الماتىنىڭ «قايرات» كومانداسىندا ونەر كورسەتەتىن يۆۋار ويىنشىسى جەرار گوۋ قىزىقتى سۇحبات بەردى. ءسوز اراسىندا ول «الماتىداعى ءوز ستاديونىمىزدا ويناعان قاتتى ۇنايدى. جانكۇيەرلەرىمىزدىڭ قولداۋىنان ەرەكشە شابىت الىپ, بار ونەرىمدى پاش ەتكەننەن اسقان باقىت جوق», – دەپ ءوز اسەرىمەن ءبولىستى. بۇل تۋرالى fckairat.com حابارلادى.
الەمگە ايگىلى قانداي اياقدوپشىلارمەن ءبىر كوماندادا ويناعىڭ كەلەدى دەگەن سۇراققا: «مەن ونسىز دا تانىمال فۋتبولشىلارمەن ويناپ ءجۇرمىن. اناتولي تيموششۋك, اندرەي ارشاۆين ءبىر كەزدەرى ەۋروپا ارەناسىندا اتوي سالعان جىگىتتەردىڭ ءبىرى بولاتىن. قازىر بىزبەن بىرگە. بۇعان دەيىن ۇساق كوماندالاردا ويناعانمىن. بۇگىندە جاعدايىم الدەقايدا كەرەمەت», – دەدى يۆۋار ويىنشىسى.
«كەلىسىمشارتىمنىڭ اياقتالۋىنا تۋرا ءبىر جىل قالدى. ونى ارى قاراي ۇزارتۋىم ۇلكەن باسشىمىزعا بايلانىستى. تاڭداۋ ەركى وزىمدە بولسا, الماتىدا قۋانا-قۋانا قالار ەدىم. ءبىز ۇلكەن وتباسى سياقتىمىز. اعايىندىلاردىڭ اراسىندا قانداي بايلانىس بولسا, ءبىز دە ءدال سولاي ارالاسامىز», – دەدى جەرار گوۋ.
فۋتبولشىلاردىڭ ەسىندە قالار ءبىر گولى بولادى. مىسالى, ارگەنتينانىڭ ايگىلى شابۋىلشىسى ليونەل مەسسي كەزەكتى ەۋروپانىڭ ۇزدىك ويىنشىسىنا بەرىلەتىن سىيلىقتى الار تۇستا چەمپيوندار ليگاسىنىڭ 2009 جىلعى فينالىندا «مانچەستەر يۋنايتەدكە» سوققان دوبىن اتاعان بولاتىن. ال گوۋدىڭ قاي گولى ەسىندە قالىپتى؟
«قاي گولىمنىڭ ماڭىزى جوعارى ەكەنىن ويلانباپپىن. مەنىڭشە, ءبارىنىڭ ورنى ەرەكشە. سەبەبى, الاڭعا شىققانداعى باستى جۇمىسىم – قارسى قاقپاعا دوپ سوعۋ. ىلعي دا وزىمە ءوزىم «سەن تەك قانا گول سالۋ كەرەكسىڭ» دەپ جۇرەمىن. ءبىر ماتچتا پوكەر (4 گول) جاساسام دا ماعان ازدىق ەتىپ تۇرادى», – دەدى ول.
ءار ادامنىڭ مىنەزى ارقيلى. يۆۋاريالىق سپورتشى ارىپتەستەرى جونىندە پىكىرىن ءبىلدىردى:
«ۇجىمىمىز قالجىڭدى جاقسى كورەدى. اسىرەسە, اناتولي تيموششۋك پەن قۋات يسلامبەك وتە كوڭىلدى جۇرەدى. ءازىلىم جاراسقان دوستارىمنىڭ ءبىرى وسى ەكى جىگىت. قۋات ىلعي دا كۇرەسپەك بولىپ, ماعان قاراي ۇمتىلادى. بىراق ونىسىنان تۇك شىقپايدى. ال تيموششۋكتىڭ جاسىنىڭ ۇلكەندىگىنە بولا «ەي, اتا» دەپ قاعىتامىز», – دەدى گوۋ.
