قازاق ءتىلىنىڭ قادىرىن ارتتىرىپ, كوسەگەسىنىڭ كوگەرۋىنە ءىس قاعازدارى مەن رەسمي قۇجاتتاردىڭ مەملەكەتتىك تىلدە جۇرگىزىلۋىنىڭ كومەگى كوپ قوي. بيىلعى جىلدىڭ 9 ايىندا جامبىل وبلىسى اكىمىنىڭ اپپاراتىنان, اۋداندار مەن تاراز قالاسى اكىمدىكتەرىنەن جولدانعان شىعىس قۇجاتتارى 100 پايىز مەملەكەتتىك تىلدە ورىندالىپتى. تەك, سارىسۋ اۋدانى اكىمدىگىنەن شىققان قۇجاتتاردىڭ قازاق تىلىندەگىسى 99,0 پايىزدى, قورداي – 97,0, مەركى – 95,0 پايىزدى قۇراعان. باسقارمالاردىڭ دا بارلىعىندا دەرلىك بۇل تالاپتىڭ ورىندالۋى 100 پايىزدى قۇرايدى.
جامبىل وبلىسىنداعى 7524 مەملەكەتتىك قىزمەتشىنىڭ 7242-ءى مەملەكەتتىك ءتىلدى جەتىك مەڭگەرگەن. 231-ءى وقىپ تۇسىنە الاتىندار, ال 51 مەملەكەتتىك قىزمەتشى مەملەكەتتىك ءتىلدى مۇلدەم بىلمەيدى. مەملەكەتتىك ءتىلدى مۇلدەم مەڭگەرمەگەن قىزمەتشىلەر نەگىزىنەن جامبىل وبلىسى ىشكى ىستەر دەپارتامەنتى مەن جامبىل وبلىسىنىڭ قورعانىس ىستەرى جونىندەگى دەپارتامەنتىندە جۇمىس اتقارادى ەكەن.
سونداي-اق, مەركى, مويىنقۇم اۋداندارىنىڭ مادەنيەت جانە تىلدەردى دامىتۋ بولىمدەرىندە 2014-2016 جىلدارعا ارنالعان ءىس-شارالار جوسپارىنىڭ ورىندالۋى تۋرالى جيناق پاپكالارى مۇلدەم جوق. ياعني, مەملەكەتتىك باعدارلامانىڭ ورىندالۋى بارىسىندا اۋىلدىق وكرۋگتەرمەن جۇرگىزىلگەن جۇمىستار تۋرالى مالىمەت جوق دەگەن ءسوز. ال اۋدان, اۋىلدىق وكرۋگ اكىمدەرىنىڭ قولدارىمەن جولدانعان شىعىس حاتتاردا ورەسكەل گرامماتيكالىق قاتەلەر ءورىپ ءجۇر. ءتىپتى, جولدانعان حاتتاردىڭ باسىم بولىگىندە حاتتىڭ باسى جانە سوڭى مەملەكەتتىك تىلدە, نەگىزگى ءماتىنى مەن قوسىمشا كەستەلەرى ورىس تىلىندە جازىلعاندارى دا بولىپتى.
وسى رەتتە وبلىستاعى مەملەكەتتىك قىزمەتشىلەر اراسىندا العاش رەت ءتىل ساۋاتتىلىعىن ارتتىرۋ جانە ورفوگرافيالىق ءتىل نورمالارىنا ءمان بەرۋ, ساۋاتتى قوعام بولۋدىڭ ماڭىزدىلىعىنا نازار اۋدارۋ ماقساتىندا «ءتىل ساۋاتتىلىعى – باستى مىندەت!» اتتى ونلاين رەجىمىندە اشىق جاپپاي ديكتانت جازۋ اكتسياسى ءوتكەن. بۇل اكتسياعا بارلىق اۋدان مەن تاراز قالاسىنان 700-گە جۋىق مەملەكەتتىك قىزمەتشى قاتىسىپ, ناتيجەسىندە ءۇش-اق قىزمەتشى بارلىق ءماتىندى قاتەسىز ورىنداپ, «5» دەگەن باعا الىپتى. سونداي-اق, 57 قىزمەتشىگە «4» دەگەن باعا, 161-ىنە «3» دەگەن باعا قويىلعان. ال 447 قىزمەتشى, ياعني قاتىسۋشىلاردىڭ 67 پايىزى «ەكىلىك» ارقالاپ قايتقان.
– ءۇش ءتىلدى وقىتۋ كۋرستارىنا 2347 تىڭداۋشى تارتىلعان, – دەيدى جامبىل وبلىستىق تىلدەردى دامىتۋ باسقارماسىنىڭ باسشىسى عاليا بورانباەۆا. – ال مەملەكەتتىك ءتىلدى وقىتۋ كۋرسىندا 1526 تىڭداۋشى وقۋدا. بيىل تىلدىك ورتا قالىپتاستىرۋ ماقساتىندا تاراز قالاسى مەن اۋداندىق بولىمشەلەردە ءۇش ءتىل بويىنشا (قازاق, ورىس جانە اعىلشىن ءتىلى) تىڭداۋشىلار اراسىندا قوسىمشا ۇيىرمە جۇمىستارى ۇيىمداستىرىلدى. قازىرگى تاڭدا ۇيىرمەلەرگە جازىلعان تىڭداۋشىلاردىڭ سانى – 284 ادام. بارلىق كۋرستار اپتاسىنا ءبىر رەت ءجۇرگىزىلەدى. ايتسە دە, تىڭداۋشىلاردىڭ وقىتۋ كۋرستارىنا قاتىسۋ دەڭگەيى كوڭىل كونشىتپەيدى. كۋرستارعا جازىلا تۇرا, ءتۇرلى سىلتاۋلارمەن تولىق اياقتاماي, ساباق كەلەسى كۇنگە جىلجىتىلىپ, وقىتۋ مەرزىمى ۇزارتىلۋدا. وسىعان بايلانىستى, مەكەمە باسشىلارى تاراپىنان وسى ماسەلەگە نازار اۋدارىپ, وقۋ پروتسەسىنە تىڭداۋشىلاردىڭ تولىق قاتىسۋىن مىندەتتەۋ جانە باقىلاۋ جۇرگىزۋ قاجەت دەپ سانايمىن.
قالاي ايتساق تا, مەملەكەتتىك ءتىلدىڭ قولدانىلۋ اياسىن كەڭەيتۋ, مارتەبەسىن كوتەرۋ مەن ماڭىزدىلىعىن كەڭىنەن ناسيحاتتاۋ جۇمىسى جىل وتكەن سايىن جاندانىپ كەلەدى. بيىل ءتىل ساياساتىن جۇزەگە اسىرۋعا بولىنگەن قاراجات 2012 جىلمەن سالىستىرعاندا 46,3 پايىزعا ءوستى. جامبىل وبلىسىنداعى 87 ەتنوستان قۇرالعان 304 951 وزگە ۇلت وكىلدەرىنىڭ 61 پايىزعا جۋىعى – قازاق ءتىلىن ەركىن مەڭگەرگەندەر. بۇل وزگە ۇلت ۇلىستارىنىڭ مەملەكەتتىك ءتىلدىڭ كەلەشەكتەگى تولىققاندى سۇرانىسىنا سەنىپ, جارقىن بولاشاعىنا ءۇمىت ارتۋىنىڭ بىردەن-ءبىر دالەلى بولسا كەرەك.
ورالحان ءداۋىت,
«ەگەمەن قازاقستان»
جامبىل وبلىسى