كەشەگى كۇنى كەنشىلەر قالاسى – ەكىباستۇزدا باستالعان رەسپۋبليكالىق III پاتريوتتار فورۋمى ارى قاراي وبلىس ورتالىعىندا جالعاستى. «بىرلىگىمىز جاراسقان!» اتتى رەسپۋبليكالىق جاستار فورۋمىنا ەلىمىزدىڭ ءار وبلىسىنان توپ-توپ بولىپ, جۇزدەرى جارقىن الاۋ جاستىق كوڭىلمەن مىڭعا تارتا ستۋدەنت جاستار كەلدى. ەلىمىزدىڭ ەگەمەندىگى مەن ەلدىگىن پاش ەتەتىن مەملەكەتتىك رامىزدەرىمىزدى ارداقتايتىن وتانسۇيگىش جاستار شەرۋى ەرتىس وزەنى جاعالاۋىنان باستالدى. كوك بايراق تۋدى كوتەرگەن پاتريوت جاستار وبلىس ورتالىعىنداعى «داڭق» الاڭىندا باتىرلار رۋحىنا تاعزىم ەتتى.
ۇلتتىق رامىزدەر ەلىمىزدىڭ وتكەنى جانە بولاشاعى اراسىنداعى ساباقتاستىقتى بىلدىرەدى. حالقىمىزدىڭ رۋحىن, ۇلتتىق ساناسىن, قاھارماندىعىن, دانالىعىن ايشىقتايتىن ەلىمىزدىڭ جاڭا تاريحىنىڭ قاستەرلى بەتتەرى دەۋگە بولادى. ەندەشە, جاستاردى پاتريوتتىق سەزىمگە تاربيەلەۋدە ونىڭ ءمان-ماعىناسىن ءتۇسىندىرۋىمىز كەرەك. فورۋمنىڭ دا كوزدەگەن ماقساتى وسى. بۇل جونىندە قازاقستان جاستار كونگرەسىنىڭ اتقارۋشى ديرەكتورى نۇرلان سىدىقوۆ مالىمدەدى.
فورۋم اياسىندا جاستار شەرۋى ۇيىمداستىرىلدى. ماقساتى – ءاربىر جاستىڭ بويىندا ءوزىنىڭ وتانىنا دەگەن, ءوز ەلىنىڭ رامىزدەرىنە دەگەن قۇرمەت سەزىمىن وياتۋ. ءيا, وتاننىڭ ءوزى وسى جەلبىرەگەن كوك تۋدان, ەلدىك بەلگىلەردەن, ءانۇراننان باستالادى. بۇگىن ولاردىڭ جۇزدەرىندە ەرەكشە ءبىر تولقۋ بار. ءبىر مەزەتتە بۇكىل ەلىمىزدىڭ جاستارى ورىنداعان ءانۇران ءبىزدىڭ وبلىس ورتالىعىندا دا شىرقالدى. «مەنىڭ ەلىم, مەنىڭ قازاقستانىم» دەگەن سوزدەر تۋعان جەرگە دەگەن سۇيىسپەنشىلىكتى, بولاشاققا دەگەن سەنىمدىلىكتى ايشىقتادى. وتانعا دەگەن شەكسىز قۇرمەتتى ءبىر-اق سوزگە سىيعىزىپ تۇر.
