ەلورداداعى Astana Music Hall-دا قازاقستان رەسپۋبليكاسى ۇكىمەتىنىڭ «دارىن» مەملەكەتتىك جاستار سىيلىعىنا لايىقتى ازاماتتاردى سالتاناتتى تۇردە ماراپاتتاۋ ءراسىمى ءوتتى. بۇل سىيلىق ءتۇرلى سالادا ءجۇرىپ, ءوزىنىڭ ءبىلىم-بىلىگىمەن, تابيعي تالانتىمەن, بەلسەندىلىگىمەن توپ جارعان جاستاردى مەملەكەت تاراپىنان قولداۋ ماقساتىندا ەكى جىلدا ءبىر رەت 10 اتالىم بويىنشا بەرىلىپ كەلەدى.
بيىلعى ءىس-شارانى ءدىن ىستەرى جانە ازاماتتىق قوعام مينيسترلىگى ۇيىمداستىرعاندىقتان, وعان ۆەدومستۆو باسشىسى نۇرلان ەرمەكباەۆ, سونىمەن قاتار, پارلامەنت ءماجىلىسىنىڭ دەپۋتاتتارى, مەملەكەتتىك ورگانداردىڭ وكىلدەرى, قوعام قايراتكەرلەرى, ۇكىمەتتىك ەمەس ۇيىمداردىڭ باسشىلارى, كوللەدجدەر مەن جوعارى وقۋ ورىندارىنىڭ ستۋدەنتتەرى قاتىستى.
سالتاناتتى راسىمدە سويلەگەن سوزىندە نۇرلان ەرمەكباەۆ: «بۇل سىيلىق 1993 جىلى پرەزيدەنتتىڭ باستاماسىمەن تاعايىندالعان بولاتىن. سىيلىقتى بەرۋدەگى باستى ماقسات – وزدەرىنىڭ اسقان تالانتىمەن ەلىمىزدەگى ءتۇرلى سالالاردىڭ دامۋىنا ەڭبەك ءسىڭىرىپ جۇرگەن جاستارىمىزدى قاناتتاندىرۋ, دارىندىلىعىمەن, قابىلەتتەرىمەن كوزگە تۇسكەن جاس بۋىندى ماراپاتتاۋ. ماسەلەن, سپورتتا, قوعامدىق قىزمەتتە, كلاسسيكالىق مۋزىكادا, ونەردە تەر توگىپ جۇرگەن جاستار كوپ. ەندەشە, «دارىن» مەملەكەتتىك جاستار سىيلىعىمەن ماراپاتتاۋ ارقىلى ءبىز مىنە, وسىنداي جاستاردى قولداپ, ولاردىڭ تالانتتارىنىڭ ودان ءارى جەتىلۋىنە قوسىمشا كۇش-جىگەر بەرگىمىز كەلەدى», – دەي كەلە, بۇل ماراپات پرەزيدەنتتىڭ, مەملەكەتتىڭ جاستارىمىزعا جاساپ وتىرعان قامقورلىعىنىڭ ءبىر بەلگىسى ەكەنىن اتاپ ءوتتى.
بۇگىنگە دەيىن «دارىن» سىيلىعىنا ءار جىلدارى ەلىمىزگە كەڭىنەن تانىمال ادامدار قول جەتكىزىپ كەلدى. ولاردىڭ اراسىندا نۇرلان ونەرباەۆ, قىدىرالى بولمانوۆ, ايگۇل كەمەلباەۆا, ولگا شيشيگينا, ەربولات قۇدايبەرگەنوۆ, باحتيار ارتاەۆ, سەرىك ساپيەۆ سىندى ونەر, شىعارماشىلىق, سپورت سالالارىنىڭ بەلدى وكىلدەرى, «مۇزارت», «بايتەرەك», «جىگىتتەر» توپتارى بار.
