پرەزيدەنت قاسىم-جومارت توقاەۆ ەۋرازيالىق ەكونوميكالىق وداققا مۇشە مەملەكەتتەردىڭ ەۋرازيالىق كولىك دالىزدەرىنە كىرەتىن اۆتوموبيل جولدارىمەن جۇرگەن كەزدە كولىك قۇرالدارىنىڭ رۇقسات ەتىلەتىن ماسسالارى, وستىك جۇكتەمەسى جانە گاباريتتەرى تۋرالى كەلىسىمدى بەكىتۋ جونىندەگى جارلىققا قول قويدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
اتالعان كەلىسىم 2024 جىلى 13 جەلتوقساندا ماسكەۋ قالاسىندا قابىلدانعان بولاتىن. قۇجات وداققا مۇشە مەملەكەتتەر اۋماعىندا كولىك قۇرالدارىنىڭ تەحنيكالىق پارامەترلەرىنە قويىلاتىن تالاپتاردى بىرىزدەندىرۋگە باعىتتالعان.
ونى ىسكە اسىرۋ حالىقارالىق اۆتوتاسىمالداۋشىلار ءۇشىن تەڭ ءارى اشىق جاعداي قالىپتاستىرادى.
كەلىسىمنىڭ نەگىزگى ماقساتتارى:
ەاەو-نىڭ ترانزيتتىك الەۋەتىن ءتيىمدى پايدالانۋ; ەۋرازيالىق كولىك دالىزدەرى بويىنشا حالىقارالىق اۆتوموبيل تاسىمالىنىڭ تيىمدىلىگىن ارتتىرۋ; اۆتوموبيل ينفراقۇرىلىمىنىڭ ساقتالۋىن قامتاماسىز ەتۋ; جول قوزعالىسى قاۋىپسىزدىگىن كۇشەيتۋ; كولىك قىزمەتتەرىنىڭ ساپاسىن ارتتىرۋ.جارلىق ترانزيتتىك تاسىمالداردى دامىتۋعا قۇقىقتىق نەگىز قالىپتاستىرىپ, قازاقستاننىڭ وڭىردەگى ماڭىزدى كولىك-لوگيستيكالىق حاب رەتىندەگى پوزيتسياسىن نىعايتادى.
بۇعان دەيىن مەملەكەت باسشىسى سەربيا پرەزيدەنتىن «التىن قىران» وردەنىمەن ماراپاتتاعانىن حابارلاعانبىز.
سونداي-اق قازاقستان مەن سەربيا اراسىندا 10 مەموراندۋمعا قول قويىلدى.