باس پروكۋراتۋرانىڭ رەسمي وكىلى ج.ومىراليەۆ حابارلاعانداي, پروكۋراتۋرا ورگاندارى كوشى-قون سالاسىنداعى زاڭدىلىقتى قامتاماسىز ەتۋ ماسەلەلەرىنە ەرەكشە نازار اۋدارا باستادى. سونىڭ ارقاسىندا جۇرگىزىلگەن تەكسەرۋلەردىڭ ناتيجەلەرى قازاقستاندا شەتەلدىكتەردىڭ زاڭسىز سايران سالۋىنىڭ كوپتەگەن دەرەكتەرىن اشىپ بەرگەن. ەلىمىزگە كەلۋ مەرزىمدەرىن ساقتامايتىن ولاردىڭ باسىنعاندىقتارى سونشاما ەل اۋماعىنان الاستاتۋ تۋرالى سوت شەشىمىن ورىندامايدى, وزدەرىنىڭ جەكە باستارىن راستايتىن قۇجاتتاردى (تولقۇجاتتارىن) ىشكى ىستەر ورگاندارىنا تىركەمەيدى, زاڭسىز جۇمىس ىستەيدى, تىركەلگەن مەكەن-جايدا تۇرمايدى جانە بۇعان قوسا ءتۇرلى زاڭ بۇزۋشىلىقتارعا بارادى ەكەن. ماسەلەن, الماتى قالاسىندا, اقتوبە, الماتى, جامبىل, باتىس قازاقستان, قوستاناي, ماڭعىستاۋ جانە وڭتۇستىك قازاقستان وبلىستارىنا كەلۋ ەرەجەلەرىن بۇزا وتىرىپ, زاڭسىز جۇمىس ىستەۋمەن اينالىسقان 400-دەن استام شەتەلدىكتەر انىقتالعان.
ونى ايتاسىز, ۇستىمىزدەگى جىلدىڭ ءبىرىنشى جارتىجىلدىعىندا عانا شەتەلدىكتەر 726 قىلمىس ءجانە شامامەن 60 مىڭنان استام اكىمشىلىك قۇقىق بۇزۋشىلىقتار جاساعان. تىپتەن «ءاي» دەيتىن اجا, «قوي» دەيتىن قوجا جوق سەكىلدى. قوستاناي وبلىسىندا رەسەي فەدەراتسياسى تاراپىنان مەملەكەتارالىق ىزدەۋدە جۇرگەن حابراحمانوۆ دەگەن رەسەي ازاماتى تۇرىپ كەلگەن. ال ونى, سەنسەڭىز دە, سەنبەسەڭىز دە ايتايىق, قوستاناي وبلىستىق (جىتىقارا اۋداندىق) كوشى-قون پوليتسياسى الگىنى اعاسىنىڭ تولقۇجاتى بويىنشا زاڭسىز تىركەۋگە قويىپتى. سودان حابراحمانوۆ ەلىمىزدە تايراڭداپ ءجۇرىپ ادام ءولتىرىپ ۇستالماعاندا انىقتالمايدى ەكەن. ونى سوندا وسىنشاما تايراڭداتىپ قويعان كىم؟ الدىمەن سول جاۋاپتى ادامدارعا جازا قولدانىلۋى كەرەك ەدى عوي. سول سياقتى قىرعىزستان ازاماتى كوچكورەۆ 2010 جىلدىڭ شىلدەسىندە سوت شەشىمى بويىنشا ەلىمىزدەن شىعارىلىپ جىبەرىلسە دە, ارتىنشا قازاقستاننىڭ مەملەكەتتىك شەكاراسىن ەمىن-ەركىن 15 رەت كەسىپ وتكەن. بۇعان كىم جاۋاپ بەرەدى؟
اكىمشىلىك زاڭنامالاردىڭ قولدانىلۋىن تەكسەرۋ استانا جانە الماتى قالالارى, اقمولا, اقتوبە, اتىراۋ, جامبىل, باتىس قازاقستان, پاۆلودار, سولتۇستىك قازاقستان, وڭتۇستىك قازاقستان وبلىستارىندا شەتەلدىك قۇقىق بۇزۋشىلارعا ءتيىستى شارالار قابىلداماۋ, ولاردىڭ ارەكەتتەرىن دۇرىس سارالاماۋ دەرەكتەرىن اشقان. سونىڭ سالدارىنان زاڭ تالاپتارى بۇزىلىپ, كىنالىلەر جاۋاپكەرشىلىكتەردەن قۇتىلىپ جاتقان كورىنەدى. پەتروپاۆل قالاسىنىڭ اكىمشىلىك سوتى 3 ماتەريالدى تولىق بولماۋىنا بايلانىستى ىشكى ىستەر ورگاندارىنا قايتارعان. ال ىشكى ىستەر ورگاندارى جاۋاپكەرشىلىككە تارتۋ مەرزىمىنىڭ اياقتالۋىنا بايلانىستى ءىس جۇرگىزۋدى توقتاتۋ تۋرالى قاۋلى شىعارعان. وسىنى پايدالانعان شەتەلدىكتەر ءىز جاسىرعان. باتىس قازاقستان وبلىسىنىڭ پوليتسيا قىزمەتكەرلەرى بۇدان دا اسىپ ءتۇسىپ, سوتتان ءوزبەكستاننىڭ 9 ازاماتىنا قاتىستى اكىمشىلىك ماتەريالداردى پىسىقتاۋعا العان دا, ءىس جۇرگىزۋدى توقتاتقان جانە شەتەلدىك قۇقىق بۇزۋشىلارعا ولاردىڭ تولقۇجاتتارىن قايتارىپ بەرگەن. مىنە, بۇدان كەيىن شەتەلدىكتەر زاڭ بۇزباعاندا قايتەدى؟
الەكساندر تاسبولاتوۆ.