بيىل دا بۇل سىيلىققا ەڭ ۇزدىك ءارى تالانتتى جاستار عىلىم, ادەبيەت, جۋرناليستيكا, سپورت, حالىق شىعارماشىلىعى, ديزاين جانە بەينەلەۋ ونەرى, ەسترادا, تەاتر جانە كينو, كلاسسيكالىق ءان, سونداي-اق, قوعامدىق قىزمەت اتالىمدارى بويىنشا ماراپاتتالدى.
ماسەلەن, «قوعامدىق قىزمەت» اتالىمى بويىنشا سىيلىققا كامشات قوسكەلوۆا, ەلينا پاۋلي, ولجاس سۋلەيمەنوۆ جانە جاندوس تابىلعانوۆ يە بولدى. «سپورت» اتالىمىندا «دارىن» سىيلىعىمەن دميتري بالاندين مەن ادىلبەك نيازىمبەتوۆ ماراپاتتالدى. «تەاتر جانە كينو» اتالىمىندا جاسۇلان ەربولات, ەلدار وتارباەۆ پەن اسىلحان تولەپوۆ ۇزدىك دەپ تانىلدى. «ەسترادا» اتالىمىنداعى سىيلىقتى قايرات ايداربەكوۆ, ءالي وقاپوۆ يەلەندى. «حالىق شىعارماشىلىعى» بويىنشا «دارىن» سىيلىعىن جانداربەك بۇلعاقوۆ پەن سادجانا مىرزاليەۆا ەنشىلەدى. ولجاس قاسىموۆ پەن ماناربەك قىدىرباي «ادەبيەت» اتالىمى بويىنشا ماراپاتتالسا, «عىلىم» اتالىمىنداعى جاستار سىيلىعىن دارىن بورگەكوۆ, ماقسات جاباعين, ابىلايحان ەسكەندىروۆ, ارتەم كوزلوۆسكي مەن اقنۇر تۇرعىمباەۆا الدى. «ديزاين جانە بەينەلەۋ ونەرى» اتالىمىنداعى سىيلىقتىڭ جالعىز يەگەرى اسەل كەمەلباەۆا بولدى. «جۋرناليستيكا» اتالىمى بويىنشا «دارىن» سىيلىعىن نۇرسۇلتان قۇرمانوۆ پەن يرينا تەن يەلەندى. ال «كلاسسيكالىق مۋزىكا» اتالىمىمەن راحات-بي ابدىساعين, ماقسات ءجۇسىپوۆ جانە ازات مالىك ماراپاتتالدى.
بارلىق جەڭىمپازدارعا «قازاقستان ۇكىمەتىنىڭ 2016 جىلعى «دارىن» مەملەكەتتىك جاستار سىيلىعىنىڭ يەگەرى» اتاعى, ديپلوم, توسبەلگى جانە اقشالاي سىياقى بەرىلدى.
بۇل كۇنى جۋرناليستەرگە بەرگەن سۇحباتىندا دميتري بالاندين جوعارى دەڭگەيدەگى سىيلىققا يە بولۋ ءوزى ءۇشىن توسىن سىي بولعانىن جاسىرمادى. «مەن بۇل سىيلىقتىڭ يەگەرى اتانۋ ءۇشىن ەشقانداي قۇجات تاپسىرعان جوقپىن. ونى الماتى قالاسىنىڭ اكىمدىگى جىبەرگەن بولۋى كەرەك. سوندىقتان, بۇل ماراپات شىنىمەن دە, توسىن سىي, كۇتپەگەن جاعداي بولدى. ارينە, بۇل مەن ءۇشىن وتە ۇلكەن قۇرمەت, وسىنداي ماراپاتقا يە بولعانىما قۋانىشىم شەكسىز. «دارىن» سىيلىعىن يەلەنۋ ماعان ۇلكەن شابىت بەرىپ وتىر», – دەيدى وليمپيادا چەمپيونى.
ءلايلا ەدىلقىزى, "ەگەمەن قازاقستان".