قىزىلوردا وبلىستىق دەنساۋلىق ساقتاۋ باسقارماسى مەديتسينالىق قىزمەتتىڭ ۋاقىتىندا كورسەتىلۋى, ونىڭ قولجەتىمدىلىگى, سونداي-اق ساپالىلىعى ءۇشىن جۇيەلى كەشەندى ۇلگى قۇرىلىمىن قالىپتاستىرىپ جاتىر. بۇل تۋرالى قىزىلوردا وبلىسىنىڭ دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا حابارلادى.
«وسى ۇلگىنى جۇزەگە اسىرۋ ءۇشىن جالپى ءولىم-ءجىتىم سەبەپتەرىنىڭ 52%-ىن قۇرايتىن اۋرۋلاردىڭ 5 نەگىزگى نوزولوگياسى بويىنشا (ميوكارد ينفاركتى, مي قان اينالىمىنىڭ بۇزىلۋى (ينسۋلت), قاتەرلى ىسىكتەر, جاراقاتتار, جۇكتى ايەلدەر مەن پەريناتالدىق كەزەڭنىڭ پاتولوگيالارى) جول كارتالارى ازىرلەندى. ءار جول كارتاسى بويىنشا سىرقاتتىڭ جاي-كۇيىنە, مەديتسينالىق كومەك كورسەتۋ ساپاسىنا, ماماندار مەن ماتەريالدىق-تەحنيكالىق رەسۋرستاردىڭ قامتاماسىز ەتىلۋىنە باعالاۋ جۇرگىزىلدى. وسىعان بايلانىستى ءبىرىنشى دەڭگەيدەگى بمسك (ەمحانالاردا) ۇيىمداردا بارلىق 5 باعىت بويىنشا 89 مامانداندىرىلعان كابينەت اشىلدى», – دەدى اقمارال ءالنازاروۆا.
ەكىنشى دەڭگەيدە كومەك كورسەتۋدە اۋىر ەكستراگەنيتالدى اۋرۋلارمەن بوسانعاندارعا, جاراقات العاندارعا, ينسۋلت العان ناۋقاستارعا وڭالتۋ جۇمىستارىن جۇرگىزۋ ءۇشىن رەابيليتاتسيالىق جانە قايتا قالپىنا كەلتىرۋ بولىمشەلەرى اشىلدى. بارلىق اۋداندىق اۋرۋحانالاردا اۋدانارالىق تراۆماتولوگيالىق بولىمشەلەردى مەديتسينالىق قۇرال-جابدىقتارمەن جابدىقتاۋ جۇمىستارى جۇرگىزىلدى. وسى جىلدىڭ باسىنان باستاپ, قاتەرلى ىسىككە شالدىققان اۋىر ناۋقاستاردىڭ ءومىرىن ۇزارتۋ, كۇتۋگە باعىتتالعان پاللياتيۆتىك كومەك كورسەتۋ ءۇشىن ونكولوگيا ورتالىعىندا 30 توسەككە پاللياتيۆتىك بولىمشە (حوسپيس) اشىلدى جانە اۋداندىق اۋرۋحانالاردا ارنايى 35 توسەك-ورىن ءبولىندى.