قازاقستان مەكتەپتەرىنىڭ 76 پايىزى ينتەرنەتپەن قامتىلعان. بۇل تۋرالى بۇگىن ورتالىق كوممۋنيكاتسيالىق قىزمەتىندە وتكەن بريفينگتە بىلىم جانە عىلىم مينيسترلىگىنىڭ ۆيتسە-ءمينيسترى ەلميرا سۋحانبەرديەۆا مالىمدەدى.
«مەكتەپتەردى دۇنيەجۇزىلىك عالامتور جەلىسىنە قوسۋ بويىنشا اۋقىمدى جۇمىستار اتقارىلدى. كەڭجولاقتى عالامتورمەن قامتاماسىز ەتۋ مەكتەپتەردىڭ 76% قۇرايدى. 2001 جىلى 1 كومپيۋتەرگە 62 وقۋشى كەلسە, قازىرگى تاڭدا بۇل كورسەتكىش 1:11 قۇرايدى. مەكتەپتەردە «ونلاين وقىتۋ جۇيەسى» جوباسى ەنگىزىلۋدە», - دەدى ۆيتسە-مينيستر.
ونىڭ ايتۋىنشا, رەسپۋبليكادا ءار ءتورتىنشى وقۋشى قوسىمشا ءبىلىم بەرۋمەن قامتاماسىز ەتىلەدى, بالالاردى قامتۋ 389 مىڭ بالاعا ۇلعايدى جانە 673 مىڭ ادامنان اسادى.