قىرعىز پرەزيدەنتى المازبەك اتامباەۆ 2017 جىلدى ادامگەرشىلىك, تاربيە مەن مادەنيەت جىلى دەپ جاريالاماق, دەپ حابارلايدى 24.kz.
مەملەكەت باسشىسىنىڭ پىكىرىنشە, قوعامدا ىزگىلىك قاسيەتتەر ازايىپ بارادى. وسى تۇستا حالىقتىڭ ويى ەكىگە جارىلدى. ءبىرى مادەنيەتتەن بۇرىن قۇلدىراعان ەكونوميكانى كوتەرۋ كەرەك دەسە, وزگەلەرى تىڭ باستامانى قولداپ وتىر. تاربيەلى, مادەنيەتتى بول جانە ادامي قۇندىلىقتارىڭدى جوعالتپا. قاراپايىم قىرعىز ازاماتىنىڭ بەينەسى وسىنداي بولۋى كەرەك. وكىنىشكە وراي, ەلدىڭ بارلىق تۇرعىنى مۇنداي قادىر-قاسيەتكە يە دەپ ايتۋ قيىن. سوندىقتان بولار, قىرعىز پرەزيدەنتى وتانداستارىنا كەلەر جىلدى ادامگەرشىلىك, رۋحاني دامۋ جىلى دەپ اتاۋدى ۇسىندى.
"كوكتەمدە ستۋدەنت «تۋكۋربيو» كومپانياسىن اشتى. بۇل ادامدارعا اسەر ەتتى. ال الەۋمەتتىك جەلىدە جاستار قوعامدىق ورىندا شەكىلدەۋىك شاقپاۋ تۋرالى باستاما كوتەردى. ناتيجەسىن بەردى. قازىر بەلسەندى جاستار قاتارى ارتتى. ولار مەملەكەتتىڭ دامۋىنا اسەر ەتە الادى", - دەيدى قىرعىز پرەزيدەنتى.
پرەزيدەنت باستاماسى قوعامدى ەكىگە ءبولدى. ونىڭ پىكىرىن قولداعاندار مەن قاتار قارسىلىق بىلدىرگەندەر دە تابىلدى. ايىر قالپاقتى اعايىن ادامي قۇندىلىقتاردى جوعالتپاي, ناسيحاتتاۋدى قولدايدى. بىراق ەلدە بۇدان وزگە شەشىمىن تاپپاعان ماسەلەلەر جەتەدى. سوندىقتان بيلىك باسىنداعى شەنەۋنىكتەر ماڭىزدى ماسەلەلەرمەن اينالىسۋ قاجەتتىگىن ايتادى.