قاراعاندىدا وتكەن اڭشىلار قۇرىلتايى وبلىستىڭ ءار تۇكپىرىنەن جينالعان ساياتشىلار يت جۇگىرتىپ, قۇس سالدى, - دەپ حابارلايدى "حابار 24" تەلەارناسى.
استانادان ارنايى كەلگەن كينولوگتار ناعىز قۇماي تازىلاردىڭ تۇقىمىن انىقتاپ, تىزىمگە ەنگىزدى. ولار قازاقتىڭ جەتى قازىناسىنىڭ ءبىرىن حالىقارالىق دارەجەدە مويىنداتۋدى كوزدەپ وتىر. قازاق قۇماي تازىنى "جەتى قازىنانىڭ ءبىرى" دەپ جوعارى باعالاعان. بىراق, وكىنىشكە قاراي, سوڭعى جىلدارى ءيتتىڭ بۇل ءتۇرى جوعالىپ بارادى.
تەلەارنانىڭ مالىمەتىنشە, شارانىڭ باستى ماقساتى - جان-جاقتان جينالعان تازىلاردىڭ اراسىنان تازا قاندىسىن تاۋىپ, تىزىمگە الۋ. بۇحار جىراۋ اۋدانىنان كەلگەن اسەت شالتاەۆتىڭ تازىسى جاقىندا عانا استانادا وتكەن جارىستا باس جۇلدەنى جەڭىپ الىپتى. سول جولى كينولوگتار "باسارعا" قازاقتىڭ قۇماي تازىسى دەگەن قۇجات بەرگەن. ال يەسى بولسا, وسىنداي جيىندار ءجيى ءوتىپ تۇرسا دەيدى.
"اتا-بابا جولىن جالعاستىرىپ, وسى تازىلاردى كوبەيتۋ ماقساتىمىز. قازىر از, كوبەيتۋ كەرەك, سول ءۇشىن وسىنداي كورمەلەر كەرەك", - دەيدى كينولوگ اسەت شالتاەۆ.
مامانداردىڭ ايتۋىنشا, قازىر الەمدە ءيتتىڭ 400-دەن استام ءتۇرى بار. سونىڭ ىشىندەگى ەڭ جۇيرىگى وسى قازاقتىڭ قۇماي تازىلارى. ونى ەندى حالىقارالىق دارەجەدە مويىنداتۋ ءۇشىن دايەكتى دالەل كەرەك. ياعني حالىقارالىق كينولوگيالىق ۇيىمعا ەلىمىزدە 1 مىڭنان استام قۇماي تازىنىڭ بار ەكەنىن راستايتىن قۇجات تاپسىرۋىمىز قاجەت. وكىنىشكە وراي, قازىر قازاقستاندا بار-جوعى تازا قاندى 200 تازى عانا تىركەلگەن.
"قانسونار" اڭشىلار قاۋىمداستىعىنىڭ باس كينولوگى يننا نازارەنكونىڭ ايتۋىنشا, بارلىعى دا حالىقتىڭ وزىنە بايلانىستى. "وسىنداي شارالارعا قاتىسىپ نەمەسە بىزگە كەلىپ تىركەلۋ كەرەك. وكىنىشكە وراي, اۋىل-اۋىلداعى يتبەگىلەردىڭ باسىم كوپشىلىگى تازىلارىنا قۇجات الۋعا ق ۇلىقسىز, اڭ اۋلاسا بولدى دەپ قارايدى", - دەيدى ول.
جارىستىڭ قورىتىندىسى بويىنشا اسەتتىڭ قۇماي تازىسى تاعى باس جۇلدەنى جەڭىپ الدى. قالعاندارى دا ماراپاتتان قۇر قالعان جوق.