اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى اياسىندا كووپەراتيۆتەرگە بىرىگەتىن فەرمەرلەرگە 6 پايىزدىق نەسيەلەر بەرىلەدى. بۇدان بولەك, كووپەراتيۆكە ساتىپ الىنعان قوندىرعىلاردىڭ 50 پايىزى مەملەكەتتىڭ ەسەبىنەن وتەلەدى, دەپ xابارلايدى قازاقپارات.
"مىسالى, ءسۇت كووپەراتيۆى قۇرىلاتىن بولسا, ول جەردە ءسۇت قابىلداۋ بەكەتى اشىلادى. ونىڭ قۇنى ورتاشا ەسەپپەن 4,5-5 ميلليون تەڭگە دەيىك. سونى ساتىپ الۋعا بەرىلەتىن نەسيە 6 پايىزبەن بەرىلەدى. كەپىلزات قويۋدىڭ قاجەتى جوق. سەبەبى ءسۇت قابىلداۋ قوندىرعىنىڭ ءوزى كەپىلزات بولىپ سانالادى. ونى ليزينگكە بەرەدى. سوسىن وعان كەتكەن اقشانىڭ 30 پايىزى مەملەكەتتىڭ ەسەبىنەن وتەلەدى. ەندى, قازىرگى ەرەجە بويىنشا 30 پايىز بولىپ تۇر. دەگەنمەن, كەلەسى جىلدان باستاپ ءبىز ەرەجەنى وزگەرتىپ, 50 پايىزعا دەيىن كوتەرۋدى جوسپارلاپ وتىرمىز. وسىلايشا, ءسۇت قابىلداۋ قوندىرعىسىن ساتىپ الساڭىز, ونىڭ 2,5 ميلليون تەڭگەسىن مەملەكەت تولەسە, قالعانى نەسيە رەتىندە بەرىلەدى", - دەدى مينيسترلىكتىڭ مال شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەتىنىڭ ديرەكتورى ەركەبۇلان اxمەتوۆ.
بۇدان بولەك, كوكتەمگى ەگىستىك جۇمىستارىنا بەرىلەتىن نەسيەنىڭ پايىزدىق مولشەرلەمەسى 7,4-تەن 3-كە دەيىن تومەندەتىلەدى دەگەن جوسپار بار. ايتا كەتەيىك, بۇگىن ۇكىمەت مۇشەلەرى اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىن ماقۇلدادى.
"جاقىندا "اگروبيزنەس - 2020" باعدارلاماسىنا وزگەرىس ەنگىزىلىپ, 2013-2017 جىلدارعا دەيىن قىسقارتىلدى. سونىڭ ورنىنا مينيسترلىك جاڭا مەملەكەتتىك باعدارلامانى ازىرلەدى. اتالعان باعدارلاما كەيىنگى 2017-2021 جىلداردى قامتيدى. بۇگىن ۇكىمەت ساعاتىندا ول باعدارلاما تانىستىرىلىپ, قابىلداندى", - دەيدى ە.اxمەتوۆ.
مينيسترلىكتىڭ ءباسپاسوز قىزمەتى xابارلاۋىنشا, بۇگىن ۇكىمەت جاڭا باعدارلاما بويىنشا ارنايى قاۋلىنى قابىلداپ, ارى قاراي پرەزيدەنت اكىمشىلىگىنە جىبەردى.