بەس جىلدا جەمقورلار قازاقستاننان 70 ملرد. تەڭگەنى سىرتقا شىعارعان. بۇل تۋرالى بۇگىن استانادا ەىدۇ سىبايلاس جەمقورلىققا قارسى جەلىسى قۇقىق قورعاۋ ورگاندارىنىڭ جەتىنشى وتىرىسىندا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ ءمالىم ەتتى, دەپ حابارلايدى قازاقپارات.
«سوڭعى بەس جىلدا سىبايلاس جەمقورلىق قىلمىستارىنىڭ سالدارىنان قازاقستاننان 70 ملرد. تەڭگەدەن استام قارجى شىعارىلدى. وسى قىلمىسقا قاتىستى 47 ادامعا حالىقارالىق ىزدەۋ جاريالانىپ, 28-ءى تابىلىپ, قازاقستانعا ەكستراديتسيالاندى. وسى رەتتە بۇگىنگى وتىرىسقا قاتىسىپ وتىرعان بىرقاتار ارىپتەستەرىمە العىسىمدى ايتقىم كەلەدى. ولار قۇقىقتىق كومەك اياسىندا قىلمىسكەرلەردى ەلىمىزگە ەكستراديتسيالاۋعا قولداۋ جاسادى»,-دەدى شپەكباەۆ.
بۇدان بولەك ول وتىرىس بارىسىندا تىلشىلەر ساۋالىنا جاۋاپ بەرۋ كەزىندە قازاقستاننان شەتەلگە زاڭسىز شىعارىلعان اقشانى قايتارۋ بويىنشا باس پروكۋراتۋرا مەن اگەنتتىك تاراپىنان ءتيىستى شارالار اتقارىلىپ جاتقاندىعىن اتاپ ءوتتى.
«كەتكەن شىعىن بار (70 ملرد. تەڭگە), بۇگىندە ونىڭ 20 پايىزىنىڭ ورنى تولتىرىلدى. كەتىپ قالعاندارعا قاتىستى الداعى ۋاقىتتا قايتارۋ جۇمىستارى مەن ءتيىستى ەكستراديتسيالاۋ شارالارى ىسكە اسىرىلۋدا. اتاپ ايتقاندا, زاڭسىز اۋدارىمدار مەن وسى جولمەن شەتەلدە ساتىپ الىنعان م ۇلىككە تىيىم سالۋ شاراسى قولدانىلىپ, سايكەسىنشە بۇل قارجى قازاقستانعا قايتارىلادى»,- دەدى شپەكباەۆ.