27 جاستاعى فۋتبولشىنىڭ ءبىر ەرەكشەلىگى كوڭىل كوتەرىپ, ساۋىق-سايران قۇرعاندى ۇناتپايدى ەكەن. «مەن قىدىرعاندى اسا قاتتى ۇناتپايمىن. ماتچتان كەيىن نەمەسە جاتتىعۋلار اياقتالعان سوڭ ءوز ۇيىمدە بولعاندى ۇناتامىن. دوستارىم شاقىرعاندا بولماسا مەنى ىزدەگەن جان ۇيىمنەن عانا تابا الادى», – دەدى ول.
فۋتبولعا جانى قۇمار ادامنىڭ تانىمال اياقدوپشىلارعا ەلىكتەيتىنى و باستان بەلگىلى. ولاردىڭ قاتارىندا كاسىبي فۋتبولشىلار دا جوق ەمەس. ال جەراردىڭ ءپىر تۇتار ويىنشىسى كىم ەكەن؟
«ول قازىر فۋتبولداعى مانسابىن اياقتاعان. بۇل سپورتقا العاش قادام باسقاندا برازيليالىق رونالدونىڭ ويىنىن ءسۇيىپ كورەتىنمىن. كەيىنىرەك وتانداسىم, «چەلسيدىڭ» اڭىزىنا اينالعان ديدە دروگباعا دا قىزىعاتىن بولدىم», – دەدى ول.
قازاقستانعا كەلگەنگە دەيىن جەرار گوۋ تۇركيانىڭ 1 ليگاسىندا دا ونەر كورسەتكەن. سۇحبات بارىسىندا ول ەكى چەمپيوناتتى سالىستىرىپ, ءوز باعاسىن بەردى.
«مەنىڭشە, تۇركيا بىرىنشىلىگى مىقتىراق. چەمپيوندىق اتاق ءۇشىن بىرنەشە كوماندا جان الىپ, جان بەرۋگە دايىن تۇرادى. ال قازاقستاندا 2-3 كلۋب بەلسەندىلىك تانىتسا, قالعاندارى لايىقتى ويىن كورسەتە المايدى. ناقتىراق ايتقاندا, سوڭعى جىلدارى تەك «قايرات» پەن «استانانى» عانا كورىپ ءجۇرمىز. مىنە, قوس ەلدىڭ فۋتبولىنداعى ايىرماشىلىق وسىدا. بىراق وسى قارقىنىمەن جالعاستىرار بولسا, قازاقستان چەمپيوناتى داميتىنىنا سەنىمىم مول», – دەيدى فۋتبولشى.
سۇحبات بارىسىندا جەرەر گوۋ العاش رەت ماڭداي تەرىمەن تاپقان اقشاسى تۋرالى, ونى قايدا جۇمساعانى تۋرالى دا ايتتى.
«تەپە-تەڭ ءبولىپ, اكە-شەشەمە بەردىم (ك ۇلىمسىرەپ وتىرىپ, ەسىنە الدى). ول كەزدەگى سەزىمىمدى سوزبەن ايتىپ جەتكىزە المايمىن. اتا-اناما كىشكەنە دە بولسىن سەپتىگىمدى تيگىزگىنىمە قۋاندىم», – دەيدى «قايرات» ويىنشىسى.
