كەشە پرەمەر-ءمينيستردىڭ ورىنباسارى يمانعالي تاسماعامبەتوۆتىڭ توراعالىعىمەن قازاقستان رەسپۋبليكاسىنىڭ ۇلتتىق برەندىن انىقتاۋ بويىنشا بايقاۋدىڭ ساراپشىلىق كەڭەسىنىڭ وتىرىسى ءوتتى, دەپ حابارلايدى پرەمەر-ءمينيستردىڭ رەسمي سايتى.
قازىرگى ۋاقىتتا وڭىرلىك برەندينگ كوپ جاعدايدا مەملەكەتتىڭ تۋريستىك جانە ينۆەستيتسيالىق تارتىمدىلىعىنىڭ دەڭگەيىن انىقتايدى, ولاردىڭ ونىمدەرىنىڭ تانىمالدىعىن ارتتىرىپ, حالىقارالىق ارەناداعى بەدەلىنە جانە عالامدىق ەڭبەك بولىنىسىندەگى ورنىنا ىقپال ەتەدى.
«سوڭعى جىلدارى الەمدە ۆيزۋالدى گرافيكا كەڭىنەن قولدانىلۋدا. ادامنىڭ 80 پايىزى اقپاراتتى كورۋ ارقىلى الادى. كاسىبي ماركەتولوگتار بۇرىننان بەرى ءوز جۇمىستارىن وسى قاعيدانىڭ نەگىزىندە جۇرگىزىپ كەلەدى. سوندىقتان, بۇگىنگى تاڭدا مالىمەتتى تەز ۇعىنۋ ءۇشىن ينفوگرافيكا, فوتو-بەينە ماتەريالدارعا باسىمدىق بەرىلۋى كەزدەيسوق ەمەس», دەپ اتاپ ءوتتى وتىرىس بارىسىندا ۆيتسە-پرەمەر يمانعالي تاسماعامبەتوۆ.
ەسكە سالا كەتەيىك, قازاقستاننىڭ حالىقارالىق ارەناداعى وڭ كەلبەتىن قالىپتاستىرۋ جانە تانىمالدىعىن ارتتىرۋ, قازاقستاندىق ەرەكشە تۋريستىك ورىنداردى اقپاراتتىق قولداۋ, شەتەلدىك ينۆەستيتسيا تارتۋ ماقساتىندا ۇيىمداستىرىلعان قازاقستان رەسپۋبليكاسىنىڭ ۇلتتىق برەندىن انىقتاۋ جونىندەگى رەسپۋبليكالىق بايقاۋ 31 تامىزدا باستالدى. بايقاۋعا قاتىسۋشىلاردان قازاقستاننىڭ الەمدىك كەڭىستىكتە تانىمالدىعىن ارتتىرۋدا قولدانىلاتىن لوگوتيپ نەمەسە ەمبلەما جوباسىن جانە وعان ۇران ءسوزدى قوسا ۇسىنۋ تالاپ ەتىلدى.
ۇيىمداستىرۋ كوميتەتىنە ازاماتتاردان بارلىعى 1000-نان اسا جوبا كەلىپ ءتۇستى. قازىرگى ۋاقىتتا بايقاۋدىڭ I كەزەڭى – ينتەرنەت قولدانۋشىلارىنىڭ داۋىس بەرۋى اياقتالدى. ونىڭ اياسىندا قازاقستاندىقتار ءوزدەرىنە ۇناعان جوباعا داۋىس بەردى. ەكىنشى كەزەڭ – ينتەرنەت داۋىس بەرۋ ناتيجەسىندە ىرىكتەلگەن ۇزدىك جوبالار ساراپشىلىق كەڭەستە تانىستىرىلدى.
اتاپ ايتقاندا, ساراپشىلىق كەڭەستىڭ قاراۋىنا داۋىس بەرۋ ناتيجەسىندە ەڭ كوپ داۋىس جيناعان 40 جۇمىس ۇسىنىلدى. ساراپشىلار بۇلاردىڭ ىشىنەن ۇزدىك 10 جوبانى تاڭداپ الادى. بايقاۋ ەرەجەسىنە سايكەس قازاقستان رەسپۋبليكاسىنىڭ ۇلتتىق برەندى – رەسمي لوگوتيپى مەن ۇرانى قالىڭ كوپشىلىككە تانىستىرىلادى.
ساراپشىلىق كەڭەس قۇرامىنا تانىمال ساياسات جانە قوعام قايراتكەرلەرى, مەملەكەتتىك ورگاندار وكىلدەرى, مادەنيەت پەن ونەر قايراتكەرلەرى كىرەدى.
ساراپشىلىق كەڭەستىڭ شەشىمىمەن كەلەسى وتىرىس تۋرا ءبىر ايدان كەيىن وتكىزىلەدى, وندا ۇسىنىلعان فينالدىق جوبالار قارالادى.