استانادا قالا اكىمدىگىنىڭ قولداۋىمەن العاشقى Saryarka short film festival قىسقامەتراجدى فيلمدەر فەستيۆالى ءوتتى. شارانى ۇيىمداستىرۋشى - «استانا جاستارى» جاستار رەسۋرستىق ورتالىعى, دەپ حابارلايدى استانا قالاسى اكىمدىگى.
كينوفەستيۆال باعدارلاماسىنا 23 فيلم جانە كونكۋرستان تىس 5 جۇمىس قاتىستى. ماقساتى – كينەماتوگرافيادا جاڭا جۇلدىزداردى انىقتاۋ, فەستيۆالدى شىعارماشىل جاستار مەن قازاقستاندىق كينو كاسىپقويلارى شوعىرلانعان الاڭعا اينالدىرۋ, ال ۇزىلىستەر اراسىندا ەلىمىزدەگى تانىمال رەجيسسەرلار قانات بەيسەكەەۆ, مەدەت شاياحمەتوۆ, ولجاس بەيلوۆتىڭ جەتەكشىلىگىمەن شەبەرلىك سىنىپتارى وتكىزىلدى.
«ءتۇرلى تاقىرىپتار ۇسىنىلعان. ۇيىمداستىرۋشى رەتىندە جاستاردىڭ ءارتۇرلى تاقىرىپتا كينو تۇسىرەتىنى قۋانتادى دەپ ايتا الامىن»,- دەدى «استانا جاستارى» جاستار رەسۋرستىق ورتالىعىنىڭ باسشىسى, بەلگىلى قازاقستاندىق اكتەر ءانۋار نۇرپەيىسوۆ.
توعىز ساعاتقا سوزىلعان فەستيۆالدىڭ قورىتىندىسى بويىنشا قازىلار القاسىنىڭ شەشىمىمەن رومان گۋساك «ۇزدىك وپەراتور», قازبەك رۇستەمبەكوۆ «ۇزدىك رەجيسسەر» اتاندى. «ۇزدىك ستسەناري» نوميناتسياسىندا ولجاس تايگەلوۆ كوش باستادى, «ۇزدىك ايەلدەر ءرولىن» تولعاناي تالعات, «ۇزدىك ەرلەر ءرولىن» اقمولدا دۋلىعا سومدادى, «كورەرمەندەر كوزايىمى» سىيلىعى سامعار راقىمعا بەرىلدى. رەجيسسەر دارحان تولەگەنوۆ «مارشرۋت» فيلمىمەن گران-پري يەلەندى.