كاسىبي فۋتبولعا قادام باسقان سپورتشى مانسابى اياقتالعانعا دەيىن الاڭنىڭ ءبىر بولىگىندە عانا ونەر كورسەتپەيتىنى بەلگىلى. ماسەلەن, يسپانيانىڭ «بارسەلونا» ساپىندا ورتالىق قورعاۋشى بولىپ جۇرگەن جەرار پيكە ءبىر كەزدەرى ورتالىق شابۋىلشى بولىپتى. ال «رەالدىڭ» قازىرگى جۇلدىزدارىنىڭ ءبىرى گارەت بەيل «توتەنحەمدە» جۇرگەنىندە سول قاپتالدىڭ قورعاۋشىسى بولعان. جەرار گوۋ دا ءوز پوزيتسياسىن بىرنەشە رەت اۋىستىرىپتى:
«بالا كۇنىمدە ورتالىق قورعاۋشى رەتىندە باستادىم. سودان كەيىن سول قاپتالعا اۋىستىم. كوپ ۇزاماي ورتالىق جارتىلاي قورعاۋشى بولدىم. ءبىر كۇنى جاتتىقتىرۋشىم كەلىپ, «سەنىڭ دەنە تۇرقىڭ ءىرى, كۇشىڭ دە كوپ. العا شىق تا بارىپ, گول سوق. قانداي ناتيجە كورسەتەتىنىڭ ماڭىزدى ەمەس. ايتقانىمدى ورىندا. ەندى مەنىڭ شابۋىلشىم بولاسىڭ» دەدى. مىنە, وسىدان كەيىن فورۆارد رەتىندە ءوزىمدى جاقسى قىرىمنان كورسەتە باستادىم», – دەدى گوۋ.
فۋتبولشىلار اراسىندا قىزىق ءبىر جايت بار. ءوز كومانداسى قانداي دا ءبىر جەتىستىككە جەتسە, سونىڭ قۇرمەتىنە دەپ شاشىن باسقا تۇسكە بوياپ الادى, ءتىپتى تاقىرلاپ الىپ تاستايدى نەمەسە دەنەسىنە تاتۋ سۋرەت سالىپ الادى.
«مەن مۇسىلمان اداممىن. سەنىمىمە بايلانىستى تانىمە سۋرەت سالا المايمىن. ەگەر قازاقستان بىرىنشىلىگىندە چەمپيون بولساق نەمەسە ەۋروپا ليگاسى مەن چەمپيوندار ليگاسىنىڭ بىرەۋىنىڭ توپتىق كەزەڭىنە جولداما الساق فرانتسيالىق پول پوگبا سەكىلدى شاش ۇلگىمە وزگەرىس ەنگىزەمىن بە دەپ ويلاپ وتىرمىن», – دەدى.
جەرار گوۋدىڭ تالانتىنا ءشۇبا كەلتىرۋگە بولماس. ەل بىرىنشىلىگىنىڭ سوڭعى ەكى ماۋسىمىندا 22 گولدان سوعىپ, بومباردير اتاندى. جانكۇيەرلەردىڭ ءبىرى قازاقستان ۇلتتىق قۇراماسىنىڭ ساپىندا ونەر كورسەتكىسى كەلەدى مە دەگەن سۇراققا: «شىنىمدى ايتسام, بىلمەيمىن. ەگەر مۇندا تاعى ءبىر جىلعا قالسام, ازاماتتىق الۋعا مۇمكىندىگىم بولادى. ال ەگەر شاقىرتۋ ءتۇسىپ جاتسا, باس تارتپايتىنىم انىق. قايتا مۇنداي مۇمكىندىكتىڭ بولعانىنا قۋانار ەدىم. ال ءوز ەلىمنىڭ قۇراماسىنا كەلەر بولسام, ول جاققا جولداما الۋ قيىننىڭ قيىنى. ماعان قاراعاندا تاجىريبەسى كوپ فۋتبولشىلار جەتەرلىك», – دەدى «قايرات» شابۋىلشىسى.
گوۋ «قايرات» ساپىندا ءجۇرىپ, ۇمىتىلماستاي بولىپ قالعان ماتچى ەسىنە ءتۇسىرىپ, سۇحباتىن قورىتىندىلادى.
«وتكەن جىلى الماتىداعى «بوردوعا» قارسى كەزدەسۋدى ەشقاشان ۇمىتپاسپىن. بىزگە كىشكەنە عانا ساتتىلىك جەتىسپەدى. ازداپ جيناقىلىق تانىتقانىمىزدا ءوز تاريحىمىزدا العاش رەت ەۋروپا ليگاسىنىڭ توپتىق كەزەڭىنە جولداما الار ەدىك», – دەپ اياقتادى ءسوزىن.