استانادا «تۇرىك فيلمدەرى اپتالىعى» باستالدى. قازاقستان تاۋەلسىزدىگىنىڭ شيرەك عاسىرلىق تويىنا باۋىرلاس ەل تارتۋ جاساپ, حالىقارالىق كينوفەستيۆالدەردە جوعارى باعالانعان, كورەرمەن تالعامىنان شىققان ۇزدىك فيلمدەردىڭ كورسەتىلىمىن ۇيىمداستىرىپ وتىر.
19-22 جەلتوقسان ارالىعىندا وتەتىن شاراعا وراي, ۇيىمداستىرۋشىلار ارنايى بريفينگ وتكىزدى.
"تۇركيا حالقى اتىنان قازاق حالقىنا, تۇرىك الەمىنىڭ اقساقالى نۇرسۇلتان نازارباەۆقا زور قۇرمەتىمىزدى, سالەمىمىزدى جەتكىزگىم كەلەدى. تۇپكى وتانىمىز قازاقستاندى تاۋەلسىزدىكتىڭ 25 جىلدىق تويىمەن قۇتتىقتايمىن! قيامەت كۇنىنە دەيىن ەگەمەن ەل بولۋلارىڭىزدى تىلەيمىن! استانادا ءبىر اپتا بويى كورسەتىلەتىن فيلمدەر ەكى باۋىرلاس ەلدەردىڭ اراسىنداعى دوستىق پەن ىنتىماقتاستىقتىڭ ارتۋىنا ىقپال ەتەدى دەپ سەنەمىن. كينوسۇيەر قاۋىمنىڭ بارشاسىن شاقىرامىن," - دەدى تۇركيا رەسپۋبليكاسى پرەزيدەنتىنىڭ كەڭەسشىسى يالچىن توپچى.
ول الداعى ۋاقىتتا انكارادا قازاقستان فيلمدەرىنىڭ اپتالىعى وتەدى دەپ دەپ ءۇمىت بىلدىرەتىنىن جەتكىزدى.
تۇركيانىڭ ۇزدىك فيلمدەرى ەلورداداعى «كەرۋەن» ساۋدا ورتالىعىنداعى «كينوپاركتە» كورسەتىلەتىنىن ايتا كەتەيىك.
ارنۇر اسقار, «ەگەمەن قازاقستان»