قازاقستان ەلدەگى ءىرى بانكتەردىڭ ءبىرى – قازكوممەرتسبانككە 1,5 ترلن تەڭگە ($4,5 ملرد) قارىز بەرۋى مۇمكىن. بۇل تۋرالى دەرەككوزگە سىلتەمە جاساعان Bloomberg حابارلايدى.
Bloomberg-ءتىڭ حابارلاۋىنشا قازكوممەرتسبانك قازىردىڭ وزىندە مەملەكەتتەن قارىز الا باستاعان. مىسالى: 15 جەلتوقساننان باستاپ مەملەكەتتەن 400 ملرد تەڭگە قارىز العان.
«مەملەكەتتىك ورگاندارعا قازكوممەرتسبانكتىڭ قۇلدىراۋىنا جول بەرمەۋ تاپسىرىلعان. سوندىقتان بانكتى قۇتقارۋدىڭ ءتۇرلى جولدارى قاراستىرىلۋدا» دەپ جازادى باسىلىم.
بۇل ماسەلەگە قاتىستى قازكوممەرتسبانك پەن ۇلتتىق بانك وكىلدەرى اقپارات بەرۋدەن باس تارتقان.
باسىلىمنىڭ جازۋىنشا قازكوممەرتسبانكتى قۇتقارۋدىڭ تاعى ءبىر جولى — حالىق بانكىمەن بىرىگۋ.
بۇل رەتتە حالىق بانكى ەگەر مەملەكەت قازكوم بالانسىنداعى مينۋس بولىپ تۇرعان 1,5 ترلن تەڭگەنى بەرۋگە كەلىسسە, وندا بانكتى قوسىپ الۋ باعىتىندا كەلىسسوز جۇرگىزۋى مۇمكىن, دەيدى Bloomberg.
ەسكە سالايىق, قاراشا ايىندا نۇرسۇلتان نازارباەۆ Bloomberg-كە بەرگەن سۇحباتىندا مەملەكەت قازكوممەرتسبانكتىڭ قۇلدىراۋىنا جول بەرمەيتىنىن ايتقان بولاتىن. ول كەزدە قۇتقارۋدىڭ 2 نۇسقاسى ايتىلعان ەدى.
ءبىرى بانك اكتسيونەرلەرى اكتيۆتەرىن ۇلعايتۋعا قاراجات تابادى, ەكىنشىسى مەملەكەتتەن كومەك سۇرايدى. قازكوممەرتسبانك 2016 جىلدىڭ قاڭتار-قىركۇيەك ايلارىنىڭ ناتيجەسى بويىنشا 34 بانك ىشىندە اكتيۆتەرى بويىنشا 1-ءشى ورىنعا يە بولدى.