كەشە ەلوردادا پارلامەنت ءماجىلىسىنىڭ دەپۋتاتى مايرا ايسينانىڭ تورايىمدىعىمەن «نۇر وتان» پارتياسى سايلاۋالدى باعدارلاماسىنىڭ «مەملەكەتتىك قىزمەت كورسەتۋ» باعىتى بويىنشا كوميسسياسىنىڭ 2016 جىلعى جۇمىستارىنىڭ قورىتىندىسىنا ارنالعان وتىرىس ءوتتى.
وتىرىسقا پارلامەنت ءماجىلىسىنىڭ دەپۋتاتتارى, اقپارات جانە كوممۋنيكاتسيالار, دەنساۋلىق ساقتاۋ جانە الەۋمەتتىك دامۋ, ۇلتتىق ەكونوميكا, قارجى مينيسترلىكتەرىنىڭ, مەملەكەتتىك قىزمەت ىستەرى اگەنتتىگىنىڭ, ۇلتتىق كومپانيالاردىڭ جانە ۇكىمەتتىك ەمەس ۇيىمداردىڭ وكىلدەرى قاتىستى. كوميسسيا ءتورايىمى مايرا ايسينانىڭ اتاپ وتۋىنشە, باعدارلامالىق قۇجاتتار ەلىمىزدىڭ ايماقتارىنىڭ دامۋى مەن گۇلدەنۋىنە باعىتتالعان. ولاردى ىسكە اسىرۋ ءۇشىن ۇلكەن كولەمدە بيۋدجەت قاراجاتى ءبولىنىپ وتىر. وتىرىستا اقمولا, اقتوبە, اتىراۋ, باتىس قازاقستان, ماڭعىستاۋ جانە سولتۇستىك قازاقستان وبلىستارىنداعى كوميسسيالار توراعالارىنىڭ «اقپاراتتى قازاقستان-2020» باعدارلاماسىن ىسكە اسىرۋ مونيتورينگىنىڭ ناتيجەلەرى تۋرالى حابارلامالارى تىڭدالدى. ولار وڭىرلەردە مەملەكەتتىك قىزمەتكە الۋ كەزىندە ازاماتتارعا كەدەرگى بولىپ وتىرعان نەگىزگى پروبلەمالاردى ورتاعا سالدى. ماسەلەن, اقمولا وبلىسى ورتالىق دەڭگەيىندە مەمقىزمەتتەردىڭ رەگلامەنتىن جاساۋ, مەملەكەتتىك قىزمەت كورسەتۋ كەزىندە ارتىق تەتىكتەردى الىپ تاستاۋ ءۇشىن مەملەكەتتىك قىزمەتتەردىڭ رەينجينيرينگىن وتكىزۋ قاجەتتىگى جونىندە پروبلەما كوتەردى.
اتىراۋ مەن باتىس قازاقستان وبلىستارىندا كولىكتەردى تىركەيتىن جانە جۇرگىزۋشى كۋالىگىن بەرەتىن مامانداندىرىلعان ورتالىق قۇرىلىسىن سالۋ ماسەلەسى تۇر. ماڭعىستاۋ وبلىسى كەدەن جانە سالىقتىق باسقارۋداعى تەتىكتەردى وڭايلاتۋدى ۇسىندى. ال سولتۇستىك قازاقستان وبلىسىنداعى كوميسسيا مۇشەلەرى اۋىلداردا كادرلاردىڭ ءجيى اۋىسۋىنا, ولاردى دايارلاۋ مەن قايتا دايارلاۋ, سونداي-اق, ەلەكتروندى ۇكىمەت مۇمكىندىكتەرىن پايدالانۋ بويىنشا اۋىلدىق جەردەگى حالىقتى اقپاراتتاندىرۋدى ارتتىرۋ ماسەلەسىنىڭ وزەكتىلىگىنە نازار اۋداردى. وتىرىسقا قاتىسقان مەمورگاندار وكىلدەرى ءوز كەزەگىندە كوتەرىلگەن ماسەلەلەرگە بايلانىستى جاۋاپتار قايتاردى جانە جەرگىلىكتى جەرلەردە قوردالانعان پروبلەمالاردىڭ سەبەپتەرىن ءتۇسىندىردى.
ءاليسۇلتان قۇلانباي,
«ەگەمەن قازاقستان»