانالماعان سوڭ قاپتالداعى تورەشىنىڭ جۇمىسىنا تومەن باعا بەرىپ, ونىڭ بالىن كەمىتىپ تاستاپتى.
ەندى قۇرامامىزدىڭ كەلەسى ويىنى 6 قىركۇيەك كۇنى ازەربايجانمەن بولادى. ول ويىننان ءبىز تەك جەڭىس كۇتەمىز. سەبەبى وتكەن ويىننان كەيىن ولاي ايتۋعا نەگىز بار!
راحمان ابديەۆ.