سولتۇستىك وڭىردە 2,5 مىڭعا جۋىق قىزمەتكەردىڭ باسىن بىرىكتىرەتىن 595 مادەنيەت مەكەمەلەرى وبلىس جۇرتشىلىعىنا قالتقىسىز قىزمەت كورسەتىپ كەلەدى.
سوڭعى جىلدارى ولاردىڭ ماتەريالدىق-تەحنيكالىق بازاسى, كادرلاردىڭ ساپالىق الەۋەتى نىعايىپ, «جۇمىسپەن قامتۋدىڭ جول كارتاسى-2020» باعدارلاماسى شەڭبەرىندە 101 ءمادەنيەت جانە مۇراعات عيماراتى قالپىنا كەلتىرىلدى. ءتاۋەلسىزدىكتىڭ شيرەك عاسىرلىق كەزەڭىندە ەكى تەاتر, التى مۇراجاي, «ابىلايحان» رەزيدەنتسياسى» مۇراجاي كەشەنى, جاستار سارايى بوي كوتەردى. قارجىلاندىرۋ ون ەسەگە كوبەيىپ, كونتسەرتتىك جانە گاسترولدىك ساپارلار ءجيى ۇيىمداستىرىلاتىن بولدى. ەلدى مەكەندەردە جابىلىپ قالعان كلۋبتار, كىتاپحانالار, مادەنيەت ۇيلەرى قايتادان ىسكە قوسىلدى. جاعىمدى جاڭالىقتاردىڭ ءبىرىنە س.مۇقانوۆ اتىنداعى قازاق سازدى-دراما تەاترىنداعى كورەرمەندەر زالىنىڭ 500 ورىنعا دەيىن ۇلعايتىلىپ, جوبالاۋ-سمەتالىق قۇجاتتاردىڭ ءتۇزىلۋىن اتاۋعا بولادى.
ن.پوگودين اتىنداعى ورىس دراما تەاترىندا وتكەن سالتاناتتى كەشتە مادەنيەت سالاسى وكىلدەرىنە ەرەكشە قۇرمەت كورسەتىلدى. كورمەگە تاريحي قۇندى جادىگەرلەر, س.مۇقانوۆ, ع.مۇسىرەپوۆ, ي.شۋحوۆ سەكىلدى تانىمال جەرلەس جازۋشىلاردىڭ جەكە زاتتارى قويىلدى.
وبلىس اكىمى ەرىك سۇلتانوۆ جاس ۇرپاقتى رۋحاني تاربيەلەۋگە ۇلكەن ۇلەس قوسىپ, ومىرىنە ونەردى سەرىك ەتىپ كەلە جاتقان ءبىر توپ مادەنيەت سالاسى وكىلدەرىن ماراپاتتادى.
بارلىق اۋدانداردا جەكەلەگەن اتالىمدار بويىنشا وتكىزىلگەن بايقاۋلاردىڭ قورىتىندىلارى وسى جيىندا شىعارىلىپ, جەڭىمپازدار انىقتالدى. مۇراجايلار اراسىندا شوقان ءۋاليحانوۆ اتىنداعى سىرىمبەت تاريحي-ەتنوگرافيالىق مۇراجايى مەن ەسىل اۋداندىق مۇراجايى وزىپ شىعىپ, ارقايسىسىنا 500 مىڭ تەڭگەنىڭ سەرتيفيكاتى بەرىلدى. «ۇزدىك مەدياتەكا» اتالىمى بويىنشا تيميريازەۆ اۋداندىق كىتاپحاناسىنا 300 مىڭ تەڭگەنىڭ سىياقىسى تاپسىرىلدى. قىزىلجار اۋدانىنىڭ مۇراعات ۇجىمى 500 مىڭ تەڭگەنى ولجالادى. «ۇزدىك اۋىلدىق مادەنيەت – 2016» اتالىمىندا ايىرتاۋ اۋدانى گران-پري يەگەرى اتانىپ, 2 ميلليون, ال شال اقىن اۋدانى 1,5 ميلليون تەڭگەگە يە بولدى.
ن.پوگودين اتىنداعى ورىس دراما تەاترىنا 10 ميلليون تەڭگەنىڭ سەرتيفيكاتى سىيلاندى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى