24 جەلتوقساندا ساعات 18-00-دە اقبۇلاق وزەنىندەگى مۇز ايدىنىنىڭ اشىلۋى وتەدى.
ۇيىمداستىرۋشىلار «الماتى» اۋدانى اكىمىنىڭ اپپاراتى دەنە شىنىقتىرۋ جانە سپورت باسقارماسىمەن, سپورتتىق-بۇقارالىق شارالاردى وتكىزۋ ديرەكتسياسىمەن جانە استانا قالاسىنىڭ كوممۋنالدىق شارۋاشىلىق قورىمەن بىرلەسە وتىرىپ كوڭىلدى باعدارلاما ازىرلەدى.
تازا اۋادا قوناقتاردى ينتەراكتيۆتى بايقاۋلار, «Open air» بي كەشى, سونداي-اق, جاس مانەرلەپ سىرعاناۋشىلار مەن قالانىڭ جاسوسپىرىمدەر حوككەي كوماندالارىنىڭ كورسەتىلىمدىك نومەرلەرى جوسپارلانعان, دەپ حابارلادى استانا اكىمىنىڭ ءباسپاسوز قىزمەتى.
وسى كۇنى ساعات 12-دە «ەسىل» اۋدانىنىڭ اكىمى ەرماعانبەت بولەكباەۆتىڭ قاتىسۋىمەن «اراي» باعىندا ۇلكەن مۇز ايدىنى اشىلادى. كولەمى 5 مىڭ شارشى مەتر بولاتىن مۇز ايدىنىنا ءبىر ۋاقىتتا 250 ادام كونكي تەبە الادى. مۇندا مۋزىكا مەن جارىق-يلليۋميناتسيالىق جارىقتاندىرۋ قاراستىرىلعان. باقتىڭ اۋماعىندا جاڭاجىلدىق شىرشا, قولونەرشىلەردىڭ جارمەڭكەسى ورنالاسقان, سىرعانايتىن توبەشىكتەر جاسالعان. كونكي مەن شانانى جالعا الۋ قۇنى ساعاتىنا 500 تەڭگە كولەمىندە بەكىتىلدى. قالا تۇرعىندارىنا ىڭعايلى بولۋى ءۇشىن ءدامحانا, مەديتسينالىق بەكەت جانە راديودۇڭگىرشەك جۇمىس ىستەيدى.
«سارىارقا» اۋدانىنداعى 4 مۇز ايدىنى كەيىنىرەك اشىلادى, ولار كەلەسى مەكەن-جايلار بويىنشا ورنالاسادى: «Sine Tempore» ءسۇ الدىنداعى قالالىق الاڭ, قوسشىعۇل ۇلى كوشەسىندەگى «سەۆەرنىي» ساۋدا ۇيىنە قارسى الاڭ, كوكتال تۇرعىن الابىنداعى «گاز» تەاترىنىڭ الدىنداعى الاڭ, جانە «ءوندىرىس» تۇرعىن الابىنداعى № 49 ورتا مەكتەپتىڭ اۋماعى. بەلسەندى دەمالىستى سۇيەتىندەر ءۇشىن سارىارقا داڭعىلىندا «استانا» سپورت كەشەنىنىڭ قاسىندا 30ح60 مەترلىك حوككەي كورتى جۇمىس ىستەيدى.