«جالتىربۇلاق» كومپانياسى قاراعاندى وبلىسىنداعى جالتىربۇلاق كەن ورنىندا التىن كەنىن شوعىرلى سىلتىسىزدەندىرۋ قوندىرعىلارى كەشەنىن جانە قۇرامىندا التىن بار كەندى وڭدەۋ ءمودۋلىن ىسكە قوستى. بۇل تۋرالى «ينتەرفاكس-كازاحستان» حابارلايدى.
«التىن كەنىن وڭدەۋ ناتيجەسىندە قۇرامىندا 75% التىنى بار دورە قورىتپاسىن الۋ كوزدەلگەن. بىرەگەي دايىن ءونىمدى قازاقستاننىڭ ۇلتتىق بانكى ساتىپ الماقشى», – دەلىنگەن حابارلامادا.
جوبانىڭ جالپى قۇنى – 3,4 ملرد تەڭگە, ونىڭ 2,4 ملرد تەڭگەسى دەربەس قاراجات بولسا, 1 ملرد تەڭگەسى قارىز كوزدەرىنەن تارتىلعان. كاسىپورىن جىلىنا 500 مىڭنان استام كەن وڭدەۋگە قاۋقارلى. دايىن ءونىمدى ساتۋ بويىنشا جىلدىق اينالىمى 2 ملرد تەڭگە شاماسىندا.
جالتىربۇلاق جوباسى 2010 جىلى قولعا الىنعان, نىساننىڭ قۇرىلىسى 2016 جىلدىڭ باسىندا باستالدى. جالتىربۇلاق كەن ورنىنىڭ گەولوگيالىق كولەمى 20 شارشى شاقىرىم, ونىڭ ىشىندە بارلانعانى – 1 شارشى شاقىرىم.