وبلىستىق حالىق شىعارماشىلىعى ۇيىندە تاۋەلسىزدىكتىڭ 25 جىلدىق مەرەيتويىنا ارنالعان «تەرمە دەگەن ناقىل ءسوز» اتتى وبلىستىق جىرشى-تەرمەشىلەر بايقاۋى ءوتتى. وڭىرىمىزدەگى حالىق شىعارماشىلىعى ءۇيى جۇمىسىنىڭ باستى باعىتتارىنىڭ ءبىرى – حالىق ونەرىن كەڭىنەن ناسيحاتتاۋ, وسكەلەڭ ۇرپاققا قازاق حالقىنىڭ مادەنيەتى مەن داستۇرلەرىنە دەگەن قىزىعۋشىلىعىن ارتتىرۋ. مۇندا وسىعان سايكەس 2016 جىلعى ماۋسىم ايىنان باستاپ جىرشى-تەرمەشىلەر مەكتەبى ءوز جۇمىسىن باستادى. بۇل ونەر مەكتەبىنىڭ جەتەكشىسى – بەلگىلى اقىن, قازاقستان جۋرناليستەر وداعىنىڭ مۇشەسى ەسەنتۇگەل ءازي. از ۋاقىت ىشىندە جىرشى-تەرمەشىلەر مەكتەبى كوپتەگەن يگى ىستەردى تىندىردى. اتاپ ايتساق, بارلىق اۋدانداردا جىرشى-تەرمەشىلەر بايقاۋى وتكىزىلىپ, شىعارماشىلىق سەمينارلار مەن كەزدەسۋلەر ۇيىمداستىرىلدى. الدا رەسپۋبليكالىق, حالىقارالىق بايقاۋلاردى وتكىزۋ جانە كىتاپ شىعارۋ كوزدەلۋدە.
بۇل جولعى ونەر سايىسىنىڭ ماقساتى باعزىدان كەلە جاتقان جىرشىلىق ونەردى كەڭىنەن دارىپتەۋ, كەشەگى دانا بابالاردىڭ اسىل مۇرالارىن جاستاردىڭ جۇرەگىنە جەتكىزۋ بۇگىننىڭ ەنشىسى ەكەنىن ەسكەرە وتىرىپ, ءوڭىر اقىن-جىراۋلارىنىڭ ماقام-سازدارى مەن قۇندى شىعارمالارىن جيناقتاپ, كەڭىنەن ناسيحاتتاپ, جاس ءانشى, جىرشىلاردى تاربيەلەۋگە جول اشۋ بولىپ تابىلادى. جىرشىلىق ءداستۇرىن كەڭىنەن ناسيحاتتاپ, كەلەشەك ۇلانداردىڭ ساناسىنا قۇيىپ, وتاندى سۇيۋگە تاربيەلەۋ, سول ارقىلى ءتالىم-تاربيە بەرىپ, ۇلتتىق رۋحتى كوتەرۋ. ۇلتتىق ونەردىڭ مايەگى بولىپ تابىلاتىن جىر جانە تەرمەنى دامىتۋ جاستارىمىزدى يبالىلىق پەن يماندىلىققا جەتەلەيتىنى ءسوزسىز. بايقاۋعا وبلىسىمىزدىڭ قارعالى, ەمبى, حرومتاۋ, ايتەكە بي, مارتوك اۋداندارىنان تەرمەشى – جىرشى ونەرپازدار مەن اقتوبە قالاسىنداعى ۇستازدىق ەتىپ جۇرگەن جىرعا جانى قۇمار جاستار قاتىستى.
بايقاۋ قورىتىندىسى بويىنشا دينارا شىنارباەۆا ءبىرىنشى ورىندى جەڭىپ السا, حرومتاۋلىق ەستاي وتەۋليەۆ ەكىنشى ورىندى يەلەندى, ال, ءۇشىنشى ورىن اقتوبەلىك جاسۇلان قاسىموۆقا بۇيىردى. جەڭىمپاز بەن جۇلدەگەرلەرگە سىي – سياپات جاسالدى.
ساتىبالدى ءساۋىرباي, «ەگەمەن قازاقستان».
اقتوبە.