اقىن دا, دانا دا, باتىر دا انادان تۋادى. ۇلتتى ۇلت ەتەتىن – انا. اياعى اۋىر ايەل تۇتاس جەر شارىن كوتەرىپ بارا جاتقانداي اسەر بەرەدى. قوستاناي قالاسى اكىمى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مەن سالاماتتى ءومىر سالتىن قۇرۋ پروبلەمالارىنىڭ وبلىستىق ورتالىعى بىرلەسىپ اياعى اۋىر كەلىنشەكتەردىڭ «ارۋانا» بايقاۋىن وتكىزدى.
بايقاۋعا قاتىسقان جەتى ايەلدىڭ اراسىندا تۇڭعىشىن كۇتىپ جۇرگەندەر دە, ءتورتىنشى سابيىنە اياعى اۋىر انا دا بولدى. قوستاناي قالاسىنداعى №11 ورتا مەكتەپتىڭ باستاۋىش سىنىپ مۇعالىمى ايگەرىم تاپاەۆا تۇڭعىشىن دۇنيەگە اكەلەدى, اماندىق بولسا. ول ءۇشىن ومىردە بارلىعى دا رەتىمەن كەلە جاتىر. مەكتەپتى ءبىتىردى, پەداگوگيكا كوللەدجىنە ءتۇسىپ, باستاۋىش سىنىپتار مۇعالىمى ماماندىعىن يگەردى. بىراق قىز بالا ءۇشىن تۇرمىس قۇرىپ, ومىرگە ءسابي اكەلۋ بارلىعىنان دا بيىك تۇرادى. ايگەرىم دە وتكەن جىلى تۇرمىسقا شىقتى, ءبىر اۋلەتتىڭ كەلىنى اتاندى.
– قىزدار ءۇشىن جاۋاپكەرشىك ارقاشان دا جوعارى. وتباسىن قۇرعاندا شاڭىراقتىڭ بيىك, تابالدىرىقتىڭ بەرىك بولۋى كەلىنگە كوپ بايلانىستى. بولاشاق ءسابيىمىزدى كۇتىپ ءجۇرمىز, ول ءۇشىن دە انانىڭ جاۋاپكەرشىلىگى جەتەرلىك. مەن بايقاۋعا قاتىسۋعا شاقىرتۋ العاندا وعان قاتىسۋ نەمەسە قاتىسپاۋ جونىندە كوپ ويلاندىم. سونان سوڭ قاتىسۋعا تاۋەكەل ەتتىم. ويتكەنى, الدىمەن بۇل بايقاۋدىڭ زامانداستارىم ءۇشىن تاربيەلىك ءمانى بولاتىنىن ەسكەردىم, سول يگى شارانىڭ قارلىعاشتارىنىڭ ءبىرى بولۋدى ءجون كوردىم, – دەيدى ايگەرىم تاپاەۆا.
بايقاۋدىڭ شارتى بويىنشا قاتىسۋشىلار الدىمەن وزدەرىن تانىستىردى, ودان كەيىن وزدەرىنىڭ بالا كەزدەگى نەمەسە بالالارىنىڭ سۇيىكتى ويىنشىعى, جاقسى كورەتىن بالالار كىتابى تۋرالى ايتىپ بەردى. سوڭعى شارت بويىنشا كەلىنشەكتەر ءسان كويلەگىمەن جۇرتشىلىق الدىنا شىقتى. ەڭ سۇلۋ, ەڭ سۇيكىمدى ايەل اياعى اۋىر انا ەكەنىن ولار تاعى دا دالەلدەگەندەي بولدى. ۇيىمداستىرۋشىلار بۇل بايقاۋدىڭ تاربيەلىك ءمانى بولۋى ءۇشىن ەر كىسىلەردىڭ دە ۇلەس قوسۋىن ويلاستىرىپتى. اياعى اۋىر كەلىنشەكتەردىڭ ونەرىن قۇرامىندا كوپ بالالى اكە الەكساندر مينكو, ايەلدەر مەن بالالارعا ارنالعان بەيىمدەۋ ورتالىعىنىڭ ديرەكتورى دىلمۇحامەد سپانوۆ جانە قوستاناي قالالىق پەريناتالدى ورتالىقتىڭ باس دارىگەرى تاتيانا بۋلگاتسەۆيچ بار قازىلار القاسى باعالادى. سونىمەن قاتار, زالدا كەلىنشەكتەردىڭ وتاعاسى, تۋىستارى, ۇجىمداستارى ولارعا جانكۇيەر بولدى.
بايقاۋ بولعانىمەن قازىلار القاسى قاتىسۋشىلاردىڭ بارلىعىنا بىردەي ورىن بەردى. بىرەۋىن ەكىنشىسىنەن ارتىق-كەم ەتكەن جوق.
– بۇگىنگى بايقاۋدا دوستىق جەڭدى. قاتىسۋشى انالاردىڭ بارلىعى دا جۇزىكتىڭ كوزىنەن وتكەندەي ادەمى, اقىلدى. اياعى اۋىر ارۋانالاردى قانشا بايقاۋ بولعانىمەن جىكتەپ جاتقانىمىز دۇرىس بولماس ەدى. ولار ەرتەڭ امان-ەسەن بوسانىپ, اياق-قولىن باۋىرىنا جيناپ السىن. ومىرگە دەنى ساۋ, باقىتتى سابيلەر اكەلسىن. بۇگىنگى ولاردىڭ ساحناعا شىعۋىنىڭ ءوزى ءبىزدىڭ قىز-كەلىنشەكتەر ءۇشىن ۇلگى-ونەگە, – دەدى تاتيانا بۋلگاتسەۆيچ.
ءداستۇردى, ۇلتتىق تاربيەنى, ادامگەرشىلىك پەن ايەلدىك دانالىقتى, نازىكتىكتى پاش ەتكەن تۇڭعىش بايقاۋ الداعى جىلدارى ءداستۇرلى ءوتىپ, مازمۇن جاعىنان بايىتىلا تۇسەتىن بولادى.
ءنازيرا جارىمبەتوۆا,
«ەگەمەن قازاقستان»
قوستاناي