«مەن بىرلىگى جاراسقان ەلدىڭ ۇلانىمىن» دەگەن جاستار شەرۋى «داڭق» الاڭىنا كەلىپ جەتتى. وسى جەردە حالىق قاھارمانى باقىتجان ەرتاەۆ ءسوز سويلەدى: «ءبىزدىڭ بابالارىمىز جەڭىس الىپ كەلدى. ءبىز تاريحقا باس يەمىز. ەلىمىز جاساسىن, جاستار وسى جولدى جالعاستىرسىن! – دەدى اۋعان سوعىسىنىڭ ارداگەرى. – بۇل كۇندەرى ەلىمىزدىڭ كوك بايراعى باسقا دا تاۋەلسىز مەملەكەتتەردىڭ تۋلارىمەن قاتار بىرىككەن ۇلتتار ۇيىمىنىڭ نيۋ-يوركتەگى شتاب-پاتەرىندە جەلبىرەپ تۇر. وليمپيادا كەزىندە ەلىمىزدىڭ سپورتشىلارى قۇرمەتىنە كوتەرىلەدى. ەلتاڭبامىز ۇلتتىق تەڭگەمىزدە بەينەلەگەن. مەملەكەتتىك ءرامىزدەر عارىشكەرلەرمەن بىرگە كوك جۇزىندە, عارىشتا دا بولىپ قايتتى».
مىنە, وسىنداي قۇندىلىقتاردى جاستار بىلۋلەرى ءۇشىن جىل سايىن رامىزدەر كۇنى اتالىپ وتەدى. جىگەرلى جاستاردىڭ مەرەكەلىك شەرۋى ەلىمىزدىڭ قۇنىدىلىقتارىن قاستەرلەپ, مارتەبەسىن اسقاقتاتىپ, جاستاردى ءبىر جەرگە توپتاسۋعا ۇندەيدى. ءبارى دە وسى ءبىر كۇننىڭ شىنايى ءمانىن ۇعىپ, قولدارىنا ۇستاعان كوك تۋلارىن جەلبىرەتىپ, اسەم جاعالاۋدى ناعىز مەرەكەگە اينالدىردى. شەرۋگە قاتىسقان جاستار ءرامىزدەر كۇنى بىرلىكتىڭ, تاتۋلىقتىڭ, دوستىقتىڭ مەكەنى ەلىمىزگە ارناپ اندەر شىرقادى. سونىمەن قاتار, «كوك بايراق تۋىمىز», «ماڭگىلىك ەلتاڭبا», «قاسيەتتى ءانۇران» دەپ اتالعان شەرۋ باعىتىمەن مەملەكەتتىڭ ەلدىك, ەگەمەندىك ۇلىق بەلگىلەرىن كوتەرىپ, وبلىس ورتالىعىنىڭ كوشەلەرىن ارالاپ ءجۇرىپ, «استانا» مۇز ايدىنى سارايىنا كەلدى.
وسى جەردە «قازاقستان پاتريوتتارىنىڭ فورۋمىنا» قاتىسۋشىلار, ولاردىڭ اراسىندا جاستار, ستۋدەنتتەر, ءبىلىمدى سايىسكەر جەڭىمپازدار, سپورتشىلار بار, بىرگەمىز – بەرىك ىرگەمىز, دەپ وزدەرىنىڭ 2007 جىلدان باستاپ اتالىپ كەلە جاتقان ەلىمىزدىڭ رامىزدەر كۇنىن قۇرمەتتەپ, وعان باس يەتىندەرىن جەتكىزدى. جۇزدەرى بال-بۇل جانعان جاستار – «جاس وتان» جاستار قاناتىنىڭ مۇشەلەرى كەۋدەلەرىنە قولدارىن قويىپ, كوك تۋدىڭ قاسىنا كەلىپ تۇردى. «بىزدەر جاس پاتريوتتار ەلىمىزدىڭ كوك تۋىن ارقاشان بەرىك قولدا, مىقتى ۇستايمىز, وتان بىرەۋ, جاستار ارقاشان سەنىمەن بىرگە», دەستى ولار. ەكىنشى قاتارداعى ساحنا تورىنە سپورتشىلار ەلەنا حرۋستالەۆا, مۇحتارحان دىلدابەكوۆ, اۋعان سوعىسىنىڭ ارداگەرى باقىتجان ەرتاەۆ, جەرلەسىمىز, بەيبىت كۇنى ەرلىك كورسەتكەن كاپيتان قادىرجان قازىباەۆ, اتاقتى ءانشى روزا رىمباەۆا شاقىرىلدى. ءانشى: «وتانىن سۇيەتىن وسىنداي پاتريوتتارى بار ەل باقىتتى», – دەدى. راسىندا دا, ءبىرى اسەم ءاندەرىمەن, ءبىرى سپورتتاعى جەڭىسىمەن ەلدىڭ تۋىن, رۋحىن بيىك كوتەرگەن, ەندى ءبىرى وتانىن قورعاپ باتىر اتانعان پاتريوتتتار, مىنە, وسىلاي جاستارعا ۇلگى-ونەگە بولۋدا. ءۇشىنشى قاتارعا سوعىس ارداگەرلەرى كەلىپ قوسىلدى. ءۇش ۇرپاق وكىلدەرى وسىلاي كەزدەستى. بارلىعىنا دا ەلباسى نۇرسۇلتان نازارباەۆتىڭ «قازاقستاندىق جول» اتتى كىتابى سىيعا تارتىلدى. ءرامىزدەر كۇنى قۇرمەتىنە شىعارىلعان ارنايى قۇرمەتتى بەلگىلەرمەن ماراپاتتالدى.
ءبىز وسى جەردە سولتۇستىك قازاقستان وبلىسىنان كەلگەن دينارا بەرىكقىزىمەن پىكىرلەستىك. ول: «جۇرەگى جەرىم, ەلىم دەپ سوققان ءاربىر پاتريوت جاس ءۇشىن بۇل كۇن ەرەكشە كۇن دەپ ويلايمىن. وسىنداي مەرەكە كۇنىنىڭ بولعانى كەرەك, رامىزدەردىڭ قاسيەتىن ءاربىر جاس ۇعىنىپ, ونى قادىرلەپ ءوسۋى ءتيىس, پاتريوت دەگەن جاي عانا ءسوز ەمەس, ءوزىڭ ءومىر سۇرگەن ەل ءۇشىن قىزمەت جاساۋ, قاجەت كەزىندە باقىتجان اعالارداي كۇرەسە دە ءبىلۋ», – دەدى. كەرەكۋلىك ەركەبۇلان الدابەرگەنوۆ بولسا: «مەن ءوزىمدى ەلىمنىڭ شىنايى پاتريوتىمىن دەپ سانايمىن. وزبەكستاننان كوشىپ كەلدىك, نە ءۇشىن كەلدىك سوندا, ارينە, قازاعىم, ەلىم, جەرىم دەپ كەلدىك, ەندى وسى ەلدىڭ بىرلىگى, بولاشاعى ءۇشىن قىزمەت جاسايمىن, جاستار انا تىلدەرىن ءسۇيسىن, قۇرمەتتەسىن, بارلىعى انا ءتىلىڭدى سۇيۋدەن باستالادى عوي», – دەدى.
كەڭ كولەمدى ەكراننان ەلىمىز حالىقتارىنىڭ بىرلىگىن ايعاقتايتىن كورىنىستەر كورسەتىلدى. وسى كەڭ ەكران ارقىلى ەلىمىزدىڭ ءار وبلىسىمەن تىكەلەي بايلانىسقا شىققان جۇرگىزۋشىلەر پەتروپاۆل, شىمكەنت, اتىراۋ, وسكەمەن جاقتاردا ءوتىپ جاتقان فورۋم ماقساتىنا ساي سول جەرلەردە تۇراتىن ەلىن, جەرىن سۇيەتىن پاتريوتتاردىڭ جۇرەكجاردى لەبىزدەرىن بىلدىرۋلەرىنە مۇمكىندىك جاسادى. ەل مەن جەرگە دەگەن پاتريوتتىق تاقىرىپتا اندەر ورىنداعان ونەرلى توپتار رامىزدەر كۇنى مەرەكەسىنىڭ ءسانىن دە ءمانىن دە كەلتىردى.
فاريدا بىقاي.
پاۆلودار وبلىسى.